ငလျင်ဒဏ်သင့်နေချိန် စစ်ကောင်စီ နောင်ချိုကို ဂျက်ဖိုက်တာနဲ့ ဗုံးကြဲ၊ ပေါက်မြို့တွင်လည်း ရဟက်ယာဉ်ဖြင့် တိုက်ခိုက်
မဲခေါင်၊ မတ် ၃၀
စစ်ကိုင်း၊ မန္တလေးအပါအဝင် နိုင်ငံနေရာအနှံ့တွင် ပြည်သူများ ငလျင်ဒဏ်ခံစားနေရချိန်တွင် စစ်ကောင်စီက TNLA တပ်ဖွဲ့ထိန်းချုပ်ထားသည့် နောင်ချိုမြို့ကို ယနေ့ မတ်လ ၃၀ရက် နေ့လည်ပိုင်းက ဂျက်ဖိုက်တာဖြင့် ဗုံးကြဲတိုက်ခိုက်ကြောင်း သိရသည်။
ယနေ့နေ့လည် ၁၁နာရီခွဲခန့်က ဂျက်ဖိုက်တာဖြင့် ဗုံးကြဲတိုက်ခိုက်ခြင်းဖြစ်ပြီး နောင်ချိုမြို့နယ်အတွင်းက ကျေးရွာတစ်ချို့ဘက် ကျရောက်ခဲ့ကြောင်း၊ အပျက်အစီး အဆုံးအရှုံးကို မသိရသေးကြောင်း ဒေသခံတစ်ဦးက ပြောသည်။
မြန်မာပြည်သူများ သဘာဝဘေးကြောင့် ပူဆွေးဝမ်းနည်းနေရသည့်အချိန်တွင် TNLA သိမ်းပိုက်ထားသည့် မိုးကုတ်မြို့ကိုလည်း လေကြောင်းဖြင့်တိုက်ခိုက်ရန် စစ်ကောင်စီလော်ဘီများက ပြောဆိုမှုများရှိနေကြောင်းလည်း သိရသည်။
ထို့အပြင် မကွေးတိုင်း၊ ပေါက်မြို့နယ်တွင်လည်း ယနေ့နံနက် ၁၀နာရီခွဲခန့်က စစ်ကောင်စီရဟက်ယာဉ်က ဗုံးကြဲတိုက်ခိုက်သွားကြောင်း တော်လှန်ရေးအင်အားစုများထံမှ သိရသည်။
မတ်လ ၂၈ရက် စစ်ကိုင်းငလျင်ကြောင့် အင်းလေးဒေသ၊ အောင်ပန်း၊ မန္တလေး၊ စစ်ကိုင်း၊ မကွေး၊ ပျော်ဘွယ်၊ မိတ္ထီလာ၊ နေပြည်တော်၊ တောင်ငူ စသည့် မြို့များတွင် ကြီးမားသည့် ပျက်စီးဆုံးရှုံးမှုများနှင့် ကြုံတွေ့နေရပြီး အပျက်အစီးများအောက်တွင် ပိတ်မိသူအများစုကို ကယ်ထုတ်နိုင်ခြင်း မရှိသေးသည့် အခြေအနေတွင် စစ်ကောင်စီဘက်မှ လေကြောင်းတိုက်ခိုက်မှုများ ဆက်တိုက်လုပ်ဆောင်နေခြင်းဖြစ်သည်။
စစ်ကိုင်းနှင့် မန္တလေးတွင် အများဆုံးထိခိုက်သည့် ငလျင်ဒဏ်သင့်သူများကို တိုင်းရင်းသားလက်နက်ကိုင်တပ်ဖွဲ့များက ကူညီပေးရန် ပြင်ဆင်နေကြသလို NUG ကလည်း ၂ပတ်ထိုးစစ်ရပ်မည်ဖြစ်ကြောင်း ထုတ်ပြန်ထားသည်။
#MeKongNews
