မဲခေါင်၊ ဇူလိုင်လ ၂၈
စစ်ကောင်စီတပ်နဲ့ ကိုးကန့်တပ်တွေ တိုက်ပွဲပြင်းထန်နေတဲ့ လားရှိုးမြို့ထဲကို မနေ့ ဇူလိုင်လ ၂၇ ရက်နေ့ မှာ UWSA တပ်ဖွဲကတွေဝင်ရောက်လာတာဟာ ‘၀’ ပြည်ဆက်ဆံရေးရုံးတွေနဲ့ ပိုင်ဆိုင်မှုတွေကို ကာကွယ်ဖို့အတွက်လို့ဆိုပါတယ်။
လားရှိုးမြို့တိုင်းရင်းသားပေါင်းစုံရဲ့လိုလားချက်အရ လားရှိုးမြို့နယ်က ‘ဝ’ ပြင်ပ ဆက်ဆံရေးရုံးတွေနဲ့ ပိုင်ဆိုင်မှုတွေကို ကာကွယ်ဖို့ UWSA လုံခြုံရေးတပ်ဖွဲ့တွေကို လားရှိုးမြို့ထဲ ဇူလိုင်လ ၂၇ ရက်က ဝင်ရောက်ခဲ့တာလို့ UWSA ပြင်ပဆက်ဆံရေးမှူး ဦးညီရမ်းက ဒီနေ့ ဇူလိုင်လ ၂၈ ရက် မနက်မှာ မဲခေါင်သတင်းဌာနကို ပြောပါတယ်။
“လားရှိုးမြို့တွင် တပ်စွဲထားတဲ့ `၀’ လုံခြုံရေးတပ်ဖွဲ့တွေအနေနဲ့ တိုက်ပွဲဖြစ်ပွားနေတဲ့ အဖက်ဖက်တို့ကို ဝင်ရောက်စွက်ဖက်ခြင်း၊ ပူးပေါင်းခြင်းနဲ့ ပံ့ပိုးပေးခြင်းများကို လုပ်ဆောင်မှာ မဟုတ်ဘူး” လို့ မဲခေါင်က ဆက်သွယ်မေးမြန်းတာကို ဖြေကြားပါတယ်။
အင်အားဘယ်လောက်ဆိုတာ မပြောပေမယ့် မြို့ကိုမဝင်မီမှာ တိုက်ပွဲဖြစ်ပွားနေတဲ့ အဖက်ဖက်တို့ကို အကြောင်းကြားခဲ့ပြီး ၄င်းတို့ရဲ့ သဘောတူညီချက်နဲ့ အဆင်ပြေစွာ ဝင်ရောက်ခဲ့တာဖြစ်သလို လားရှိုးမြို့နဲ့တစ်နိုင်ငံလုံးငြိမ်းချမ်းရေးရစေဖို့ကို ၀ပြည်နယ်က မျှော်လင့်တယ်လို့ ဦးညီရမ်းက ပြောပါတယ်။
ဒီလို လားရှိုးကို UWSA တပ်ဖွဲ့တွေဝင်ဖို့ တရုတ်ဘက်ကိုလည်း အကြောင်းကြားထားတယ်လို့ မြောက်ပိုင်းအဖွဲ့တွေနဲ့ နီးစပ်တဲ့ သတင်းရင်းမြစ်က ပြောပါတယ်။
ပြီးခဲ့တဲ့ ရက်ပိုင်းက UWSA တပ်တွေ ဝင်ရောက်တပ်စွဲထားတဲ့ တန့်ယန်းမြို့ကို UWSA တပ်ဖွဲ့ဝင်တွေ ကား အစီး ၂၀ လောက် အင်အားထပ်ဖြည့်လာတာရှိခဲ့ပြီး အဲဒီထဲက အင်အား ၅၀၀ လောက်ဟာ လားရှိုးကို ဝင်လာတာ ဖြစ်နိုင်ကြောင်း နီးစပ်သူတွေက သုံးသပ်ပါတယ်။
လက်ရှိမှာ MNDAA နဲ့ ပူးပေါင်းမဟာမိတ်အဖွဲ့တွေဟာ လားရှိုးအကျဉ်းထောင်ကို ထိုးစစ်ဆင်နေတယ်လို့ သိရပါတယ်။
MK – 012
