မဲခေါင်၊ ဇန်နဝါရီ ၂၆

ဆီဆိုင်မြို့နဲ့အနီး၀န်းကျင် ရွာတွေကို မနေ့ ဇန်န၀ါရီ ၂၅ ရက်မှာ စစ်ကောင်စီက ပေါင် ၅၀၀ ဗုံးအပါအ၀င် ဗုံးအလုံးပေါင်း ၁၀၀ ကျော် ကြဲချခဲ့တယ်လို့ ပအို၀်းအမျိုးသားလွတ်မြောက်ရေး တပ်မတော် (PNLA) က သတင်းထုတ်ပြန်ပါတယ်။

စစ်ကောင်စီက ပအို၀်းဒေသရှိ ဆီဆိုင်မြို့အပါ ကျေးရွာ ၄ ရွာကို ဂျက်ဖိုက်တာ၊ Y12 လေယာဉ်တွေ အသုံးပြုပြီး အကြိမ် ၂၀ နီးပါး တိုက်ခိုက်ခဲ့တာလို့ PNLA ထုတ်ပြန်ချက်က ဆိုပါတယ်။

စစ်ကောင်စီရဲ့ ဝါဒဖြန့် Telegram Channel တွေမှာလည်း ဆီဆိုင်မြို့အနီး၀န်းကျင်တွေကို ညပိုင်းအထိ ဗုံးတွေဆက်တိုက် ကြဲနေတယ်လို့ ဖော်ပြထားပါတယ်။

ဆီဆိုင်ကနေ စစ်ဘေးရှောင်လာတဲ့သူတစ်ဦးကတော့ “အပြန်အလှန်ထိတွေ့ တိုက်ပွဲဖြစ်သံတော့ မကြားခဲ့ရဘူး၊ လေယာဉ်နဲ့ဗုံးလာကြဲတာပဲရှိတယ်။ ဆီဆိုင်ဟော်မြောက်ဘက် အိမ်တွေတော့ မနက်ပိုင်းကြဲတဲ့ ဗုံး ၁၂ လုံး ထဲက ထိတယ်လို့သိရတယ်၊ ကျနော်လဲ သူတို့ထွက်ခိုင်းတုန်း ထွက်လာရတာ၊ PNLA တွေ မြို့ထဲနဲ့ လမ်းမှာ ကားတွေနဲ့တွေ့ရတယ်” လို့ ပြောပါတယ်။

ဆီဆိုင်မြို့မှ လွိုင်ကော်ဖက်နဲ့ တောင်ကြီးဖက်များတွင် ခမရ တပ်ရင်း ၄၂၃၊ ၄၂၄ ၊ ၄၂၅၊ ၄၂၆ တို့ ရှိနေကြပြီး အဲ့ဒီ့တပ်ရင်းက စစ်ကောင်စီတပ်ဖွဲ့တွေဟာ ဇန်နဝါရီ ၂၃ ရက်တည်းက စခန်း စွန့်ခွာသွားတယ်လို့ သူက ပြောပါတယ်။

လက်ရှိမှာတော့ PNLA တပ်တွေက ဆီဆိုင်မြို့မှာရှိတဲ့ စစ်ကောင်စီရဲ့ ခမရ ၄၂၃ နဲ့ ၄၂၄ တပ်ရင်းအတွင်း ၀င်ရောက်သိမ်းပိုက်ထားပြီး ပအို၀်းအလံတွေ လွှင့်ထူထားတယ်လို့သိရပါတယ်။

MK – 012

#MeKongNews

#ဆီဆိုင်

#စစ်ကောင်စီ

#ဗုံးကြဲ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)