မဲခေါင် ၊ ဒီဇင်ဘာ ၂၃
ရှမ်းမြောက် တိုက်ပွဲအတွင်း စစ်ကောင်စီတပ်ဟာ လေကြောင်း ၊ လက်နက်ကြီးတွေကို အသုံးပြုပြီး တရုတ် ပိုက်လိုင်းအနီးမှာ အဆင်အခြင်မဲ့ ပစ်ခတ်တိုက်ခိုက်တာတွေကြောင့် အန္တရာယ်ကြီးလွန်းတဲ့ ပိုက်လိုင်းပေါက်ကွဲမှုဖြစ်ပေါ်လာမှာကို ပြည်သူတွေက စိုးရိမ်မှုမြင့်တက်လျက်ရှိတယ်လို့ ရှမ်းလူ့အခွင့်အရေးမဏ္ဍိုင်က သတင်းထုတ်ပြန်ပါတယ်။
မြေအောက်မှာ ၁ မီတာခန့်သာ မြုပ်နှံထားတဲ့ ပိုက်လိုင်းတည်ရှိတဲ့နေရာတွေကို စစ်ကောင်စီ လေကြောင်း နဲ့ လက်နက်ကြီးအသုံးပြုပြီး အကြိမ်ကြိမ်တိုက်ခိုက်နေတာကြောင့် ပြင်းထန်တဲ့ ပိုက်လိုင်းပေါက်ကွဲမှုဖြစ်ပွားကာ အရပ်သားပြည်သူပေါင်းများစွာ ထိခိုက်မှာကို ဒေသခံတွေက စိုးရိမ်နေတာဖြစ်တယ်လို့ ရှမ်းလူ့အခွင့်အရေးမဏ္ဍိုင်က ပြောပါတယ်။
ပြီးခဲ့တဲ့ အောက်တိုဘာ ၂၉ ရက်နေ့က စစ်ကောင်စီမှ ဗုံးကြဲတိုက်ခိုက်ခဲ့တဲ့ နောင်ချိုမြို့နယ် ကျောက်ကြမ်းကျေးရွာဟာ တရုတ်ရဲ့ပိုက်လိုင်းနဲ့ မီတာ ၁၀၀ တောင် မဝေးဘူးလို့ ရှမ်းလူ့အခွင့်အရေးမဏ္ဍိုင်ရဲ့ ထုတ်ပြန်ချက်မှာဖော်ပြထားပါတယ်။ အဲ့ဒီတိုက်ခိုက်မှုအတွင်း အရပ်သာပြည်သူတစ်ဦးသေဆုံးခဲ့ရပြီး ဟိန္ဒူဘာသာရေးကျောင်းတစ်ခုလည်း ပျက်စီးခဲ့ပါတယ်။
ဒါ့အပြင် စစ်ကောင်စီက ဗုံးကြဲတိုက်ခိုက်ခဲ့တဲ့ နောင်ချိုမြို့နယ် ရွှေညောင်ပင်နဲ့ အုမ်းမခါးကျေးရွာဟာလည်း ပိုက်လိုင်းအနီးမှာရှိတဲ့ ကျေးရွာတွေဖြစ်ပါတယ်။ နိုဝင်ဘာ ၂၇ ရက်နေ့မှာလည်း ပိုက်လိုင်းနဲ့ မိတာ ၅၀၀ သာဝေးတဲ့ ကျောက်မဲမြို့နယ် ဗူးခါးရွာကိုလည်း စစ်ကောင်စီက လေယာဉ်နဲ့ဗုံးကြဲတိုက်ခိုက်ခဲ့ပါတယ်။
ဒါ့အပြင် ဒီဇင်ဘာ ၁၆ ရက်နေ့မှာလည်း ပိုက်လိုင်းနဲ့ ဘေးကပ်ရပ်တည်ရှိတဲ့ နမ့်ခမ်းမြို့နယ် ဟိုနားကျေးရွာကိုလည်း စစ်ကောင်စီက ဗုံးကြဲတိုက်ခိုက်ခဲ့ပါတယ်။ တရုတ်ပိုက်လိုင်းဟာ ဟိုနားကျေးရွာ ဘေးကပ်ရပ်ကို ဖြတ်သွားတာဖြစ်ပြီး ရွာနဲ့ မီတာ ၄၀ သာ ကွားဝေးတာဖြစ်ပါတယ်။
ညီနောင်မဟာမိတ် ၃ ဖွဲ့က ဦးဆောင်တဲ့ ၁၀၂၇ စစ်ဆင်ရေးအတွင်း တရုတ်ရေနံနဲ့ သဘာဝဓာတ်ငွေ့ပိုက်လိုင်းတလျှောက်ရှိမြို့နယ်များကို စစ်ကောင်စီက လေကြောင်း ကုန်းကြောင်းတွေနဲ့ အဆင်အခြင်မဲ့ တိုက်ခိုက်တာကြောင့် ပြည်သူ ၂၇ ဦးသေဆုံးပြီး ၃၃ ဦးဒဏ်ရာရရှိကာ အဆောက်အဦး ၁၆၀ ကျော်ပျက်စီးခဲ့တယ်လို့ ရှမ်းလူ့အခွင့်အရေးမဏ္ဍိုင်က ပြောပါတယ်။
ဒါ့အပြင် ညီနောင်မဟာမိတ် ၃ ဖွဲ့က စစ်ကောင်စီရဲ့ ထောက်ပို့လမ်းကြောင်းကို ပိတ်ဆို့ဖြတ်တောက်ထားရာဖြစ်တဲ့ တရုတ် ပိုက်လိုင်း တောက်ဘက်တစ်လျှောက်ရှိ မြို့နယ်များဖြစ်တဲ့ နောင်ချို ၊ ကျောက်မဲ ၊ သီပေါမြို့နယ်တွေမှာလည်း တိုက်ပွဲများဖြစ်ပွားလျက်ရှိတယ်လို့ ရှမ်းလူ့အခွင့်အရေးမဏ္ဍိုင်က ပြောပါတယ်။
CJ-002
#MeKongNews
#တရုတ်
#ပိုက်လိုင်း
#ပေါက်ကွဲ
#စစ်ကောင်စီ
#တိုက်ခိုက်
