မဲခေါင်၊ စက်တင်ဘာ ၂
ရှမ်းတောင်၊ ညောင်ရွှေမြို့နယ်၊ စံကားဒေသ၊ လွယ်လုံရွာမှာ PNO က PDFနဲ့ ပါတ်သတ်တယ်ဆိုပြီး ဖမ်းဆီးသွားတဲ့ရွာသား ၇ ဦးမှာ ၆ ဦး ပြန်လွတ်လာပြီး အသက် ၆၂ အရွယ် ဦးဆောင် ဆိုသူမှာတော့ PNO ရဲ့ ရိုက်နှက်မှုကြောင့် သေဆုံးသွားခဲ့ပြီလို့ သိရပါတယ်။
ညောင်ရွှေမြို့နယ်၊ စံကားဒေသမှာ စစ်ကောင်စီနဲ့ စစ်တပ်လက်အောက်ခံ PNO တွေနဲ့တော်လှန်ရေးတပ်ဖွဲ့တို့ ဇူလိုင်လအတွင်း တိုက်ပွဲဖြစ်ပွားပြီးနောက် လွယ်လုံရွာသား ၇ ဦးကို PNO ပြည်သူ့စစ်က PDF တွေလို့ စွပ်စွဲပြီး ဖမ်းဆီးသွားခဲ့ရာက ဦးဆောင်ဆိုသူ အဖိုးအို သေဆုံးသွားခဲ့ရတာပါ။
ပြီးခဲ့တဲ့ဇူလိုင်၁၈ရက် တိုက်ပွဲတွေဖြစ်ပြီး ၄ ရက်မြောက်နေ့ ဇူလိုင် ၂၁ ရက် နေ့လယ် ၁နာရီခန့်မှာ အိမ် ၃ အိမ်က ရွာသား၇ ဦးကို ဖမ်းဆီးသွားတာလို့ သိရပါတယ်။
ဖမ်းဆီးခံရသူတွေဟာ အိုက်တို ၂၁နှစ်၊ အိုက်ဟတ် ၂၁နှစ်၊ အိုက်တူ၂၂နှစ်၊ အိုက်ပယ် ၂၂နှစ်၊ အိုက်မူ ၂၆ နှစ်၊ ကျော့ကျေ ၂၂နှစ်နဲ့ဦးဆောင် ၆၂နှစ် တို့ဖြစ်တယ်လို့ သိရပါတယ်။
PNOရဲ့ဖမ်းဆီးခံရာက ပြန်လွတ်လာသူတွေရဲ့ပြောပြချက်မှာ သူတို့စီးလာတဲ့ဆိုင်ကယ် ၄ စီးနဲ ဖုန်း၆လုံးကို သိမ်းသွားကာ ၂ယောက်တစ်တွဲ လက်ထိပ်ခတ်ခေါ်သွားပြီး ရိုက်နှိက်ညှင်းပန်း နှိပ်စက်ခံကြရတယ်လို့ပြောပါတယ်။
ဖမ်းဆီးခံနေရစဥ် ခေါင်းကိုသေနတ်နဲ့ထုတာ၊ ထမင်းမကျွေး ရေမတိုက်တာ၊ စောင်ကို ရေလောင်းပြီး အိပ်ခိုင်းတာတွေခံခဲ့ရလို့ အသက်ကြီးတဲ့ ဦးဆောင် သေဆုံးရတာလို့သိရပါတယ်။
ဖမ်းဆီးခံရသူတွေကို ငွေကျပ်သိန်း ၃၀၀ နဲ့ရွေးခိုင်းတာမှာ မိသားစုတွေ မတတ်နိုင်လို့ တစ်လကျော်ကြာမှ သိန်း၂၀စီနဲ့ ပြန်ရွေးလို့ သြဂုတ်လ ပထမပတ်အတွင်းမှာ ပြန်လွတ်မြောက်လာတာလို့ သိရပါတယ်။
ဦးဆောင် သေဆုံးတာကိုတော့ သြဂုတ်လနောက်ဆုံးပတ်ထဲကျမှ မိသားစုတွေ သိရတယ်လို့ဆိုပါတယ်။
စစ်ကောင်စီလက်အောက်ခံ PNO ပြည်သူ့ စစစ်ရဲ့ မတရားဖမ်းဆီးရိုက်နှက်ခံရမှုကြောင့် သေဆုံးသွားခဲ့ရတဲ့ ဦးဆောင်အပါအဝင် လူငယ် ၆ ဦးတို့ဟာ PDF တပ်ဖွဲ့ဝင်တွေမဟုတ်ဘဲ တောင်သူတွေသာ ဖြစ်တယ်လို့သိရပါတယ်။
လက်ရှိ အင်းလေးအရှေ့ဘက်ကမ်း စံကားဒေသမှာ တိုက်ပွဲတွေ ငြိမ်သက်နေပေမယ့် စစ်ကောင်စီက အင်အားတွေဖြည့်နေပြီး အချိန်မရွေးတိုက်ပွဲတွေ ပြန်ဖြစ်နိုင်လို့ အနီးရွာတွေက စစ်ရှောင်တချို့ ရွာမပြန်ရဲကြသေးဘဲ စစ်ရှောင်နေဆဲဖြစ်ကာ စားနပ်ရိက္ခာနဲ့ဆေးဝါးတွေ လိုအပ်နေတယ်လို့ စစ်ရှောင်စခန်းတွေက သိရပါတယ်။
MK-012
