မဲခေါင်၊ စက်တင်ဘာ ၂၅
ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်တွင်းမှာ စားသောက်ကုန် ပစ္စည်းတွေ အများအပြား ဝယ်ယူခွင့်ကို စစ်ကောင်စီက ပိတ်ပင်လိုက်တယ်လို့ ဒေသခံတွေက ပြောပါတယ်။
ဆီဆိုင်မြို့နယ်တွင်းက ကျေးရွာတွေနဲ့ မြို့ပေါ်ရပ်ကွက်တွေအားလုံး အကျုံးဝင်မှာဖြစ်ပြီး တဆင့်ပြန်လည် ရောင်းချတဲ့ ကုန်သည်တွေက အခက်အခဲ ဖြစ်နေကြတယ်လို့ ဆိုပါတယ်။
“PDF ထောက်ပံ့မှာစိုးလို့တဲ့။ ရွာဖက်က လူတွေက ဆီဆိုင်မြို့ပေါ်မှာပဲ ဝယ်ရောင်းကြတယ်လေ။ ပြန်ရောင်းဖို့တောင် မရဘူးဆိုတော့ ဘယ်လို လုပ်ရတော့မလဲ” လို့ ဒေသခံ ကုန်သည်တစ်ဦးက ပြောပါတယ်။
စစ်ကောင်စီပိတ်ပင်တဲ့ အထဲမှာ စားသောက်ကုန် အပါအဝင် စက်သုံးဆီနဲ့ အဝတ်ထည်တွေလည်း ပါဝင်ပြီး ဓါတ်ဆီကိုတော့ ပုလင်းနဲ့သာ ဝယ်ခွင့်ပြုတယ်လို့ သိရပါတယ်။
လတ်တလောမှာ စစ်ကောင်စီ ပိတ်ပင်မှုကြောင့် အလှမ်းဝေးတဲ့ ကျေးရွာတွေက မြို့ပေါ်သွားတဲ့လူတွေကို ပစ္စည်းမှာလို့ မရတော့တာ၊ လျှပ်စစ်မီး ပြတ်တောက်တဲ့အချိန်မှာ မီးစက်မောင်းဖို့ စက်သုံးဆီ ဝယ်လို့မရတာ၊ ရေဘေးထောက်ပံ့ရေးအတွက် တောင်ကြီးမြို့အထိ တက်ဝယ်ရတာ စတဲ့အခက်အခဲတွေ ကြုံတွေ့နေရပါတယ်။
ဩဂုတ်လ ၁၃ ရက်နေ့ကလည်း ဆီဆိုင်မြို့အဝင် စစ်ဆေးရေးဂိတ်မှာ ကုန်သည် ၃ ဦးဆီ လူကြုံမှာလို့ ဝယ်လာတဲ့ အရက်ဘီယာတွေကို လိုင်စင်မရှိဘူးလို့ အကြောင်းပြကာ သိမ်းဆည်းသွားခဲ့ဖူးပါတယ်။
MK-014
