သိမ်းပိုက်ထားတဲ့ နမ့်ခမ်းမြို့မှာ TNLA ရဲတပ်ဖွဲ့ ကင်းလှည့်
မဲခေါင်၊ ဒီဇင်ဘာ ၁၈
ရှမ်းပြည်မြောက်ပိုင်း၊ တအာင်း (ပလောင်) အမျိုးသားလွတ်မြောက်ရေးတပ်ဦး (TNLA) သိမ်းပိုက်ထားတဲ့ နမ့်ခမ်းမြို့မှာ ရဲတပ်ဖွဲ့ ကင်းလှည့်တဲ့ ဓာတ်ပုံတွေကို TNLA က ဒီနေ့ (ဒီဇင်ဘာ ၁၈) မှာ ထုတ်ပြန်ပါတယ်။
TNLA ရဲ့ နမ့်ခမ်းမြို့နယ်၊ ရဲတပ်ဖွဲ့က မြို့နယ်အေးချမ်းသာယာရေးနဲ့ ပြည်သူ့လုံခြုံရေးအတွက် မြို့တွင်း ကင်းလှည့်ခြင်း ဖြစ်တယ်လို့ ဆိုပါတယ်။
စစ်တပ်မရှုမလှ ရှုံးနိမ့်ခဲ့တဲ့ “၁၀၂၇ စစ်ဆင်ရေး” အတွင်း TNLA နဲ့ ပူးပေါင်းတပ်ဖွဲ့က နမ့်ခမ်းမြို့ကို တိုက်ခိုက်သိမ်းပိုက်ခဲ့တာပါ။ သိမ်းပိုက်ခံရပြီးနောက် နမ့်ခမ်းမြို့တွင်းကို စစ်ကောင်စီက လေကြောင်းက ဗုံးကြဲမှုတွေ ပြုလုပ်ခဲ့ပါတယ်။
စစ်ကောင်စီတပ် ထိန်းချုပ်ထားတဲ့ တရုတ်နယ်စပ် မူဆယ်နဲ့အနီးဆုံးမှာရှိတဲ့ TNLA ထိန်းချုပ် နမ့်ခမ်းမြို့အတွင်း ကုန်ပစ္စည်းတွေ မဝင်ရောက်ရေး စစ်ကောင်စီဘက်က ပြီးခဲ့တဲ့ လတွေအတွင်း ပိတ်ဆို့ခဲ့ပါတယ်။
TNLA ဘက်ကလည်း နမ့်ခမ်းမြို့မှ ကုန်ပစ္စည်းတွေ မူဆယ်မြို့ကို မဝင်ရောက်ရေး အပြန်အလှန် ပိတ်ပင်ခဲ့ပြီးနောက် မြို့တွင်းကင်းလှည့်နေတဲ့ ဓာတ်ပုံတွေကို TNLA က ထုတ်ပြန်လာတာပါ။
ဒီလို ပိတ်ပင်မှုတွေကြောင့် နမ့်ခမ်းမြို့တွင်းမှာ ကုန်ပစ္စည်းနဲ့ ဆေးဝါးရှားပါးမှုတွေ ဖြစ်ပေါ်ခဲ့ပါတယ်။
#MeKongNews
ဓာတ်ပုံ -TNLA
