မဲခေါင်၊ အောက်တိုဘာ ၂၃
ရှမ်းတောင်၊ ပအိုဝ်းဒေသ၊ အင်းလေးကန် ဘီလူးချောင်းအနောက်ဖက်ခြမ်းက သစ်ပင်ကောက်ရွာကို PNO တွေ ဝင်လာပြီး အစည်းအဝေးခေါ်ကာPNO ထဲမဝင်ပါက နေအိမ်ကိုမီးရှို့ကာ ရွာကမောင်းထုတ်မယ်ဆိုပြီး အဓမ္မခြိမ်းခြောက် လူသစ်စုနေတယ်လို့သိရပါတယ်။
အောက်တိုဘာ ၂၁ ရက် မနက် ၇ နာရီအချိန်မှာ ယခင် ပင်ကောက်ရွာ PNO ဟောင်း သဲတောင် ကန်အောင်(ခ)ဗိုလ်သိုက်ရဲ့ အကိုအရင်းဖြစ်သူ ထွက်အုံး ဦးဆောင်ပြီး သစ်ပင်ကောက်ရွာအတွင်း ပအိုဝ်းပြည်သူ့စစ် ၁၅ ယောက်ခန့်နဲ့ ရွာကိုအစည်းအဝေးခေါ်ယူကာ ရွာသားတွေ တစ်အိမ်တစ်ယောက် အဖွဲ့ထဲမဝင်မနေရ ပြောဆိုကာ ထွက်ပြေးတာဖြစ်စေ ရှောင်ပြေးတာဖြစ်စေ ထွက်ပြေးသူရဲ့နေအိမ်ကို မီးရှို့ဖျက်ဆီးပြီး ရွာတွင်းတစ်မိသားစုလုံးနေခွင့်မရှိကြောင်း ခြိမ်းခြောက်ပြောဆိုခဲ့တယ်လို့ သိရပါတယ်။
ဒါအပြင် တစ်အိမ်တစ်ယောက် ဝင်ထားသောသူတွေဟာ ရှေ့တန်းထွက်ရန်မလိုဘဲ ယူနီဖောင်း လက်နက်အပြည့်အစုံ တပ်ဆင်ပေးမှာဖြစ်ပြီး ၅ ယောက်ကို တစ်ပတ် သဲတောင်ဂိတ်တွင်စောင့်ရမည်ဖြစ်ကြောင်း၊နေအိမ်တစ်အိမ်ကို ဆန် ၂ ပြည် ငွေတစ်သောင်းခန့်ထည့်ပေးရန်၊ သဲတောင်ဂိတ် ရဲဘော်တွေကို တစ်ရက်၂အိမ်ကျ ထမင်းဟင်းချက်ပို့ပေးရမည် ဖြစ်ကြောင်းပြောဆိုခဲ့တယ်လို့ သိရပါတယ်။
PNO တွေကို စစ်ကောင်စီက မြှောက်ပင့်ပြီး မလာမနေရ အင်အားပြခိုင်းကာ စစ်သင်တန်း ၅ ရက်နဲ့ ရှေ့တန်းတွေကို ပို့လွှတ်နေတာကြောင့် အင်အားအများအပြားလိုအပ်နေတာဖြစ်လို့ အခုလို ရွာတွေမှာ အဓမ္မခြိမ်းခြောက်အင်အားစုဆောင်းနေတာလို့ စစ်ရေးသုံးသပ်သူတွေက ပြောဆိုနေကြပါတယ်။
“ပြည်သူ့စစ်ဆိုတာက လူမျိုးကို ကိုယ်စားမပြုသလို လူမျိုးစုရဲ့ အမျိုးသားတပ်ဖွဲ့လည်းမဟုတ်ပါဘူး၊ ပြည်သူ့စစ်ဆိုတာဟာ စစ်ကောင်စီရဲ့လက်အောက်ခံတပ်ဖွဲ့ စစ်ကောင်စီပေးတာယူ ကျွေးတာစားပြီး ခိုင်းတာလုပ်ရတဲ့ ကျွန်တပ်ဖွဲ့သာဖြစ်ပါတယ်၊ဒါကြောင့်လည်း စစ်ကောင်စီလက်အောက်ခံ PNOပြည်သူ့စစ်ဟာ စစ်ကောင်စီအလိုကျ ပအိုဝ်းပြည်သူကို ညှဥ်းပန်းနှိပ်စက်နေတာဖြစ်ပါတယ်”လို့ PNLO က စစ်ရေးဆိုင်ရာ ပြောရေးဆိုခွင့်ရှိသူ ခွန်းရိန်းယံက ပြောပါတယ်။
လက်ရှိမှာ PNO တွေ ဟာ အင်အားရာချီနဲ့ စစ်ကောင်စီတပ် အနည်းအကျဥ်းပါဝင်ပြီး ပင်လောင်း ဖယ်ခုံအစပ်က လဲလောင်း၊ နောင်ဝိုး၊ ဗန်းမောက်၊ ပင်စုံဘက်တွေကို စစ်ကောင်စီရဲ့ လေကြောင်း၊ အမြောက်ပစ်ကူတွေနဲ့ စစ်ကြောင်းထိုးနေလို့ တိုက်ပွဲတွေပြင်းထန်နေတယ်လို့ သိရပါတယ်။
MK-012
