မဲခေါင်၊ နိုဝင်ဘာ ၃
ရှမ်းမြောက်တိုက်ပွဲအခြေနေတွေကြောင့် တရုတ်နယ်စပ်ကုန်သွယ်ရေး၊ ရပ်တန့်နေရပြီး အခြားနယ်စပ်ဂိတ်ဖြစ်တဲ့ လွယ်ဂျယ်နဲ့ ကန်ပိုက်တီးဘက်ကလည်း နယ်မြေမအေးချမ်းတဲ့အခြေနေတွေကြောင့် တင်ပို့မှု တင်သွင်းမှု လုံးဝရပ်တန့်ထားရတယ်လို့ နယ်စပ်ကုန်သည်များထံက သိရပါတယ်။
မြန်မာ-တရုတ် အဓိကကုန်သွယ်ရာနယ်စပ်ဂိတ်ဖြစ်တဲ့ ချင်းရွှေဟော်၊ လားရှိုး၊ သိန္နီအနီးမှာ တိုက်ပွဲတွေဖြစ်ပွားနေတာကြောင့် တရုတ်နယ်စပ်ကုန်သွယ်ရေး ရပ်တန့်ထားရပြီး တိုက်ပွဲများပြင်းထန်နေတာကြောင့် ကုန်ကားတွေ ပိတ်မိနေပါတယ်။
“တိုက်ပွဲတွေဖြစ်နေလို့ အခြားဂိတ်ပေါက်က ပတ်ပို့ရင်လည်း ကန်ပိုက်တီးနဲ့ လွယ်ဂျယ်ကိုပို့ဖို့က ခရီးထောက်ပြီး စရိတ်ပိုကုန်တယ်ဆိုတာထက် အဲ့ဒီဂိတ်ကိုသွားဖို့က စစ်ကိုင်းတိုင်းတစ်ခုလုံးကိုဖြတ်သွားရမယ်၊ အဲ့ဘက်ကလည်း နယ်မြေက မအေးချမ်းဘူး၊ ကချင်ပြည်နယ်ဘက်က ပို့ကုန်တွေဘဲ အဆင်ပြေမယ်၊ ဒီဘက်အောက်ဘက်ကလူတွေက အဆင်မပြေဘူး၊ တရုတ်နဲ့ကုန်သွယ်ရေးက ရပ်တန့်ထားရမယ့်သဘောရှိတယ်” က နယ်စပ်ကုန်သည်တစ်ဦးကဆိုပါတယ်။
လက်ရှိမှာ MNDAA အနေနဲ့ အရေးပေါ်အခြေနေတွေကြောင့် လားရှိုး-မူဆယ်လမ်းပိုင်းနဲ့ ချင်းရွှေဟော်လမ်းပိုင်းတွေမှာ ဖြတ်သန်းသွားလာခွင့် အလုံးစုံပိတ်လိုက်ပြီလို့ အသိပေးကြေညာချက်ထုတ်ပြန်ထားပါတယ်။
တရုတ်-မြန်မာနယ်စပ်တွင် လက်ရှိကုန်သွယ်မှု ပြုလုပ်နေတဲ့ နယ်စပ်ဂိတ်တွေဟာ မူဆယ်၊ လွယ်ဂျယ်၊ ချင်းရွှေဟော်၊ ကန်ပိုက်တီးနဲ့ ကျိုင်းတုံနယ်စပ် ကုန်သွယ်ရေးတွေ ဖြစ်ပါတယ်။
“အခုလတ်တလောကတော့ တရုတ်ဘက်ကုန်ရော၊မြန်မာဘက်ကပို့ကုန်ရော၊ အကုန်ပိတ်နေတာ၊ ဈေးတွေကတော့နည်းနည်းတက်လာပြီ၊ သိန္နီအထွက် နမ္မတူတံတားကလည်း ကြိုးသွားပြီ၊ မြို့ထဲမှာလည်း ဘက်ဖိုးတွေနဲ့ ကုတ်ထားတော့ လမ်းကပျက်စီးသွားပြီ၊ တစ်ချို့မြို့တွေက မြောက်ပိုင်းသုံးဖွဲ့လက်အောက်ရောက်သွားပြီး ကုန်သွယ်ရေးက အဆင်မပြေနိုင်ဘူး၊ တိုက်ပွဲကလည်း အရှိန်ကကောင်းနေတာ” လို့ စီးပွားရေးလုပ်ငန်းရှင် တစ်ဦးကပြောပါတယ်။
ပုံမှန်အားဖြင့်လည်း စစ်ကောင်စီရဲ့ ကုန်သွယ်ရေးမူဝါဒ၊ ငွေလဲနှုန်းသတ်မှတ်ချက်တွေကြောင့် ကုန်သွယ်ရေးပိုင်းမှာ ၅၀ ရာခိုင်နှုန်းလောက် ထိခိုက်နေတယ်လို့လည်း ကုန်သည်များကဆိုပါတယ်။
MK-006
#MekongNews
#တရုတ်
#ကုန်သွယ်
#တိုက်ပွဲ
#စစ်ကောင်စီ
ပုံစာ- မြောက်ပိုင်းမဟာမိတ် သုံးဖွ့ဲက ရှမ်းပြည်မြောက်ပိုင်းမှာ စစ်ကောင်စီရဲ့ စခန်းတွေကို ဝင်ရောက်တိုက်ခိုက်ခဲ့လို့ မူဆယ် ၁၀၅ မိုင်မှာ ပိတ်မိနေတဲ့ ကုန်စည်များ
