၂၀၂၄ ခုနှစ်အတွင်း နိုင်ငံတဝှမ်း အနည်းဆုံး နိုင်ကျဉ်း ၃၁ ဦး ကျဆုံးခဲ့
မဲခေါင်၊ ဒီဇင်ဘာ ၃၁
၂၀၂၄ ခုနှစ်အတွင်း အာဏာသိမ်းစစ်ကောင်စီရဲ့ အကျဉ်းထောင်အသီးသီးမှာ ကျန်းမာရေးချို့တဲ့တာနဲ့ ဥပဒေမဲ့ သတ်ဖြတ်ခံရတာတွေကြောင့် အနည်းဆုံး နိုင်ကျဉ်း ၃၁ ဦး ကျဆုံးခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)က ဒီနေ့( ဒီဇင်ဘာ၃၁) ထုတ်ပြန်ပါတယ်။
ခုနှစ်အတွင်း ဥပဒေမဲ့သတ်ဖြတ်ခံရသူ နိုင်ငံရေးအကျဉ်းသား အမျိုးသမီးတစ်ဦး၊ အမျိုးသားရှစ်ဦး၊ စုစုပေါင်းကိုးဦးရှိခဲ့တယ်လို့ ဖော်ပြထားပါတယ်။
အကျဉ်းထောင်တွင်း ဖမ်းဆီးခံထားရချိန် ကျန်းမာရေးမကောင်းစဉ် ဆေးဝါးစောင့်ရှောက်မှုမရလို့ သေဆုံးခဲ့ရတဲ့နိုင်ငံရေးအကျဉ်းသား အမျိုးသမီးသုံးဦး၊ အမျိုးသား ၁၈ဦး၊ LGBTတစ်ဦး၊ စုစုပေါင်း ၂၂ ဦးရှိခဲ့တယ်လို့ ဆိုပါတယ်။
“ကျဆုံးရဲဘော်တွေအတွက် ဆုတောင်းပေးကြပါ၊ အကျဉ်းထောင်တွင်း ကျန်ရှိနေကြဆဲ နိုင်ကျဉ်းတွေအတွက်လည်း တက်အားသမျှ အကောင်းဆုံး ကြိုးစားပေးကြပါ” လို့ PPNMအမှုဆောင် ကိုသိုက်ထွန်းဦးက ပြောပါတယ်။
ဥပဒေမဲ့ ညှဉ်းပန်းနှိပ်စက် ရိုက်နှက်ခံရမှု နိုင်ငံရေးအကျဉ်းသား၊ အကျဉ်းသူ အနည်းဆုံး ၁၄၈ ဦး၊ ထောင်ပြောင်းရွှေ့ခံရတဲ့ အကျဉ်းသား ၃၀၅၄ ဦးရှိခဲ့ပြီး အဲ့ဒီအထဲက နိုင်ငံရေးအကျဉ်းသား၊ အကျဉ်းသူ ၁၈၈၃ ဦးဟာ မိသားစုနဲ့ဝေးကွာတဲ့ အကျဉ်းထောင်တွေကို ထောင်ပြောင်းရွေ့ခံထားရပါတယ်။
အကျဉ်းထောင်တွင်း ညှဉ်းပန်းနှိပ်စက်ပြီးနောက် တိုက်ပိတ်ခံရတဲ့ နိုင်ငံရေးအကျဉ်း သား၊ အကျဉ်းသူ ၇၆ ဦးရှိခဲ့ပြီး အကျဉ်းထောင်တွင်း ကလေးငယ်နဲ့ အတူရှိနေတဲ့ နိုင်ငံရေးအကျဉ်းသူ အနည်းဆုံး ၃၅ ဦး အကျဉ်းချခံထားရပါတယ်။
နိုင်ငံတစ်ဝန်းရှိ အကျဉ်းထောင် ၄၁ ထောင်က လူ့အခွင့်အရေးချိုးဖောက်ခံရမှု အစီရင်ခံစာမျှသာ ဖြစ်တဲ့အတွက် မြေပြင်မှာ အခုထက် အရေအတွက် ပိုမိုများပြားနိုင်တယ်လို့ PPNMက ပြောပါတယ်။
စစ်ကောင်စီရဲ့ အကျဉ်းဦးစီးဌာနစာရင်းအရ မြန်မာနိုင်ငံတဝှမ်းမှာ ကုန်ထုတ်စခန်း ၃၁ ခုမပါ ဗဟို အကျဉ်ထောင်နှစ်ခု က အဆင့် ၃၃ ထောင်၊ ခ အဆင့်၁၁ ထောင်နဲ့ အချုပ်ထောင် ၁၉ ထောင်ရှိ ကြောင်းသိရပါတယ်။
အဲဒိထဲကမှလွတ်မြောက်နယ်မြေက ထောင်တွေဖြစ်တဲ့ လားရှိူး၊ သီပေါ၊ သံတွဲလိုထောင်တွေကလွဲရင် ထောင် ၄၁ ထောင်မှာ နိုင်ငံရေးအကျဉ်းသားတွေ မတရားချုပ်နှောင်ခံထားရတယ်လို့ သိရပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ ဒီဇင်ဘာ၂၇ ရက်အထိ ထုတ်ပြန်ချက်မှာတော့ အကြမ်းဖက်စစ်အုပ်စုနဲ့လက်ပါးစေတွေကြောင့် နွေဦးတော်လှန်ရေးကာလအတွင်း သေဆုံးခဲ့ရတဲ့ ဒီမိုကရေစီရေး လှုပ်ရှားသူ စုစုပေါင်း ၆၀၈၇ ဦး ရှိခဲ့ပြီလို့ ပါရှိပါတယ်။
ဖမ်းဆီးခံခဲ့ရသူ စုစုပေါင်း ၂၈၀၅၁ ဦးရှိခဲ့ပြီးဖြစ်ကာ အဲဒီအထဲက ၂၁၄၇၉ ဦး ထိန်းသိမ်းခံနေရဆဲဖြစ်ပြီး ၉၉၃၃ ဦးမှာ ထောင်ဒဏ်ချမှတ်ခံထားရတယ်လို့ ဖော်ပြထားပါတယ်။
၂၀၂၁ ခုနှစ်၊ ဖေဖော်ဝါရီ ၁ ရက် စစ်တပ်အာဏာသိမ်းချိန်ကစပြီး နိုင်ငံရေးအကျဉ်းသားတွေ၊ တက်ကြွလှုပ်ရှားသူတွေ၊ ကျောင်းသားတွေ၊ အလုပ်သမားတွေ၊ လယ်သမားတွေနဲ့တိုင်းရင်းသားလူမျိုးစုတွေကို ဥပဒေမဲ့ ဖမ်းဆီး ထိန်းသိမ်းတာတွေကို အကြမ်းဖက်စစ်ကောင်စီအနေနဲ့ လုပ်ဆောင်နေတာဟာ အချိန်ကာလအားဖြင့် ၄ နှစ်ပြည့်မြောက်တော့မှာ ဖြစ်ပါတယ်။
MK-012
#MekongNews
