လွယ်မောဒေသမှာ PNA ကတပ်စွဲဖို့ PNLA နဲ့ ညှိနှိုင်းထားတယ်ဆိုတာမဟုတ်ကြောင်း တာဝန်ရှိသူငြင်းဆို
မဲခေါင်၊ နိုဝင်ဘာ ၁၉
ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်၊ လွယ်မောဒေသမှာ ပအိုဝ်းပြည်သူ့စစ် (PNA)က ဟိုပုံးတန်ဆောင်တိုင်ပွဲတော် လုံခြုံရေးယူပေးဖို့အတွက် အင်အား ၂၀၀ ခန့်နဲ့ တပ်စွဲထားတယ်လို့ ဒေသတွင်းနေထိုင်သူတွေက ပြောပါတယ်။
မနေ့ (နိုဝင်ဘာ ၁၈)ကတည်းက တပ်စွဲထားတာဖြစ်ပြီး လူမှုကွန်ရက်စာမျက်နှာ (Facebook) မှာ ပအိုဝ်းအမျိုးသားလွတ်မြောက်ရေး (PNLA)ရဲ့ သဘောတူညီချက်နဲ့တပ်စွဲတယ်လို့ ဖော်ပြထားပါတယ်။
ဒါ့အပြင် ဟိုပုံးတန်ဆောင်တိုင်ပွဲ ၅ ရက်တာအတွင်း တစ်ဖက်နဲ့တစ်ဖက်အပစ်ရပ်ကြဖို့သဘောတူညီချက်ပါရှိပြီး ရဲဘော် ခွန်ဝေဖြိုး ဦးဆောင်တဲ့အဖွဲ့က နယ်မြေလုံခြုံရေးအရ တပ်စွဲတာဖြစ်တယ်လို့လည်း ဆိုထားပါတယ်။
ဖြစ်စဉ်နဲ့ ပတ်သက်ပြီး PNLA ရဲ့ ပြောရေးဆိုခွင့်ရှိသူ ခွန်ရိန်းယံကို မေးမြန်းရာမှာ “စစ်အာဏာရှင်တွေနဲ့ ကျနော်တို့ကြား ဘာသဘောတူညီမှုမှမရှိပါ ၊အဲ့ဒီသတင်း မဟုတ်ပါ၊ မမှန်ပါလို့ ယတိပြတ်ပြောလိုပါတယ်” လို့ ဒီနေ့ နေ့လည်ပိုင်းက ဖြေကြားလာပါတယ်။
ဟိုပုံးမြို့နဲ့ ဆီဆိုင်မြို့ကြား အကွာအဝေးဟာ ၄၈ မိုင်ခန့်သာ ရှိပြီး ကားနဲ့ တစ်နာရီကျော်အတွင်း လာရောက်နိုင်တာကြောင့် လုံခြုံရေးအရ တပ်စွဲရတာလို့ PNA ဖက်ကဆိုပါတယ်။
PNLA တပ်ခွဲတချို့ရှိတဲ့ လွယ်မောတောင်ဒေသကို ၂၀၂၄ ခုနှစ် အစောပိုင်းကာလကတည်းက PNA တပ်တွေ မကြာခဏ စစ်ကြောင်းထိုးဝင်ရောက်လေ့ရှိပြီး အဲဒီရွာမှာအထိုင်ချကာ တခြားကျေးရွာတွေဘက်ကို လက်နက်ကြီး ရမ်းသန်းပစ်ခတ်လေ့ရှိပါတယ်။
“အခု PNO တွေအကုန် ရောက်နေတယ်၊ လူလည်း ထပ်စုနေတယ်၊ တန်ဆောင်တိုင်အတွက်လည်း လုံခြုံရေးခေါ်နေတယ်” လို့ လွယ်မောဒေသခံတစ်ဦးက ပြောပါတယ်။
ဟိုပုံးမြို့ တန်ဆောင်တိုင်ပွဲတော်ကို စစ်ကောင်စီနဲ့ ပအိုဝ်းအမျိုးသားအဖွဲ့ချုပ်ပါတီ(PNO)ရဲ့ ဦးဆောင်မှုနဲ့ ဒီနေ့ (နိုဝင်ဘာ ၁၉)ကနေ ၂၃ ရက်နေ့အထိ ငါးရက်ကြာ ပြုလုပ်သွားမှာဖြစ်ပြီး မီးပဒေသာလှည့်ပွဲ၊ မီးပုံးပျံနဲ့ မီးရှူးလွှတ်ပွဲတွေ ထည့်သွင်းသွားမယ်လို့ ဆိုပါတယ်။
လွယ်မောဒေသမှာ ပြီးခဲ့တဲ့ မေ၊ ဇွန်၊ ဇူလိုင်လတွေအတွင်း စစ်ကောင်စီ၊ PNA ပူးပေါင်းတပ်နဲ့ PNLA တို့အကြား တိုက်ပွဲ မကြာခဏ ဖြစ်ပွားလေ့ရှိပြီး လေကြောင်းကနေလည်း အကြိမ်ကြိမ် တိုက်ခိုက်ခံခဲ့ရဖူးတယ်။
ဆီဆိုင်မြို့နယ်ကို မေလပိုင်းကတည်းက PNLA တပ်တွေ လက်လွတ်ရပြီးနောက်ပိုင်း ပင်လောင်း – ဖယ်ခုံ လမ်းတစ်လျှောက်မှာ တိုက်ပွဲဆက်လက် ဖြစ်ပွားနေဆဲ ဖြစ်တယ်လို့ သိရပါတယ်။
ဓါတ်ပုံ။ PNA စစ်အင်အားပြစဉ်ထုတ်ပြန်တဲ့ ပုံဟောင်း။
MK-14
#MeKongNews
