တောင်ကြီးမှာ စမတ်ကတ်ပြုလုပ်ဖို့ ငွေပေးရ
မဲခေါင်၊ နိုဝင်ဘာ ၁၃
ရှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာမြို့အနီး၊ အောင်သပြေကျေးရွာမှာ စမတ်ကတ်ပြုလုပ်ဖို့ ကျပ်ငါးထောင်မှ ကျပ်တစ်သိန်းအထိ ပေးနေရတယ်လို့ သိရပါတယ်။
A4 တစ်စောင်အတွက် လူတစ်ဦးကို ကျပ် ၁၂,၀၀၀ နဲ့ အချက်အလက်မှားယွင်းတာနဲ့ ဓါတ်ပုံဆေးပျက်များအတွက် ကျပ်ငါးထောင်ကနေ ကျပ်တစ်သိန်းထိ ပေးဆောင်နေရတယ်လို့ ကျေးရွာတွင်းနေထိုင်သူတွေက ပြောပါတယ်။
စစ်ကောင်စီက ရွေးကောက်ပွဲအတွက် သန်းခေါင်စာရင်း ကောက်ခံခိုင်းပြီးနောက် အောက်တိုဘာလကတည်းက စတင်ကာကျေးရွာတွင်းနေထိုင်သူ အားလုံးကို အုပ်ချုပ်ရေးမှူးက မှတ်ပုံတင်အဟောင်းကနေ စမတ်ကတ် ပြောင်းလဲခိုင်းထားတာပါ။
“အကုန်လုံးကို ဖိအားပေးတာပေါ့၊ သူတို့က ဖိအားမပေးလည်း လူငယ်တွေအတွက်က လုပ်ကိုလုပ်ရမှာလေ၊ နိုင်ငံခြားထွက်ဖို့က ဒါပြရမယ်ဆိုတာ လိုလာပြီ၊ အဲဒါကို အုပ်ကြီးက အကွက်မြင်ပြီးတောင်းတာ” လို့ ကျေးရွာတွင်းနေထိုင်သူ တစ်ဦးက ပြောပါတယ်။
ဒါ့အပြင် စမတ်ကတ်နဲ့ မှတ်ပုံတင်ဟောင်း အချက်အလက်ကွဲလွဲရင်လည်း ဒဏ်ကြေး ကျပ်ငါးထောင်ကျပ် ပေးဆောင်ရသလိုအသက် ၆၀ ဝန်းကျင် အရွယ်တွေလည်း မှတ်ပုံတင် ဓါတ်ပုံ မထင်မရှားတာကို အကြောင်းပြပြီး တောင်ကြီးမြို့၊ လဝကရုံးအထိ ဒဏ်ကြေးသွားဆောင်နေရတယ်လို့ သူက ဆက်ပြောပါတယ်။
“အရင်ခေတ်ပုံတွေက နှစ်တွေကြာတော့ ဆေးတွေကပျောက်ပျက်၊ တချို့ကျလည်း အရင်ကတည်းက ဆေးသားမကောင်းတာ၊ အဘိုး၊ အဘွားတွေလည်း ငယ်ဘဝပုံတွေ ဘယ်ရှိတော့မလဲ၊ အသက်ကြီးမှ တုန်တုန်ချိချိနဲ့ တောင်ကြီးအထိ ဒဏ်ကြေးသွားဆောင်နေရတယ်”
အချက်အလက် လွဲမှားသူ၊ ဓါတ်ပုံပျက်စီးသူတွေကို လဝက ဝန်ထမ်းတွေက လူအခြေအနေကြည့်ပြီး ကျပ်နှစ်သောင်းမှကျပ်ငါးသောင်း၊ ကျပ်တစ်သိန်းအထိ အမျိုးမျိုး တောင်းခံနေတယ်လို့ သိရပါတယ်။
“အချက်အလက် လွဲမှားတာက သူတို့ဟာ သူတို့ပဲ ဖြစ်ပြီး သူတို့ပဲ တောင်းနေတာ၊ နည်းနည်းချမ်းသာတဲ့သူ ထိုင်းမှာ ဆေးကုရမယ့်သူဌေးတွေဆို သူတို့ ညှစ်ပြီ၊ အထဲခေါ်ပြီး တောင်းတာ” လို့ စမတ်ကတ်ပြုလုပ်ခဲ့သူ တစ်ဦးက ပြောပါတယ်။
စစ်ကောင်စီက စမတ်ကတ် လဲလှယ်ထားသူတွေကိုသာ ပြည်ပထွက်ခွင့်ပေးမယ်လို့ ဧပြီလ ၁ ရက်က ထုတ်ပြန်ပြီးနောက်ပိုင်း တောင်ကြီးမြို့နယ်တွင်း စမတ်ကတ်ပြုလုပ်သူ များပြားလာပြီး လဝကဝန်ထမ်းတွေလည်း အဲဒီအပေါ် အခွင့်ကောင်းယူကာ ငွေကြေးတောင်းခံနေတယ်လို့ ဌာနဆိုင်ရာနဲ့ နီးစပ်သူတွေဆီကနေ သိရပါတယ်။
MK-014
#MeKongNews
