TNLA သိမ်းပိုက်ထားသည့် နောင်ချိုနှင့် ကျောက်မဲမြို့ကို စစ်ကောင်စီဗုံးကြဲမှု တစ်ပတ်အတွင်း ၁၅ ဦးသေဆုံး
မဲခေါင်၊ ဖေဖော်ဝါရီ ၅
တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် ရှမ်းပြည်မြောက်ပိုင်း၊ နောင်ချိုနှင့် ကျောက်မဲမြို့များတွင် စစ်ကောင်စီက လေကြောင်းတိုက်ခိုက်မှုကြောင့် ဇန်နဝါရီလ နောက်ဆုံးတစ်ပတ်အတွင်း ပြည်သူ ၁၅ ဦး သေဆုံးပြီး ၃၂ ဦး ဒဏ်ရာရရှိခဲ့သည်ဟု ရှမ်းလူ့အခွင့်အရေးမဏ္ဍိုင် က ဖေဖော်ဝါရီ ၄ တွင် ထုတ်ပြန်သည်။
စစ်ကောင်စီတပ်သည် စစ်တိုက်တိုင်းရှုံးနေသောကြောင့် ပြည်သူဘက်ကို နိုင်ရာမဲခြင်းဖြစ်ကြောင်း ရှမ်းလူ့အခွင့်ရေးမဏ္ဍိုင်ပြောခွင့်ရပုဂ္ဂိုလ် ယိင်းလျန်ဟန်က မဲခေါင်ကိုပြောသည်။
“အဓိက အနေနဲ့ မနိုင်နိုင်ရာမဲတာပေါ့။ စစ်ကောင်စီတပ်ဟာ စစ်ရှုံးနေတယ်။ နေရာတိုင်းမှာစစ်ရှုံးနေတယ်။ သူတို့လုပ်နိုင်တာသည် အရပ်သားတွေအပေါ် လေကြောင်းဗုံးကြဲတာပဲရှိတယ်။ တမင်သက်သက် သူတို့ရှုံးနိမ့်မှုကို ကာဗာ(ဖုံးကွယ်)လုပ်ဖို့အတွက် စစ်ရာဇဝတ်မှုတွေကျူးလွန်နေတယ်” ဟု သူက ပြောသည်။
ဗုံးကြဲတိုက်ခိုက်မှုသည် ဇန်နဝါရီလ ၂၁ ရက်နေ့မှ ဇန်နဝါရီလ ၂၇ ရက်နေ့အထိ သီတင်းပတ် ၁ ပတ်အတွင်း ပေါင် ၅၀၀ ဗုံးသီးအပါအဝင် ဗုံးသီးပေါင်းများစွာဖြင့် ၅ ကြိမ် တိုက်ခိုက်ခဲ့ခြင်းဖြစ်သည်။
ဇန်နဝါရီလ ၂၁ ရက်က စစ်ကောင်စီက နောင်ချိုမြို့အထွေထွေအုပ်ချုပ်ရေးမှူးရုံးကို ပေါင် ၃၀၀ ဗုံး ၂ လုံး ကြဲချတိုက်ခိုက်ခဲ့ခြင်းကြောင့် အမျိုးသမီး ၁ ဦး သေဆုံးကာ အမျိုးသမီး ၁ ဉီး အမျိုးသား ၁ ဦး ထိခိုက်ဒဏ်ရာရရှိခဲ့ပြီး အထွေထွေအုပ်ချုပ်ရေးမှူးရုံးနှင့်ရဲစခန်းပျက်ဆီးသွားခဲ့သည်။
အဆိုပါ တိုက်ခိုက်မှုအပြီး ၁၀ မိနစ်အကြာတွင် နောင်ချိုမြို့ အနောက်တောင်ဘက် ကုန်းကြီးမကျေးရွာကို စစ်ကောင်စီက လေကြောင်းက ဗုံး ၁ လုံးကြဲချတိုက်ခိုက်ခဲ့ပြီး နေအိမ် ၂ လုံးပျက်စီးခဲ့သည်။
ဇန်နဝါရီလ ၂၂ ရက်တွင် နောင်ချိုမြို့ စျေးရပ်ကွက် ကို စစ်ကောင်စီက ပေါင် ၅၀၀ ဗုံး ၂ လုံးကြဲချတိုက်ခိုက်ခဲ့တာကြောင့် ပါရမီလက်ဖက်ရည်ဆိုင်ပိုင်ရှင်နှင့် ဝန်ထမ်းများ၊ စားသုံးသူများ အပါအဝင် ၉ ဦး သေဆုံးကာ ၅ ဦး ဒဏ်ရာရရှိခဲ့ပြီး နေအိမ် ၂ လုံးနဲ့ လက်ဖက်ရည်ဆိုင်ပျက်စီးခဲ့သည်။
ဇန်နဝါရီလ ၂၅ ရက်တွင် ကျောက်မဲမြို့ပြည်သူ့ဆေးရုံကို စစ်ကောင်စီက လေကြောင်းကနေ ပေါင် ၃၀၀ ဗုံးသီး ၂ လုံးကြဲချတိုက်ခိုက်ခဲ့တာကြောင့် CDM သူနာပြုဝန်ထမ်း ၂ ဦးအပါအဝင် ၃ ဦး သေဆုံးကာ ဆေးကုသမှုခံယူနေသူ ပြည်သူ ၂၀ ဉီးထပ်မနည်းသေဆုံးခဲ့သည်။
ဇန်နဝါရီလ ၂၇ ရက်တွင် ကျောက်မဲမြို့ မြို့တော်ခန်းမနှင့် ရပ်ကွက် (၂) ကို စစ်ကောင်စီက လေကြောင်းတိုက်ခိုက်ခဲ့ရာ အမျိုးသား ၁ ဦး သေဆုံးကာ အမျိုးသမီး ၂ ဦး ဒဏ်ရာရရှိခဲ့ပြီး နေအိမ် ၅ လုံးခန့်ပျက်ဆီးခဲ့သည်။
စစ်ကောင်စီမှ ကျောက်မဲမြို့ကို ဗုံးကြဲတိုက်ခိုက်ပြီးကတည်းက တော်လှန်ရေးတပ်တွေက ဒေသခံတွေ ဂြိုဟ်တုအင်တာနက် (Starlink) အသုံးပြုမှုကန့်သတ်ထားသောကြောင့် ဒေသခံတွေနဲ့ဆက်သွယ်နိုင်ခြင်း မရှိသေးပေ။
ဒေသခံများအနေဖြင့် လေကြောင်းရန်သတိပေးထုတ်ပြန်ချက်များကို လိုက်နာကြရန်နှင့် ဗုံးခိုကျင်းများတူးထားရန် ရှမ်းပြည်လူ့အခွင့်အရေးမဏ္ဍိုင်က အကြံပြုထားသည်။
၂၀၂၄ ခုနှစ် နှစ်လယ်ပိုင်းအတွင်း ကျောက်မဲမြို့နှင့်နောင်ချိုမြို့ကို TNLA နဲ့တော်လှန်ရေးပူးပေါင်းတပ်တွေက ထိန်းချုပ်နိုင်ခဲ့ပြီးနောက် ဒေသခံပြည်သူများအား စစ်ကောင်စီက လေကြောင်းတိုက်ခိုက်နေတာကြောင့် အပစ်အခတ်ရပ်စဲရေးဆွေးနွေးရန် အသင့်ရှိကြောင်း TNLA က အသိပေးထားသော်လည်း စစ်ကောင်စီဘက်က တစုံတရာထုတ်ဖော်ပြောဆိုခြင်းမပြုပေ။
ရှမ်းပြည်နယ်မြောက်ပိုင်း TNLA အုပ်ချုပ်နယ်မြေ သီပေါမြို့နှင့်မူဆယ်မြို့အတွင်းမှာလဲ ဇန်နဝါရီလတလအတွင်း စစ်ကောင်စီရဲ့စစ်ကျန်မိုင်းကြောင့် ဒေသခံ ၂ ဦး သေဆုံးကာ ၄ ဦး ဒဏ်ရာရရှိခဲ့သည်။
ဂနိုက်
#MeKongNews
ပုံစာ- ကျောက်မဲမြို့ကို စစ်ကောင်စီက ဇန်နဝါရီ ၂၇ ရက်တွင် ဗုံးကြဲပြီးနောက် မြင်ကွင်းများ
Photo- TNLA
