မဲခေါင်၊ ဒီဇင်ဘာ ၁၉
ရက်ပေါင်းများစွာတိုက်ခိုက်နေရတဲ့ နမ့်ခမ်းမြို့က စစ်ကောင်စီတပ်ရဲ့ စခန်းသစ်ကုန်းကို TNLA က ဒီဇင်ဘာလ ၁၈ရက်ည သန်းခေါင်ကျော်က တိုက်ခိုက်သိမ်းပိုက်နိုင်ခဲ့တယ်လို့ ရှေ့တန်းရောက် သတင်းရင်းမြစ်တွေထံကနေ သိရပါတယ်။
ဒီဇင်ဘာလ ၁၈ရက် မနက်ပိုင်းကတည်းက နမ့်ခမ်း စခန်းသစ်ကုန်းကို TNLA ဦးဆောင်တဲ့ မဟာမိတ်တပ်တွေက ထိုးစစ်ဆင်နေတာဖြစ်ပြီး ညပိုင်းမှာတော့ သိမ်းပိုက်ရရှိခဲ့တာဖြစ်တယ်လို့ ရှေ့တန်းရောက်သတင်းရင်းမြစ်က ပြောပါတယ်။
စခန်းသစ်ကုန်းကို သိမ်းပိုက်လိုက်နိုင်တာကြောင့် နမ့်ခမ်းမြို့မှာ စစ်ကောင်စီတပ်စခန်းတစ်ခုသာ ကျန်တော့တယ်လို့ အဲဒီသတင်းရင်းမြစ်က ပြောပါတယ်။
“မနေ့ည သန်းခေါင်ကျော် ၁နာရီလောက်မှာ အပြီးသတ်ရလိုက်တယ်။ ဒီဘက်မနက်ထဲပေါ့။ မြို့ကိုက ရထားတာကြာပြီ။ ကျန်တာက ရွှေလီ ရေကာတာစောင့်တဲ့ မန်တပ်ရွာ တပ်စခန်းပဲ ကျန်တော့တယ်” လို့ သူက ပြောပါတယ်။
တိုက်ပွဲအတွင်းမှာ လက်နက်ခဲယမ်းတွေ ရာဂဏန်းကျော် ရရှိခဲ့ပြီး စစ်ကောင်စီတပ်သားအလောင်းတွေလည်း အများအပြား တွေ့ရတယ်လို့ ရှေ့တန်းရောက်စစ်ရေးသတင်းရင်းမြစ် တစ်ဦးက ပြောပါတယ်။
ဒါ့အပြင် ဒဏ်ရာရတဲ့ စစ်ကောင်စီတပ်သားတွေလည်း အများအပြားရှိပြီး သူတို့ကို အကျဉ်းသားအဖြစ်ထားလို့မရတာကြောင့် မူဆယ်ဘက်ကို ပြန်လွှတ်ပေးလိုက်တယ်လို့ သူက ပြောပါတယ်။
နမ့်ခမ်းမြို့ စခန်းသစ်ကုန်းကို TNLA က တိုက်ခိုက်နေစဉ်အတွင်း ကွတ်ခိုင်မြို့မှာ ရှိတဲ့ စစ်ကောင်စီရဲ့နမ့်ဖတ်ကာတပ်ကနေ လက်နက်ကြီးနဲ့ ၃ကြိမ် ပစ်ကူခဲ့တယ်လို့ TNLA ထုတ်ပြန်ထားပါတယ်။
ရှမ်းမြောက်မှာ အထိနာနေတဲ့ စစ်ကောင်စီတပ်ဟာ စစ်ရေးနဲ့ မသက်ဆိုင်တဲ့ အရပ်သားပြည်သူတွေကို အနိုင်ကျင့်သတ်ဖြတ်တာ၊ မတရားဖမ်းဆီးနှိပ်စက်တာတွေ ပိုမိုပြုလုပ်လာပြီး စစ်ဆေးရေးဂိတ်ကို ဖြတ်သန်းတဲ့ အရပ်သားတွေထံကနေ အစားအစာ၊ ဆေးဝါးနဲ့ ပိုင်ဆိုင်မှုပစ္စည်းတွေကို အတင်းအဓမ္မလုယူတာတွေ လုပ်နေတယ်လို့ TNLA က ထုတ်ပြန်ထားပါတယ်။
#MeKongNews
#နမ့်ခမ်း
#စခန်းသစ်ကုန်း
#TNLA
