မဲခေါင်၊ အောက်တိုဘာ ၁၆
ရှမ်းပြည်အရှေ့ပိုင်း၊ မိုင်းပျဉ်းမြို့နယ်မှာ စစ်ရှုံးလာတဲ့ စစ်ကောင်စီတပ်က နေရာ ၂ အနီးမှာ ပြောင်းရွှေ့တပ်စွဲထားတယ်လို့ နီးစပ်တဲ့ သတင်းအရင်းအမြစ်တွေက ပြောပါတယ်။
စက်တင်ဘာလ ၁၉ ရက်နေ့က မိုင်းပျဉ်းမြို့နယ်၊ ယင်းခမ်းကျေးရွာအုပ်စုမှာ သျှမ်းပြည်ပြန်လည် ထူထောင်ရေးကောင်စီ/ တပ်မတော်(RCSS/ SSA) နဲ့ စစ်ကောင်စီ၊ လားဟူပြည်သူ့စစ် ပူးပေါင်းတပ်တို့ တိုက်ပွဲဖြစ်ပွားခဲ့ရာ စစ်ကောင်စီဖက်က အရေးနိမ့်ဆုတ်ခွါခဲ့ပြီးနောက် ဒီနေ့အထိ ပြောင်းရွှေ့တပ်စွဲထားတာပဲ ဖြစ်ပါတယ်။
“ကြံ့ခိုင်ရေးအမတ်ဟောင်း စိုင်းထွန်းစိန်ကို စစ်တပ်က သေနတ်ပြန်တောင်းခိုင်းတာ။ သူတို့ တိုက်ပွဲမှာ အသိမ်းခံရတာတွေ။ ဟိုကလည်း ဘယ်ပေးမလဲ။ နောက်တော့ လားဟူဖက်က လူကြီးတွေလည်း လာညှိနှိုင်းတယ်။ သေနတ်ရရင် စစ်တပ်က ဆုတ်မယ်ပေါ့။ ဟိုက ပြန်ပေးတော့လည်း သူတို့က နေရာ ၂ ကို ပြောင်းသွားတယ်။ လုံးလုံးဆုတ်တာ မဟုတ်ဘူး” လို့ နီးစပ်တဲ့ စစ်ရေးသတင်းအရင်းအမြစ် တစ်ဦးက ပြောပါတယ်။
လက်ရှိ စစ်ကောင်စီတပ်က နေရာ ၂ အနီးတစ်ဝိုက်ဖြစ်တဲ့ မိုင်းပုအွန်နဲ့ ဝမ်လွယ်ကျေးရွာအနီးမှာ တပ်စွဲထားပြီး စစ်ဆေးရေးဂိတ်တွေ တိုးဖွင့်ထားတာကြောင့် ဂိတ်စုစုပေါင်း ၃ ခုအထိ ရှိနေပြီလို့ သိရပါတယ်။
မိုင်းပျဉ်း – မိုင်းပုအွန် လမ်းတစ်လျှောက်က အဲဒီ စစ်ဆေးရေးဂိတ်တွေမှာ လိုင်စင်မဲ့ ကားတွေကို သိမ်းဆည်းတာ၊ လမ်းကြေးကောက်တာ၊ ကုန်ပေါ်မူတည်ပြီး ငွေကြေးကောက်ခံတာတွေကို စစ်ကောင်စီတပ်က ကျူးလွန်နေတယ်လို့ ဆိုပါတယ်။
မိုင်းပျဉ်းမြို့နယ်၊ ယင်းခမ်းကျေးရွာအုပ်စုအတွင်း စစ်ကောင်စီတပ်နဲ့ RCSS ဖြစ်ပွားခဲ့တဲ့ တိုက်ပွဲမှာ စစ်ကောင်စီဖက်က ၅ ဦး သေဆုံးခဲ့ပြီး ၃ ဦးကို အရှင်ဖမ်းမိခဲ့တဲ့အပြင် သေနတ် ၃ လက်ကိုလည်း သိမ်းဆည်းရမိခဲ့တာပါ။
စစ်ကောင်စီနဲ့ RCSS အကြားမှာ တစ်နိုင်ငံလုံး အပတ်အခတ် ရပ်စဲရေးစာချုပ်(NCA) လက်မှတ်ရေးထိုးထားသလို RCSS ဖက်ကလည်း စစ်အာဏာရှင် တော်လှန်ရေးမှာ မပါဝင်ပေမယ့် ရှမ်းပြည်တောင်ပိုင်းက ပင်းတယနဲ့ ရပ်စောက်မြိုနယ်အထိ ဝင်ရောက်လာပြီး ရိက္ခာနဲ့ လူအင်အား စုဆောင်းနေပါတယ်။
MK-014
