မဲခေါင်၊ ဖေဖော်ဝါရီ ၂၆
ရှမ်းပြည်မြောက်ပိုင်း၊ မူဆယ်မှာ နယ်စပ်ဖြတ်ကျော်ခွင့် လုပ်ပေးမယ် ဆိုပြီး သိန်းရာချီ လိမ်လည် ထွက်ပြေး နေတာရှိနေကြောင်း နယ်စပ်ဒေသခံတွေဆီက သိရပါတယ်။
“ကျွန်မမိတ်ဆွေ တစ်ဦးကို သိန်း ၂၂၀ ကျော်၊ နောက်တစ်ဦးကို ၆၀ ကျော်၊ တစ်ဦးက ၁၁ သိန်း ကျွန်မဆီက ၁၃၅ သိန်း တခြားသူတွေဆီကကောဆို သိန်းထောင်ချီရှိမလားပဲ ခုတော့ မူဆယ်အိမ်လဲမရှိတော့ဘူး။ တိမ်းရှောင်နေပြီး အကုန်အဆက်ဖြတ်ထားတယ်” လိမ်လည်ခံရသူ တစ်ဦးက ပြောပါတယ်။
လိမ်လည်သူ လင်မယားဟာ မူဆယ်မြို့တောင်ရပ်ကွက်နေမှာ နေထိုင်တဲ့ မခမ်းလွန်းခေါ် မရှမ်းမ နဲ့ သူ့ယောက်ျား အောင်မိုးဆိုသူ ဖြစ်တယ်လို့ သူက ပြောပါတယ်။
ပြီးခဲ့တဲ့ ၂၀၂၃ ခုနှစ်၊ ဇွန်လပိုင်းက စာအုပ်အနီလုပ်ပေးမယ် ၃ ရက်အတွင်းရမယ်ပြောကာ တစ်ယောက်ကို ၂၅ သိန်း ယူထားပြီး လက်ရှိချိန်ထိ စာအုပ်လည်းမလုပ်ပေးသလို ငွေလည်းပြန်မအမ်း ပေးဘူးလို့ ဆိုပါတယ်။
“မြန်မာ – တရုတ်နယ်စပ် ဖြတ်ကျော်ခွင့် စာအုပ်အနီ လုပ်ပေးမယ်ဆိုပြီး လိမ်စားသွားတာ။ အခု အဆက်အသွယ် လုံးဝဖြတ်ပစ်တာ” လို့ လိမ်လည် ခံရသူတွေနဲ့ နီးစပ်သူက ပြောပါတယ်။
နယ်စပ်ဖြတ်ကျော်ခွင့် စာအုပ်အပြင် ယာယီနယ်စပ် ဖြတ်ကျော်ခွင့် ၇ ရက် ကဒ်ကိုလည်း ချက်ချင်းဝင်ရမယ်ဆိုပြီး မသိသူတွေအပေါ် ငွေလိမ်လည် နေတာရှိတယ်လို့ ဆိုပါတယ်။
လက်ရှိ အဲဒီ လင်မယား ၂ ဦး ရဲ့ ငွေလိမ်လည်ခံရသူ အများအပြားရှိနေပြီး ပြည်သူတွေကို နောက်ထပ် အလိမ်လည် မခံစေလိုတဲ့အပြင် ကြိုတင်ရှောင်ရှား စေလိုတာကြောင့် ဖော်ထုတ်ရခြင်း ဖြစ်တယ်လို့ ကာယကံ ရှင်တွေက ပြောပါတယ်။
တရုတ် – မြန်မာနယ်စပ် ဖြတ်ကျော်ခွင့်စာအုပ် အနီကို တရုတ်နဲ့မြန်မာနယ်စပ် ခရိုင်ဖြစ်တဲ့ မြန်မာဘက် မူဆယ်ခရိုင် အိမ်ထောင်စု ကိုင်ဆောင်သူ ဒေသခံတွေကိုသာ တရားဝင် ပြုလုပ်ပေးပြီး တရုတ်ဘက်ခြမ်းကလည်း မြန်မာနဲ့ထိစပ်နေတဲ့ တယ်ဟုန်ပြည်နယ်ခွဲက ဒေသခံတွေကိုသာ တရားဝင် နယ်စပ်ဖြတ်ကျော်ခွင့် စာအုပ် ထုတ်ပေးတာ ဖြစ်ပါတယ်။
ယာယီ နယ်စပ် ဖြတ်ကျော်ခွင့် တခါသုံး တပ်တ်ကဒ်ကိုတော့ မြန်မာနိုင်ငံသား ဖြစ်ပါက ပြုလုပ်ပေးပေမယ့် တရုတ်ဘက်မှာ ၆ ညအိပ်၊ ၇ ရက်သာ နေထိုင်လည်ပတ်ခွင့်ရှိပြီး တရားဝင် အလုပ်လုပ်ခွင့် မရှိပါဘူး။
ဒါပေမယ့် မူဆယ် နယ်စပ်မှာတော့ နယ်စပ်ဖြတ်ကျော်ခွင့် ကြားခံပွဲစားတွေက စာအုပ်အနီကို သိန်း ၁၂ သိန်း ကနေ သိန်း ၆၀ အထိ၊ တပတ်ကဒ်ကို ၅ သောင်း ကနေ ၃ သိန်းခွဲနဲ့ ဝန်ဆောင်မှု ပေးဟန်လုပ်ပြီး လိမ်လည်လုပ်စားနေသူ အများအပြား ရှိနေတာကို တွေ့ရကြောင်း ဒေသခံတွေဆီက သိရပါတယ်။
CJ-008
