မဲခေါင်၊ ဩဂုတ် ၃၁
မန္တလေးတိုင်း၊ မိုးကုတ်မြို့ စီမံအုပ်ချုပ်ရေး ကော်မတီက လာမယ့် စက်တင်ဘာလအတွင်း ကျောက်မျက်ရတနာ လုပ်ငန်းတွေကို အခွန်စတင်ကောက်ခံတော့မယ်လို့ မြို့ခံတွေက ပြောပါတယ်။
မိုးကုတ်မြို့ စီမံအုပ်ချုပ်ရေး ကော်မတီ လက်အောက်ခံ ကျောက်မျက်လုပ်ငန်း ကြီးကြပ်ရေးကော်မတီက ကောက်ခံမှာ ဖြစ်ပြီး အခွန်နှုန်းထားတွေလည်း သတ်မှတ်ပြီးပြီလို့ ဆိုပါတယ်။
“သူတို့ပြထားတာတွေက တစ်နှစ်စာလုံးတောင် သောင်းဂဏန်းဆိုတော့ မဆိုးဘူး ပြောရမှာပဲ။ အလကားနေ ဆက်ကြေးစွတ်ကောက်တာထက်တော့ တော်သေးတယ်။ အရင်တစ်ပိုင်တစ်နိုင် ခိုးတူးတာတောင် စကစကို တစ်လ ၃ သိန်း ပေးရတယ်” လို့ မြို့ခံတစ်ဦးက ပြောပါတယ်။
တစ်နှစ်စာအခွန်အတွက် တွင်းလုပ်သား တစ်သောင်း – ၃ သောင်းကျပ်ဝန်းကျင်၊ ကျောက်ကုန်သည် ၃ သောင်း – ၅ သောင်းကျပ်ဝန်းကျင်၊ လေးပင်တွင်း တစ်သိန်းကျပ်၊ ဂဲတွင်း ၅ သိန်းကျပ် အသီးသီးသတ်မှတ်ထားတယ်လို့ သိရပါတယ်။
လတ်တလောမှာ တအာင်းအမျိုးသား လွတ်မြောက်ရေး တပ်မတော်( TNLA)ဦးဆောင်တဲ့ အုပ်ချုပ်ရေး ကောင်စီက ကျောက်မျက်လုပ်ငန်း လုပ်ကိုင်ခွင့်တွေ ပိတ်သိမ်းထားဆဲ ဖြစ်ပြီး ဘယ်ချိန်ပြန်ဖွင့်ပေးမယ်ဆိုတာလည်း မသိရသေးဘူးလို့ ဆိုပါတယ်။
မိုးကုတ်မြို့ စီမံအုပ်ချုပ်ရေးကောင်စီမှာ TNLA၊ မိုးကုတ်ပျူဟာ၊ မိုးကုတ် ပ ၃ လုံးနဲ့ မြို့မိမြို့ဖတွေ အချိုးကျပါဝင်တယ်လို့ ပြဌာန်းထားပေမယ့် တကယ့်လက်တွေ့မှာတော့ မဟာမိတ်တွေကို မြို့ပြင်ပို့ထားပြီး TNLA ကပဲ ဦးစီးနေတာကြောင့် မြို့ခံတွေနဲ့ အုပ်ချုပ်ရေးအဖွဲ့ဝင်တွေကြား ပွတ်တိုက်မှုတွေ ဖြစ်ပေါ်နေပါတယ်။
အခွန်ကောက်ခံမှု အပါအဝင် အုပ်ချုပ်ရေးပိုင်းတွေကို မေးမြန်းဖို့အတွက် TNLA ရဲ့ ပြောရေးဆိုခွင့်ရှိသူ လွေးယေဦးကို ပြီးခဲ့ရက်သတ္တတစ်ပတ်တုန်းက ၃ ကြိမ် ဒီတစ်ပါတ်မှာ ၃ ကြိမ် မဲခေါင်သတင်းဌာနက ဖုန်းနဲ့ ဆက်သွယ်ခဲ့ပေမယ့် ခရီးက ပြန်လာမှ ဖြေကြားပေးမယ်လို့ တုန့်ပြန်ထားပါတယ်။
MK-014
