မဲခေါင်၊ ဇူလိုင် ၂၄
ရှမ်းတောင်၊ အင်းလေးဒေသမှာ စစ်အာဏာရှင်အမြစ်ပြတ်ရေးတိုက်ပွဲဝင်နေတဲ့ အင်းလေးပြည်သူ့ကာကွယ်ရေးတပ်ရင်း အမှတ်-၁၀၀၉ IPDF ဟာ စစ်ရေးလိုအပ်ချက်အရ စစ်ကြောင်းသုံး ဘရောင်နီ စက်သေနတ် လိုအပ်နေတယ်လို့ သိရပါတယ်။
ယင်းအတွက် ဘရောင်နီကိုထမ်း ရှေ့ဆက်လှမ်းကမ်ပိန်းကို ယနေ့ဇူလိုင်လ ၂၄ ရက်ကနေ လာမယ့် အောက်တိုဘာ ၅ ရက် အထိ ကျပ်သိန်း ၆၀၀ ရန်ပုံငွေ ကမ်ပိန်းပြုလုပ်သွားမယ်လို့ ကြေညာပါတယ်။
“တိုက်ပွဲတစ်ပွဲ ဖော်ဆောင်ရာမှာ ဗျူဟာမြောက်လက်နက်ဖြစ်တဲ့ ဘရောင်နီ စက်လတ်လိုအပ်နေတာပါ၊ တိုက်ပွဲကို ထိန်းနိုင်ဖို့၊ ရန်သူကို အဟန့်အတားဖြစ်စေဖို့ ဒီဘရောင်နီစက်လတ် ကမ်ပိန်းကို လုပ်ရခြင်းဖြစ်ပါတယ်” လို့ အင်းလေး ၁၀၀၉ IPDF တာဝန်ခံက မဲခေါင်ကိုပြောပါတယ်။
တိုက်ပွဲရဲ့အနေအထားအရကတော့ လက်နက်ကြီး၊ လက်နက်ငယ်၊ ၊ 79 , RPG ၊ စက်ကြီး၊ စက်လတ်၊ စက်ကလေး ရှိဖို့လိုအပ်တာမှာစစ်ကြောင်းလက်နက်ဖြစ်တဲ့ ဘရောင်နီ စက်လတ် ကို ရရှိဖို့ ကြိုးစားရတာလို့ ပြောပါတယ်။
ယင်း ဘရောင်နီစက်လတ်မှာ လေယာဉ်၊ ဒရုန်းတွေကို ပစ်ချနိုင်စွမ်းထက် တိုက်ပွဲအတွင်း ကျည်အားနဲ့ရန်သူကို ခုနှိမ်ထားနိုင်တဲ့ အစွမ်းရှိ လက်နက် ၁ခုဖြစ်ပြီး ၇.၆၂ ကျည်အတိုနဲ့ ပစ်ခတ်ရတာလို့ သိရပါတယ်။
ဒီကမ်ပိန်းအရင်ပြုလုပ်ခဲ့တဲ့ ဦးထုပ်ကမ်ပိန်းကြောင့် ရရှိလာတဲ့ ဦးထုပ်ဟာ ပြီးခဲ့တဲ့ အင်းလေးဒေသကိုပြန်လည်ထိုးဖောက်ဝင်ရောက်ချိန် စကစ ဘက်က ၁၂၀ မမ ပစ်ခတ်တာမှာ ကျည်စဟာ ဦးထုပ်ကို မဖောက်ထွင်းနိုင်လို့ ရဲဘော်တစ်ယောက်ရဲ့အသက်ကိုကာကွယ်ပေးနိုင်ခဲ့တာဖြစ်လို့ အလှူရှင်တွေကို အသက်သခင်ကျေးဇူးရှင်တွေအဖြစ် အထူးကျေးဇူးတင်ရှိကြောင်းလဲ ပြောကြားခဲ့ပါတယ်။
ယခု ဘရောင်နီကိုထမ်း ရှေ့ဆက်လှမ်းကမ်ပိန်းကိုလည်း မဲ ၁ စောင်ကို ကျပ် ၂ သောင်းနဲ့ မဲအစောင်ရေ ၃၀၀၀ စုစုပေါင်း ကျပ်သိန်း ၆၀၀ ရရှိဖို့ တော်လှန်ပြည်သူတွေကူညီပံ့ပိုးပေးပါရန်နဲ့ ကျေးဇူးတုံ့ပြန်တဲ့အနေနဲ့ အမှတ်တရပစ္စည်းလေးတွေ မဲဖောက်ပေးမှာ ဖြစ်တယ်လို့ သိရပါတယ်။
အင်းလေး ၁၀၀၉ IPDF ဟာ NUG လက်အောက်ခံ MOD တပ်ရင်း ၁ရင်းဖြစ်ပြီး လက်ရှိမှာ ညောင်ရွှေ၊ ဖယ်ခုံမြို့နယ်တွေမှာ စစ်ကောင်စီနဲ့ PNA တွေကို တော်လှန်တိုက်ခိုက်နေတဲ့ အင်းလေးဒေသအခြေပြု တိုင်းရင်းသားတပ်ဖွဲ့ တစ်ဖွဲ့ဖြစ်ပါတယ်။
MK-012
