မဲခေါင်၊ ဇူလိုင် ၃

ဂေါ်ဖီအများဆုံးစိုက်ပျိုးတဲ့ ပင်လောင်းဒေသမှာ ဒီနှစ်အတွင်း တိုက်ပွဲတွေဖြစ်ပွားနေတာကြောင့် စိုက်တောင်သူနည်းပါးပြီး ဝယ်လိုအားများနေတာကြောင့် ဂေါ်ဖီဈေးနှုန်းမြင့်တက်နေတာလို့ ကုန်စည်ဒိုင်တွေဆီက သိရပါတယ်။

မိုးရာသီဖြစ်တဲ့အတွက် ကုန်အပျက်အစီးရာခိုင်နှုန်းက ပိုများလာတဲ့အတွက် ပစ္စည်းကောင်းတွေဟာ စျေးပိုရလာပြီး ဈေးအဆမတန်မြင့်တက်နေတာပါ။

ရှမ်းပြည်တောင်ပိုင်းကထွက်ရှိတဲ့ ဂေါ်ဖီထုပ်တွေဟာ ယခုလပိုင်းအတွင်း ရန်ကုန်စူပါမားကတ်မှာ တစ်ထုပ် ၁၀၀၀၀ ကျပ်နှုန်းနဲ့ ဝယ်ယူနေရတဲ့ အခြေအနေမျိုးရှိနေတယ်လို့ ပွဲရုံနဲ့ နီးစပ်တဲ့သူတွေဆီကနေ သိရပါတယ်။

“ပစ္စည်းရှားချိန်ဆို ပစ္စည်းရချင်တဲ့သူတွေက စျေးအပြိုင်ပေးလာကြတယ်။ အဲ့မှာ စျေးအမြင့်ဆုံးလေလံဆွဲသလို ပေးရင်းတက်လာတာ။ ဒီနှစ်ကတော့ ရန်ကုန်က ဖြုန်းအားများတယ်” လို့ ပွဲရုံလုပ်ငန်းရှင်တစ်ဦးက ပြောပါတယ်။

လက်ရှိ ဒေသအသီးသီးမှာတော့ ၈၀၀၀-၁၀၀၀၀ ပေါက်စျေးတွေနဲ့ ရောင်းဝယ်နေကြပေမယ့် စိုက်ပျိုးတောင်သူတွေအနေနဲ့ကတော့ ၂၅၀၀ – ၃၀၀၀ အဝယ်နှုန်းသာရနေတယ်လို့ ဆိုပါတယ်။

“ကျမတို့စိုက်တုန်းက တစ်ဧကစိုက်တာ။ ၅ သောင်းပဲရလို့ မျိုးဖိုးတောင်မရဘူး။ ရှုံးခဲ့ရတာတွေအတွက်လည်း တောင်သူတွေကို ပြန်ကာမိစေချင်တယ်” လို့ စိုက်ပျိုးတောင်သူတစ်ဦးက ပြောပါတယ်။

ရှမ်းပြည်တောင်ပိုင်းရှိ ရွာငံ၊ ပင်းတယ၊ ကလော၊ ပင်လောင်း စတဲ့ဒေသတွေမှာ ဂေါ်ဖီထုပ်ကို စိုက်ပျိုးကြပြီး လက်ရှိ ဈေးကောင်းရနေပေမယ့် ဓာတ်မြေသြဇာ၊ ပိုးသတ်ဆေး၊ လုပ်သားခတွေ ၃ ဆခန့် စျေးတက်နေတဲ့အပြင် မိုးရာသီမှာ စိုက်ခင်းတွေ ပျက်စီးကုန်တာကြောင့် တောင်သူတွေအနေနဲ့ အမြတ်နည်းပါးတယ်လို့ စုံစမ်းသိရပါတယ်။

MK-015

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)