မဲခေါင်၊ ဇူလိုင် ၅
ရှမ်းမြောက်၊ ကျောက်မဲမြို့နယ်အတွင်း မဟာမိတ်တပ်ဖွဲ့တွေဖြစ်တဲ့ TNLA နဲ့ SSPP တို့ နေရာ ၃ နေရာမှာ ထိတွေ့မှုဖြစ်ပြီး အမျိုးသမီး ၁ ဦး ဒဏ်ရာရတာရှိခဲ့တယ်လို့ မြေပြင်သတင်းအရ သိရပါတယ်။
ယနေ့ ဇူလိုင်လ ၅ ရက် နေ့လည် ၂နာရီလောက်မှာ ကျောက်မဲတောင်ဘက် ၁၄ မိုင်ခန့်အကွာ ပြည်ထောင်စုကားလမ်းမနဲ့ ရထားလမ်းအနီး မန်ဟဲမှာ TNLA နဲ့ SSPP တပ်ဖွဲ့တွေ အချင်းများပြီး ပစ်ခတ်မှုရာက ဒေသခံ အမျိုးသမီး ၁ ဦး ဒဏ်ရာရတာရှိခဲ့တယ်လို့ ဆက်သွယ်ပြောစေလိုပါတယ်။
“နေရာပိုင်ဆိုင်မှု အချင်းများကြရာက ပစ်ကြခတ်ကြတာလို့ သိရတယ်၊ အမျိုးသမီး ၁ ဦး ဒဏ်ရာရတယ်ဆိုတာပဲသိရပြီး အသေးစိတ်မသိရဘူး၊ ရှေ့ ၂ ရက်လောက်ကတည်းက ဒီနေရာ ငါတို့အပိုင် ဘာညာ စကားများကြတာ ရှိတယ်၊ အဲတုန်းက ပုခုံးချင်းတိုက်ငြင်းကြတာပဲ သိရတာ၊ ခုက လက်နက်ငယ်တွေပါလာတာ၊ လက်နက်ကြီးသံတော့ မကြားမိဘူး၊ အဓိကက ရှမ်းကို ပလောင်က နှင်ထုတ်တာ၊ ဖြစ်တာတော့ခဏပဲ၊ ခုတော့ မကြားပြန်ဘူး”လို့ ကျောက်မဲဒေသခံ တစ်ဦးက မဲခေါင်သတင်းဌာနကို ပြောပါတယ်။
ကျောက်မဲမြို့က ၁၀ မိုင်ခန့်အကွာ သီပေါနယ်အပိုင်းထဲက ပြည်ထောင်စုကားလမ်းမကြီးကို ခွတည်ထားတဲ့ ရေပူစမ်းရွာမှာလဲ TNLA နဲ့ SSPP ထိတွေ့ပစ်ခတ်တာတွေ ရှိခဲ့ပြီး ကျောက်မဲမြို့ရဲ့ အနောက်ဘက် ၁၅ မိုင်ခန့်အကွာ နောင်ပိန်မှာလည်း TNLA နဲ့ SSPP နယ်မြေအပေါ် အချင်းများမှုတွေ ရှိခဲ့တယ်လို့သိရပါတယ်။
ဇွန်လ ၂၅ ရက် တကျော့ပြန်စတင်ခဲ့တဲ့ ၁၀၂၇ စစ်ဆင်ရေး အပိုင်း ၂ မတိုင်မီက ယခု အချင်းဖြစ်ပွားရာနေရာဒေသတွေဟာ SSPP ဆက်ကြေးကောက်ရာနယ်မြေတွေဖြစ်ခဲ့ပြီး ပြည်ထောင်စုကားလမ်းမကြီးရဲ့တောင်ဘက်ကို SSPP ၊ မြောက်ကို TNLA လို့ သတ်မှတ်ထားရာက အခုမှာSSPP ကို TNLA တပ်တွေက မောင်းထုတ်နေတာလို့ ဒေသသတင်းတွေအရ သိရပါတယ်။
တိုက်ပွဲဖြစ်ပွားခဲ့တဲ့ အခြေအနေကို ပိုမိုသိရှိနိုင်ဖို့ တအာင်းတပ်ဖွဲ့ (TNLA) နဲ့ ရှမ်းလက်နက်ကိုင် (SSPP) ပြောရေးဆိုခွင့်ရှိသူတွေထံ မဲခေါင်သတင်းဌာနက ဖုန်းဆက်သွယ်ပေမယ့် ဆက်သွယ်လို့ မရရှိခဲ့ပါဘူး။
မဟာမိတ် TNLA နဲ့ SSPP တပ်ဖွဲတွေ စစ်ရေးပဋိပက္ခ ဖြစ်ပွားလာလို့ မနက်ပိုင်းက သီပေါကနေကျောက်မဲဘက်ကို ဆက်သွယ်ထားတဲ့ ကျင်သီတံတားကို သွားလာခွင့်ပိတ်လိုက်လို့ သီပေါနဲ့ ကျောက်မဲကြား ဆက်သွယ်ရေး ပြတ်တောက်သွားပြီဖြစ်လို့ ခရီးသွားချင်းသူတွေ ခက်ခဲသွားပြီဖြစ်တယ်လို့ သိရပါတယ်။
TNLA တပ်ဖွဲ့တွေဟာ ၁၀၂၇ စစ်ဆင်ရေး အပိုင်း ၂ကို ဖော်ဆောင်ရာမှာ ကျောက်မဲ၊ သီပေါ၊ နောင်ချို မြို့တွေကို အပြင်းအထန်တိုက်ခိုက်နေပေမယ့် SSPP ကတော့ အခြား ရှမ်းလက်နက်ကိုင်တပ်ဖွဲ့ဖြစ်တဲ့ RCSS နဲ့ပဲ စစ်ရေးပဋိပက္ခ တွေ ဖြစ်နေတဲ့ ရှမ်းပြည်နယ်တောင်ပိုင်း ဝမ်ဟိုင်းအခြေစိုက် ရှမ်းလက်နက်ကိုင်တပ်ဖွဲ့ တစ်ဖွဲ့ဖြစ်ပါတယ်။
MK-012
