မဲခေါင်၊ ဩဂုတ် ၁၆

ရှမ်းပြည်တောင်ပိုင်း၊ တောင်ကြီးမြို့ကနေ တခြားမြို့တွေကို ပြေးဆွဲနေတဲ့ လိုင်းကားတွေ လာမယ့်တစ်ပတ်အတွင်း ကားခဈေးတက်တော့မယ်လို့ ဂိတ်မှူးတွေက ပြောပါတယ်။

တောင်ကြီးမြို့ကနေ ညောင်ရွှေ၊ ကလော၊ အောင်ပန်း၊ ပင်လောင်း၊ ဆီဆိုင်မြို့တွေကို ပြေးဆွဲနေတဲ့ ကားတွေဟာ စက်သုံးဆီ အခက်အခဲကြောင့် ကားခ တစ်ထောင်ကျပ် ဝန်းကျင်ခန့် ဈေးတက်မယ်‌လို့ ဆိုပါတယ်။

“အရင်က ၅၀၀ တက်ဖို့ တော်တော်စဉ်းစားရတယ်။ အခုက ၅၀၀ ဆိုတာဘာမှ မရတော့ဘူးလေ။ ဗိုက်ဆာရင်တောင် ခေါက်ဆွဲတစ်ထုပ် မရတော့ဘူး။ ကွမ်းယာဖိုးတောင် မရတော့ဘူး။ တစ်ထောင်တော့ စဉ်းစားထားတယ် အဲတာတောင် မကိုက်သေးဘူး” လို့ ပြောပါတယ်။

အလားတူ တောင်ကြီးမြို့ကနေ မိုင်းကိုင်၊ ပင်လုံ၊ လွိုင်လင်၊ ကာလိ၊ လင်းခေး စတဲ့မြို့တွေကို ပြေးဆွဲနေတဲ့ ယာဉ်ငယ်လိုင်း(အန်စာတုံး)တွေမှာလည်း ၅ ထောင်ကျပ် တိုးမြှင့်ကောက်ခံမယ်လို့ ဆိုပါတယ်။

ကားခဈေးတက်တာဟာ ယာဉ်မောင်းတွေအနေနဲ့ စက်သုံးဆီ တန်းစီတိုးရတာ၊ မှောင်ခိုကနေ ဈေးကြီးဝယ်သုံးရတာတွေကြောင့် ဖြစ်ပြီး စက်သုံးဆီအလွယ်တကူ ဝယ်လို့ရတဲ့အချိန်ရောက်ရင်တော့ ကားခကို ဈေးပြန်ချပေးမယ်လို့ ယာဉ်မောင်းတွေက ပြောပါတယ်။

တောင်ကြီးမြို့မှာ ကားခတွေ ဈေးတက်ပေမယ့် ညောင်ရွှေ – အင်းလေး စက်လှေပြေးဆွဲနေသူတွေကတော့ လှေအပိုင် မရှိသူတွေသာ ခေတ္တရပ်နားထားပြီး စက်လှေခတက်ဖို့ မရှိသေးဘူးလို့ ဆိုပါတယ်။

လက်ရှိ တောင်ကြီးမြို့မှာ ဆီပန့် ၃ ဆိုင်ကသာ အချိန်အကန့်သတ်နဲ့ ရောင်းချပေးနေပြီး ဝယ်ယူသူတွေက မနက် ၄ နာရီကတည်းက တန်းစီရတယ်လို့ စုံစမ်း သိရပါတယ်။

MK-015

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)