မဲခေါင်၊ နိုဝင်ဘာ ၆
မကွေးတိုင်း၊ ဂန့်ဂေါမြို့နယ် တောင်ခင်ရန်း ရဲစခန်းက စစ်ကောင်စီတပ်နဲ့ရဲတွေ စခန်း စွန့်ခွာ ထွက်ပြေးသွားတယ်လို့ ABSDF စစ်ကြောင်း (၃) က ဒီနေ့ နိုဝင်ဘာ ၆ ရက်နေ့ မနက်မှာ ထုတ်ပြန်ပါတယ်။
တောင်ခင်ရန်း ရဲစခန်းမှာရှိတဲ့ ရဲ၊ စစ်ကောင်စီနဲ့ ပျူစောထီးပူးပေါင်း အဖွဲ့ဟာ နိုဝင်ဘာ ၄ ရက်နေ့ ကတည်းက စခန်းကို စွန့်ခွာသွားပြီး မြေမြှုပ်မိုင်းတွေ ထောင်ခဲ့တာကြောင့် ABSDF အမှတ် (၁၂) တပ်ရင်းနဲ့ မဟာမိတ် PDF တပ်ရင်းတွေက မိုင်းကျွမ်းကျင်သူတွေ ဝင်ရောက် ရှင်းလင်းနေတယ်လို့ ဆိုပါတယ်။
“မင်းရွာရဲစခန်း သိမ်းခံလိုက်ရတဲ့ အချိန်မှာ သူတို့ စခန်းတွေလည်း ဝင်ရောက်စီးနင်း ခံရမှာ ကြောက်လို့ ရဲစခန်းကို စွန့်ပြီးတော့ ထွက်ပြေးသွားတယ်လို့ ကျွန်တော်တို့က ထင်ပါတယ်” လို့ ABSDF စစ်ကြောင်း (၃) ပြန်ကြားရေး တာဝန်ခံက မဲခေါင်သတင်းဌာနကို ပြောပါတယ်။
တောင်ခင်ရန်း ရဲစခန်းမှာ ပျူစောထီး၊ ရဲ၊ စစ်ကောင်စီ စုစုပေါင်း အင်အား ၇၀ ဝန်းကျင်ရှိပြီး ABSDF နဲ့ ဂန့်ဂေါခရိုင် PDF တပ်ရင်း (၁)၊ တပ်ရင်း (၁၂)၊ တပ်ရင်း (၁၄)၊ ပ.က.ဖ တို့က အခုနှစ် မေလကုန်ပိုင်းက စတင်ပြီး အနီးကပ် မီတာ ၂၀၀ ကျော်အတွင်း ပိတ်ဆို့ထားခဲ့တာလို့ သိရပါတယ်။
“တောင်ခင်ရန်း ရဲစခန်းထဲက စခန်းပြင်ကို သူတို့ သိပ်ထွက်လို့ မရဘူး။ ရဲစခန်းနဲ့ မီတာ ၁၅၀/၂၀၀ လောက်ထိ ကပ်ထားပြီး သူတို့ ထွက်လာရင်ပစ်၊ ထွက်လာရင်ပစ်နဲ့ မကြာခဏ ပစ်ခတ်မှုတွေ လုပ်နေတယ်။ တိုက်ပွဲ ဖြစ်ပွားတာ မကြာခဏ များလာတဲ့ အခါမှာ သူတို့ အထိနာလာတာလည်း ပါတယ်” လို့ ABSDF စစ်ကြောင်း (၃) ပြန်ကြားရေး တာဝန်ခံက ဆက်ပြောပါတယ်။
ပြီးခဲ့တဲ့ နိုဝင်ဘာ ၁ ရက်နေ့နဲ့ ၂ ရက်နေ့ ညပိုင်းတွေမှာ တော်လှန်ရေး ပူးပေါင်းတပ်တွေနဲ့ တောင်ခင်ရန်း ရဲစခန်းက စစ်ကောင်စီတပ် အနီးကပ် တိုက်ပွဲတွေ ဖြစ်ခဲ့ပြီး စစ်ကောင်စီဘက်က အများအပြား ထိခိုက်ခဲ့တယ်လို့ ABSDF အမှတ် (၃) စစ်ကြောင်းရဲ့ ထုတ်ပြန်ချက်အရ သိရပါတယ်။
နိုဝင်ဘာ ၃ ရက်နေ့ မနက်ပိုင်းမှာ မင်းရွာရဲစခန်းကို တော်လှန်ရေး ပူးပေါင်းတပ်တွေ တိုက်ခိုက် သိမ်းပိုက်ခဲ့ရာ စစ်ကောင်စီတပ်သား ၆ ဦး သေဆုံးကာ စစ်သုံ့ပန်း ၁၁ ဦး ဖမ်းဆီးနိုင်ခဲ့ပြီး သေနတ် ၁၇ လက် အပါအဝင် လက်နက်ကြီး၊ ကျည်ဆန်နဲ့ စစ်အသုံးအဆောင်တွေ သိမ်းဆည်း ရရှိခဲ့တယ်လို့ NUG ကာကွယ်ရေးဝန်ကြီးဌာနက ထုတ်ပြန်ထားပါတယ်။
MK-009
#MeKongNews
#ဂန့်ဂေါမြို့နယ်
#တောင်ခင်ရန်း_ရဲစခန်း
#ABSDF
