မဲခေါင်၊ ဇူလိုင် ၁၆
တောင်ကြီးမြို့ အစွန်အဖျားနေရာတွေက ကျူးကျော်နေသူတွေကို ၁၅ ရက်အတွင်း ဖယ်ဖို့ စစ်ကောင်စီ လက်အောက်ခံ ထွေအုပ်၊ သစ်တောနဲ့ စည်ပင်တို့က စာတွေ လိုက်ကပ်ထားတယ်လို့ တောင်ကြီးဒေသခံတွေဆီက သိရပါတယ်။
တောင်ကြီး ထွေအုပ်က ဇူလိုင်လ ၁၃ ရက် ကထုတ်တဲ့စာမှာ ခွင့်ပြုချက်မရှိဘဲ အစိုးရမြေပေါ် ကျူးကျော်ဝင်ရောက်နေထိုင်သူတွေကို ၁၅ ရက် အတွင်းထွက်သွားရမယ်လို့ သတိပေးစာတွေကို အကျုံးဝင်တဲ့အိမ်တွေနဲ့ ဆင့်ခေါ်စာတွေ ပေးပို့ထားတယ်လို့ သိရပါတယ်။
“သစ်တောမြေကျူးကျော်ဆိုပြီး စာတွေသာ လိုက်ကပ်တာ သူတို့ တကယ်လုပ်မှာက စစ်တပ်အတွက် ဗျူဟာကုန်းလုပ်ဖို့ပဲ၊ ဗျူဟာကုန်းကို ၂ ဆင့်လုပ်မယ်၊ ပထမအဆင့်က အများပြည်သူတွေ တောင်ပေါ် စက်ဘီးစီး၊ လမ်းလျှောက်တဲ့နေရာတွေ၊ Mount Pleasant Hotel ကို အထိုင်ထားပြီးလုပ်မှာ၊ ဒုတိယအဆင့်ကတော့ စာကပ် ဆင့်ခေါ်ခံရတဲ့ ရပ်ကွက် တချို့ရဲ့ နေရာတွေမှာလုပ်မှာ၊ အဓိကတော့ သိမ်းခံရမယ့်သူတွေက အမြန်ပြန်ရောင်းနေကြတာကို မသိတဲ့ လူတွေ ဝယ်မိမှာ စိုးလို့ သတိပေးရတာပါ”လို့ ဆင့်စာရရှိခဲ့တဲ့ ဒေသခံ ၁ ဦးက မဲခေါင်သတင်းဌာနကို ပြောပါတယ်။
တောင်ကြီးမြို့ရဲ့ စဝ်စံထွန်းရပ်ကွက်၊ ရတနာသီရိ၊ ချမ်းမြ၊ ရွှေတောင်၊ စိန်ပန်း၊ ကံသာ၊ ကျောင်းကြီးစု ၊ ညောင်ဖြူစခန်း အနောက်ဘက်ခြမ်း အစွန်အဖျားကျတဲ့ ရပ်ကွက်တွေထဲက နယ်မြေ ဧက ၂၀၀၀ ကျော်ကို သစ်တောမြေအဖြစ် သတ်မှတ်ပြီး ကျုးကျော်အဖြစ် သတ်မှတ်ထားခြင်းဖြစ်ပါတယ်။
သစ်တော ကျူးကျော်ဧရိယာကို တောင်ကြီး ရွှေညောင်ဘက်အဆင်း ကရင်မရေထွက် အောက်ဖက် ဆင်နှစ်ကောင်ဖက်က စတင်မယ်လို့သိရပြီး အဆုံးမှာ ကျောင်းကြီးစုရပ်ကွက်ထဲက ဖရဲ အနောက်ဘက်ခြမ်း၊ လယ်ငယ်ဘက်မှာဆုံးမယ်လို့ သိရပါတယ်။
ကောင်းစံကိုယ်ပိုင်ကျောင်းကနေ အောက်ဘက် ဓါတ်ဆီဆိုင်လေးရဲ့ အနောက်ဘက် တကြောလုံး ကားလမ်းနဲ့ကပ်နေတဲ့အိမ်တွေပါမှာဖြစ်ပြီး စက်မှုဇုန်ဘက်ဆင်းတဲ့ မြို့ရှောင်လမ်း အဝိုင်းပတ် တကြောနဲ့ရွှေသူဌေးကုန်းဘက် အစွန်အဖျားတွေ၊ မုံတဝဂူကို လှမ်းမြင်ရတဲ့ အကွက်တွေ ပါမယ်လို့ သိရပါတယ်။
စဝ်စံထွန်းရပ်ကွက်လို့ သတ်မှတ်တဲ့ စ/(စ/) မပါရင် မြေမဝယ်ဖို့ ကျူးကျော်မြေတွေရဲ့ ပေါက်စျေးက ကျပ်သိန်း ၂၀၀/၃၀၀ ဖြစ်ပြီး အဆိုပါမြေတွေကို ရောင်းခဲ့တဲ့ ဦးမောင်ဆိုသူ ၁ ဦးထဲဖြစ်ပြီး PNO က ခွန်ကျော်ဆန်း ရဲ့ အကွက်တွေပါဝင်လို့ အရင်ကျပ် သိန်း ၇၀၀ ခေါ်ထားတဲ့ အခု သိမ်းခံရမည့်ထဲပါတဲ့ အကွက်ကို စျေးလျှော့ရောင်းနေတယ်လို့ သိရပါတယ်။
“ကျမတို့ ဝယ်ထားတာ လွန်ခဲ့တဲ့ ၅ နှစ်ကတည်းက၊ ပုံစံ-၁၀၅ လဲရှိတယ်၊ ခု အိမ်လဲဖျက်ခံရမယ်၊ မြေလဲသိမ်းခံရမယ်ဆိုတော့ ကျောင်းနေတဲ့သားသမီးတွေ၊ ကလေးတွေနဲ့ အလုပ်အကိုင်ကရှား၊ ငွေကမရှိ၊ ခုတိုင်းပြည်အခြေအနေနဲ့ ဘယ်မှာ ဘယ်လိုသွားနေရမှာကိုစဉ်းစားမရလို့ခေါင်းမီး တောက်နေတယ်”လို့ ညောင်ဖြူစခန်း ရပ်ကွက်မှာနေထိုင်သူ ၁ ဦးက ပြောပါတယ်။
စစ်ကောင်စီက ဖယ်ရှားခိုင်းသည့်နေရာတွေမှာ နေထိုင်တဲ့ ပြည်သူ ထောင်ကျော် ရှိနေပြီး အိမ်ပေါင်း ရာနဲ့ချီ ဖျက်ဆီးခံကြရမှာဖြစ်လို့ အမိန့်စာပါ ၁၅ ရက်အတွင်း ပြောင်းရွှေ့ကြဖို့ မလွယ်ကူတဲ့အပြင် လက်ရှိ စီးပွားရေးတွေခက်ခဲနေကြတဲ့အချိန်မှာ ခုလို ပြည်သူတွေအပေါ် ငဲ့ညှာခြင်းမရှိ ရက်စက်တဲ့လုပ်ရပ်ကိုလုပ်ရက်တဲ့ စစ်ကောင်စီဆိုပြီး ဝေဖန်နေကြတယ်လို့ သိရပါတယ်။
ဒေသန္တရ အချက်အလက်တွေအရ တောင်ကြီးမြို့ပေါ်မှာ နေထိုင်သူ လူဦးရေ ၄ သိန်းနီးပါးရှိပြီး အိမ်ထောင်စုပေါင်း ၃ သိန်းခွဲကျော်ရှိရာမှ အခု သစ်တောမြေဆိုပြီး ဖယ်ခိုင်းခံရတဲ့ ပြည်သူ ၁ သောင်းကျော်ရှိမည်ခန့်မှန်းပြီး အိမ်ခြေ ၁ ထောင်ကျော် ဖျက်ဆီးခံရမှာဖြစ်ကာ မြေဧကပေါင်း ထောင်ချီ ဆုံးရှုံးကြရမှာ ဖြစ်တယ်လို့ သိရပါတယ်။
MK-012
