လုံခြုံရေးတင်းကြပ်တဲ့ တောင်ကြီးတန်ဆောင်တိုင်ပွဲမှာ ဆိုင်ကယ်တွေပျောက်ဆုံးနေ
မဲခေါင်၊ နိုဝင်ဘာ ၁၂
ရှမ်းပြည်တောင်ပိုင်း၊ တောင်ကြီးတန်ဆောင်တိုင် ပွဲတော်မှာ စစ်ကောင်စီ လုံခြုံရေးအင်အား တင်းကြပ်ထားတဲ့ကြားက ဆိုင်ကယ်ပျောက်ဆုံးမှုတွေ ကြုံနေရတယ်လို့ ပွဲဈေးတန်း သွားရောက်သူတွေက ပြောပါတယ်။
မနေ့ည (နိုဝင်ဘာလ)က အဝေရာမီးပုံးပျံကွင်းမှာ ကျင်းပခဲ့တဲ့ တန်ဆောင်တိုင် ဖွင့်ပွဲအတွင်း ဆိုင်ကယ် အစီးရေ ၂၀ ကျော် ပျောက်ဆုံးခဲ့တယ်လို့ မဲခေါင်သတင်းဌာနရဲ့ စုံစမ်းချက်အရ သိရပါတယ်။
“တန်ဆောင်တိုင်ကွင်း 100% KTV ရှေ့မှာရပ်ပြီး ပျောက်သွားတာပါ၊ ဘေးမှာ ရဲကင်းရော အစောင့်ရော အများကြီးရှိတဲ့ကြားက ပျောက်တာပါ၊ တိုင်တော့လည်း ဘာမှ လုပ်မပေးပါဘူး” လို့ ဆိုင်ကယ်ပျောက်ဆုံးသူ တစ်ဦးက ပြောပါတယ်။
ပျောက်ဆုံးသွားတဲ့ ဆိုင်ကယ်တွေထဲမှာ စစ်ဘေးရှောင်တွေရဲ့ ပိုင်ဆိုင်မှု အများဆုံး ပါဝင်ပြီး ဆိုင်ကယ်အားလုံးဟာ လိုင်စင်ရှိဖြစ်ပေမယ့် စစ်ကောင်စီဘက်က တာဝန်ယူမှု မရှိသေးဘူးလို့ ဆိုပါတယ်။
တန်ဆောင်တိုင်ပွဲခင်းအတွင်း ဈေးဆိုင် ငါးဆိုင်ကို သုံးဦးနှုန်းနဲ့ စစ်ကောင်စီ၊ ပအိုဝ်းပြည်သူ့စစ် (PNA)တို့က လုံခြုံရေး ယူထားပြီး ပွဲခင်းဝင်ရောက်တဲ့ လမ်းတိုင်းမှာလည်း ဘန်ကာတွေ ဆောက်လုပ်ထားတယ်လို့ ဖွင့်ပွဲရက် သွားရောက်သူတွေက ပြောပါတယ်။
စစ်ကောင်စီ အနေနဲ့ လုံခြုံရေး အမြောက်အများ ယူထားခြင်းဟာ ပြည်သူပိုင် ဥစ္စာပစ္စည်း မပျောက်ပျက်ဖို့ထက် ပွဲမပျက်ရေးသာ အဓိက ဖြစ်တယ်လို့ မြို့ခံတွေက မှတ်ချက်ပေးပါတယ်။
“ ပြည်သူလုံခြုံရေး ဘာညာတာ သူတို့ ထည့်မတွက်ဘူး၊ရုတ်ရုတ်သဲသဲ ဖြစ်လာရင်တောင် ပြည်သူကို ကာကွယ်ဖို့ထက် သူတို့ ပွဲမပျက်အောင်ပဲ ထိန်းမှာ” လို့ လွတ်မြောက်နယ်မြေရောက် မီးဆရာ တစ်ဦးက သုံးသပ်ပါတယ်။
စစ်အာဏာသိမ်းပြီးနောက်ပိုင်း တောင်ကြီးမြို့တွင်း ပွဲတော်ရက် မဟုတ်တဲ့ သာမာန်အချိန်တွေမှာ တစ်ပတ်ကို ပျမ်းမျှ ဆိုင်ကယ် နှစ်စီးနှုန်းနဲ့ ပျောက်ဆုံးနေပြီး စစ်ကောင်စီ လက်အောက်ခံ ရဲတပ်ဖွဲ့က ဖမ်းဆီးဖော်ထုတ်တာ မရှိသေးဘူးလို့ မြို့ခံတွေဆီက သိရပါတယ်။
ဓါတ်ပုံ။ ဒေသခံပေးပို့တဲ့ တန်ဆောင်တိုင်ပွဲလုံခြုံရေးဘန်ကာ
MK-014
