မဲခေါင်၊ ဒီဇင်ဘာ ၂၇
ပအိုဝ်းအမျိုးသား လွတ်မြောက်ရေး အဖွဲ့ချုပ်/ တပ်မတော် (PNLO/ PNLA)က ထိန်းချုပ်နယ်မြေ အတွင်းမှာ ဒီဇင်ဘာလ နောက်ဆုံး အပတ်ကစပြီး ကားရှိတဲ့ အိမ်တွေကို အခွန်ကောက်ခံနေတယ်လို့ အခွန်ဆောင်ခဲ့ရတဲ့သူတွေက ပြောပါတယ်။
PNLO ထိန်းချုပ်နယ်မြေတွေ ဖြစ်တဲ့ ဆီဆိုင်မြို့နယ်က ကျေးရွာတွေနဲ့ မောက်မယ်မြို့နယ်၊ ကတူးကြီး ဒေသတစ်ဝိုက်မှာ အခွန်ကောက်ခံနေတာ ဖြစ်ပြီး သတ်မှတ်နှုန်းအတိုင်း မဖြစ်မနေ ဆောင်ရတာကြောင့် ပြည်သူတွေအနေနဲ့ အခက်ကြုံနေရတယ်လို့ ဆီဆိုင်ဒေသခံတစ်ဦးက ဆိုပါတယ်။
“ပိုက်ဆံမရှိလို့ Without (လိုင်စင်မဲ့) စီးပါတယ်ဆို အခွန်ပါ ထပ်ဆောင်ရတော့ ခက်ခဲတာပေါ့။ ဒီကာလ အားလုံး ခက်ခဲကြတယ်လေ။ ခွဲသွင်းရတယ်ဆို တော်သေး။ အခုက တစ်လုံးတည်း သွင်းရမှာ။ မလွယ်ဘူး” လို့ သူကပြောပါတယ်။
လတ်တလော အခွန်ကောက်ခံတဲ့ နှုန်းအရ ကားကြီး တစ်စီးကို ၂၀၀,၀၀၀ ကျပ်နဲ့ အိမ်စီးကား၊ ထော်လဂျီ၊ ၃ ဘီး စတဲ့ယာဉ်တွေကို ၁၀၀,၀၀၀ မှ ၁၅၀,၀၀၀ ကျပ် အထိ ပေးဆောင်ရပြီး ဆိုင်ကယ်တွေတော့ မပါဘူးလို့ သိရပါတယ်။
PNLO အနေနဲ့ အရင်ကတည်းက ၆ လတစ်ကြိမ် အခွန်ကောက်ခံနေကြ ဖြစ်ပေမယ့် စစ်အာဏာသိမ်း ကာလအတွင်းမှာ ယာယီ ရပ်ဆိုင်းထားခဲ့ပြီး အခုမှ ပြန်လည်ကောက်ခံတာလို့ ဆိုပါတယ်။
PNLO ရဲ့ ဗိုလ်မှူးကြီး ခွန်အာဠာရက “ဒါက ပုံမှန်ပဲလေ၊ ၆ လပတ် တစ်ခါကောက်တယ် ဘယ်အဖွဲ့အစည်းမဆိုပဲ။ တချို့က ဘီးခွန်ကောက်တယ်။ RCSS တို့ SSPP တို့လည်း သူတို့ နယ်မြေထဲမှာ ကောက်တယ်။ အခုမှ မဟုတ်ဘူး အရင်ကတည်းက ကောက်နေတာ။ ဖွံ့ဖြိုးရေးအတွက် ဒါနဲ့ပဲ လည်ပတ်ရတာ” လို့ ပြောပါတယ်။
ဒါ့အပြင် PNLO ထိန်းချုပ်နယ်မြေမှာ ပြည်သူတွင်တင်မကပဲ အဖွဲ့အစည်းအတွင်း ရာထူးကြီးပိုင်းကနေ အောက်ခြေ ရဲဘော်တွေအထိ ကားရှိသူတိုင်း အခွန်ပေးဆောင်ရတယ်လို့ သူက ဆက်ပြောပြပါတယ်။
လတ်တလော PNLO အနေနဲ့ မပြေလည်တဲ့ သူတွေကို အခွန်ကင်းလွတ်ခွင့်နဲ့ အရစ်ကျဆောင်ခွင့်တွေ သတ်မှတ်ပေးထားတာမျိုး မရှိသေးပေမယ့် ရတဲ့အခွန်ငွေတွေနေ စစ်ဘေးရှောင်တွေနဲ့ ငွေကြေး ချို့တဲ့သူတွေကို ကူညီထောက်ပံ့ပေးနေတာတွေ လုပ်ဆောင်နေတယ်လို့ စုံစမ်း သိရပါတယ်။
CJ – 007
#MeKongNews
#PNLO
#အခွန်ကောက်
