မဲခေါင် ဇွန် ၁၃
မွန်ပြည်နယ်၊ မော်လမြိုင်ခရိုင်၊ ကျိုက်မရောမြို့မှာ မနေ့ ဇွန် ၁၂ ရက်နေ့က ညနေပိုင်းက ကျိုက်မရော အကျဥ်းထောင်မှာ စစ်ကောင်စီလက်အောက်ခံ အကျဥ်းဦးစီးဌာနက အလုပ်ကြမ်းခိုင်းစေနေချိန်အတွင်း အကျဥ်းသားတစ်ဦး ဓာတ်လိုက်မှုဖြစ်ပွားခဲ့တယ်လို့ ထောင်တွင်းသတင်းအရင်းအမြစ်တွေဆီက သိရပါတယ်။
ကျိုက်မရောထောင်အတွင်း အမျိုးသမီးဆောင်နဲ့ အမျိုးသားဆောင်ကြားက အမြင့်ပေ ၂၀ အထက် အုတ်ရိုးနေရာလွတ်တစ်ခုမှာ အကျဥ်းသားတစ်ဦးကို သံပြားကာခိုင်းရာက ဓာတ်လိုက်ပြုတ်ကျခဲ့တာပါ။
နိုင်ငံရေး အကျဥ်းသူများအဖွဲ့ သတင်းနဲ့ပြန်ကြားရေးတာဝန်ခံ မမေဇင်သက်က “တန်းပိတ်ချိန်မှာ ခိုင်းတာပေါ့နော်။ အဓိက က အမျိုးသားဆောင်နဲ့ အမျိုးသမီးဆောင်ကို မြင်ရမှာစိုးလို့ ကာခိုင်းတာပေါ့။ အဲ့ဒါကို အသက်အန္တရာယ်နဲ့ပတ်သက်ပြီးတော့ ဘာတစ်ခုမှ လုံခြုံအောင် လုပ်မထားပေးတဲ့ အခါကျတော့ ဓာတ်လိုက်တာပေါ့နော်” လို့ ပြောပါတယ်။
အခင်းဖြစ်ပွားပြီးနောက် ဆေးကုသခွင့်မရတာကြောင့် နိုင်ငံရေးအကျဥ်းသူတွေက ၂ နာရီဝန်းကျင်ခန့် တောင်းဆိုမှုပြုလုပ်ခဲ့ပြီး အကျဥ်းဦးစီးဌာနက မော်လမြိုင်ဆေးရုံကို ပို့ဆောင်ပေးခဲ့တယ်လို့ ဆိုပါတယ်။
လတ်တလောမှာတော့ ဆေးရုံပို့ဆောင်ထားပေမယ့် နောက်ဆက်တွဲ အခြေအနေတွေကို အကျဥ်းဦးစီးဌာနက သတင်းထုတ်ပြန်တာမျိုး မရှိသေးတာကြောင့် လုံလောက်တဲ့ဆေးကုသခွင့်ရရှိဖို့ WOPP က တောင်းဆိုထားပါတယ်။
“အကျဉ်းထောင်တွေထဲမှာ ဒဏ်ရာရသူတွေကို ပြင်ပဆေးရုံကိုသွားပြီးတော့ ကုသခွင့်မရရှိတဲ့အတွက် ကျနော်တို့အနေနဲ့ တောင်းဆိုရခြင်းဖြစ်ပါတယ်။ အဲလိုတောင်းဆိုတဲ့အပေါ်မှာ အကျဉ်းဦးစီးဌာနနဲ့ စစ်တပ်ဘက်က ထောင်ဆူတယ်ဆိုတဲ့ စကားလုံးနဲ့ပုံဖျက်လေ့ ရှိပါတယ်။ ကျနော်တို့အနေနဲ့က ထောင်ဆူတာမဟုတ်ဘဲ အကျဉ်းသားတွေရဲ့ ရပိုင်ခွင့်ကိုတောင်းဆိုတာ ဖြစ်တယ်လို့ပဲ ပြည်သူတွေကို အသိပေးချင်ပါတယ်” လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက်(PPNM)ရဲ့ ဦးဆောင်ကော်မတီဝင်တစ်ဦးဖြစ်သူ ကိုသိုက်ထွန်းဦးက ပြောပါတယ်။
ဓါတ်လိုက်ဒဏ်ရာရသူဟာ သာမန်အကျဉ်းသားတစ်ဦးဖြစ်ပြီး လတ်တလောမှာ အသက်အန္တရာယ်စိုးရိမ်နေရပေမယ့် စစ်ကောင်စီဘက်က သတင်းဖုံးကွယ်ထားတာကြောင့် ထောင်တွင်းအကျဉ်းသားတွေအပါအဝင် မိသားစုဝင်တွေဘက်ကလည်း စိုးရိမ်ပူပန်နေကြတယ်လို့ ဆိုပါတယ်။
ကျိုက်မရော အကျဉ်းထောင်ဟာ ဒေသတွင်းနိုင်ကျဉ်းတွေကို အများဆုံးထားရှိပြီး အင်းစိန်၊ သာယာဝတီထောင်တွေက ထောင်ပြောင်းလာသူတွေလည်း လူနည်းစု ရှိတယ်လို့ နိုင်ကျဉ်းဟောင်းတွေဆီက သိရပါတယ်။
MK-015
