မဲခေါင် ဇွန် ၁၈
ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ အလယ်ကယန်းဒေသရှိ ကျေးရွာ ၅ ခုက စစ်ဘေးရှောင် အယောက် ၂၀၀ ကို ဇွန်လ ဒုတိယပတ်အတွင်း စိုက်ပျိုးရေး သင်တန်းပေးနိုင်ခဲ့တယ်လို့ ဒေသတွင်း သတင်းအရင်းအမြစ်တွေက ပြောပါတယ်။
စစ်ဘေးရှောင်တွေရဲ့ မီးဖိုချောင်ရိက္ခာနဲ့ သီးနှံ ရရှိဖို့အတွက် စီမံကိန်းအရ ကယန်းမျိုးဆက်သစ်လူငယ် (KNGY)က တစ်လတတိတိ သင်ကြားပေးခဲ့တာလို့ ဆိုပါတယ်။
“သင်တန်းသားတွေအပေါ် ၉၀ရာခိုင်နှုန်းထိ အားရကျေနပ်မိတယ်။ စိုက်ပျိုးရေး သင်တန်းမှာ ပါဝင်သူတော်တော်များက သူ့တို့ရဲ့ အလုပ်တွေ ဖြစ်နေတော့ သင်ကြားတဲ့ သင်ခန်းစာတွေအပေါ် စိတ်ဝင်စားကြတာ တွေ့ရတယ်ပေါ့နော်” လို့ KNGY တာဝန်ခံ မူလားမေဖောက ပြောပါတယ်။
စိုက်ပျိုးရေးသင်တန်းမှာ အိမ်နောက်ဖေး သီးနှံစိုက်ပျိုးနည်း၊ သီးနှံပြုစုနည်း၊ မျိုးစေ့ရွေးချယ်နည်း၊ မျိုးစေ့ကျဲနည်းနဲ့ ပိုးမွှားနှင်နင်းနည်း စတာတွေကို အဓိကသင်ကြားပေးခဲ့ပြီး သီးနှံအထွက်နှုန်း ကောင်းဖို့အတွက် သဘာဝမြေသြဇာပြုလုပ်နည်း (ဘိုကာရှီ) သင်ခန်းစာတွေကိုလည်း သင်ကြားပေးခဲ့တယ်လို့ တာဝန်ရှိသူတွေဆီက သိရပါတယ်။
စိုက်ပျိုးသင်တန်းကို စိတ်ပါဝင်စားတဲ့ စစ်ဘေးရှောင်တွေနဲ့ ဒေသခံတွေ၊ စီမံကိန်းကာလအတွင်း သတ်မှတ်ချက်တွေကို လုပ်ဆောင်နိုင်သူတွေ၊ ကျေးရွာရဲ့ သတ်မှတ်ထားတဲ့ စည်းကမ်းတွေကိုလိုက်နာနိုင်သူတွေ တက်ရောက်နိုင်ပြီး အသက်အရွယ် ကန့်သတ်ချက် မရှိဘူးလို့ ဆိုပါတယ်။
သင်တန်းပြီးတဲ့နောက်မှာလည်း သင်တန်းသားတွေ အနေနဲ့ ရရှိထားတဲ့ စိုက်ပျိုးရေး နည်းစနစ်တွေ မိမိကိုယ်တိုင် ရရှိထားတဲ့ အသိပညာတွေကို ပေါင်းစပ်ပြီး အိမ်နှောက်ဖေး စားဖိုဆောင် သီးနှံစိုက်ပျိုးရေးကို လုပ်ဆောင်နိုင်ဖို့ တိုက်တွန်းလိုပါတယ်။ ကုန်ဈေးနှုန်း မြင့်တက်နေတဲ့ ကာလမှာ ကိုယ်တိုင် စားဖိုဆောင် သီးနှံစိုက်ပျိုးရေးကို လုပ်ဆောင်နိုင်မှပဲ မိသားစုရဲ့ ထွက်ငွေသက်သာမယ် ဆိုတာလည်း ယုံကြည်ပါတယ်” လို့ KNGY တာဝန်ခံ မူလားမေဖောက ဆက်ပြောပါတယ်။
သင်တန်းကာလ အပြီးမှာ ဒေသခံနဲ့ စစ်ရှောင်ဘေးရှောင်တွေ စိုက်ခင်းပြုလုပ်တဲ့အခါမှာ အသုံးပြုနိုင်ဖို့အတွက် ပေါက်ပြား၊ ဂေါ်ပြား၊ ဓား၊ ထွန်ခြစ်၊ ရေဖျန်းပုံး၊ စကာစိမ်းနဲ့ မျိုးစေ့တွေကို ဖြန့်ဝေပေးခဲ့ပြီး လက်တွေ့ဆင်းနေတဲ့ သင်တန်းတွေကို အနီးကပ် စောင့်ကြည့်ညွှန်ကြားသွားမယ်လို့ သင်တန်းဆရာတွေက ပြောပါတယ်။
ဇွန်လ ၁၀ ရက်နေ့ကလည်း KNGY ပညာရေးဌာနက ဦးဆောင်ပြီး မိခင်ဘာသာစကား အခြေပြု ဘာသာစကားအစုံသုံး ပညာရေး (MTB-MLE)စနစ် လက်တွေ့သင်ကြားရေးကျောင်း ၂ ကျောင်းကို ဖယ်ခုံနဲ့ ဒီးမော့ဆိုမြို့နယ်မှာ ဖွင့်လှစ်နိုင်ခဲ့တယ်လို့ တာဝန်ရှိသူတွေဆီက သိရပါတယ်။
MK-014
