မဲခေါင်၊ သြဂုတ် ၂၄
ရှမ်းမြောက်၊ သီပေါမြို့ကို TNLA က အရေးပေါ်ကာလ အခြေအနေမှာ လိုက်နာရမယ့် စည်းကမ်းတွေ ထုတ်ပြန်ခဲ့တာမှာ ညမထွက်ရ အမိန့်ပါရှိပါတယ်။
ပြီးခဲ့တဲ့ သြဂုတ်လ ၂၁ ရက်နေ့စွဲပါ နမ့်ဆန်ခရိုင်၊ သီပေါ ထွေ/အုပ်ဌာနအနေနဲ့ TNLA က ထုတ်ပြန်တဲ့စာမှာ အချက် ၈ ချက် ပါရှိပြီး ယင်းစည်းကမ်းတွေကို မလိုက်နာပါက ထိရောက်စွာ အရေးယူမယ်လို့ ပါရှိပါတယ်။
လိုက်နာရမယ့် အချက်တွေကတော့ ည ၇ နာရီကနေ မနက် ၅ နာရီအထိ နေအိမ်ဝန်းအတွင်းက အပြင်မထွက်ရ၊ အိမ်ရှင်မသိဘဲ နေအိမ်အတွင်း မဝင်ရ၊ အစိုးရဌာနပိုင်ရုံးတွေထဲနဲ့ အများပြည်သူဆိုင်ရာနေရာတွေကို မဝင်ရ၊ ကိုယ်ပိုင်ပစ္စည်းမဟုတ်ဘဲ ယူဆောင်သိမ်းဆည်းထားတာ မလုပ်ရ၊ စစ်အသုံးအဆောင်ပစ္စည်းလက်နက်ခဲယမ်းတွေ လက်ဝယ်ကိုင်ဆောင်သိမ်းဆည်းထားတာတွေ မလုပ်ရ၊ အရေးပေါ်ကိစ္စအတွက် ရပ်ကွက်အုပ်/မှူးက တဆင့် တာဝန်ရှိသူတွေထံ အကူအညီတောင်းခံသွားရန်၊ ဒုစရိုက်ရာဇဝတ်မှုတွေ မကျူးလွန်ရနဲ့ စားသောက်ကုန်တွေ စျေးနှုန်းအဆမတန်စျေးမြှင့် ရောင်းချတာ မလုပ်ရတို့ အချက်တွေဖြစ်ကြောင်း ပါရှိပါတယ်။
“သူခိုးနဲ့ ဆေးသမားတွေတော့ ရဲစခန်းအချုပ်ထဲမှာ ၂၀ လောက်တွေ့တယ်၊ တုံစင့် ဘိုးဘိုးကြီးနန်းအောက်ဘက် သွားလို့မရဘူး၊ ဇတ်စုဘက်လည်း မရဘူး၊ မြို့ထဲတော့ အထိအခိုက်နည်းပါတယ်၊ မြို့ပေါ်မှာ လက်ရှိ လူဦးရေ ၁ သောင်းလောက်ရှိနိုင်တယ်၊ Mytel ပြန်ရပေမယ့် ခေါ်ရခက်တယ်၊ ကျန်လိုင်းတွေတော့မရသေးဘူး မနေ့ကတော့ လက်နက်ကြီးသံ ၃ချက်လောက်ကြားပြီး လေယာဉ် တစ်ခါဝဲတယ်၊ မနက်ဖန်ကစပြီး ၃ ရက်အတွင်း တပ်တွေကို သိမ်းမယ်ကြားလို့ လူထုတွေ သတိထားနေကြတယ်၊ တိုက်ပွဲ အရမ်းပြင်းနိုင်တယ်၊ အဓိက လေယာဉ်ဗုံးကြဲတာပဲ”လို့ ယနေ့သြဂုတ်လ၂၄ ရက် မနက် ၈နာရီမှာ သီပေါမြို့ ပန်းတိမ်တောင်ရပ်နေသူ တစ်ဦးထံ မဲခေါင်သတင်းဌာနက ဆက်သွယ်မေးမြန်းတာကို ဖြေကြားလာတာ ဖြစ်ပါတယ်။
စစ်ကောင်စီ လော်ဘီသတင်း ၁ခုမှာတော့ ရဲစခန်း၊ ဆေးရုံက သားဖွားဆောင်၊ ဘုရားကြီးဘေးက အမှတ်-၃ ကျောင်း၊ လမ်းဆုံ BOCဆိုင်ဘေး နန်းဒေဝီစားသောက်ဆိုင်၊ ရဲရင့်ဝါခန်းမ တွေမှာ TNLA နဲ့ PDF တွေ ရှိနေပြိး သီပေါက တပ် ၃ တပ်ကို လာမယ့် သြဂုတ်လ ၂၅/၂၆/၂၇(၃)ရက်အတွင်း အပြတ်တိုက်မယ်လို့ ရေးသားလာတာတွေ့ရပါတယ်။
လက်ရှိမှာ TNLA,PDF မဟာမိတ်တပ်တွေဟာ သီပေါ ခလရ-၂၃ ကို သြဂုတ်လ ၁၀ ရက်က တိုက်နေပေမယ့် တိုက်စစ်အရှိန်ကို ပြီးခဲ့တဲ့ သြဂုတ်လ ၁၉ ရက်ကစပြီး လျော့ထားတာဖြစ်သလို စစ်ကောင်စီတပ်ဘက်မှာ လက်နက်ကြီးကျည်၊ ခဲယမ်းနဲ့ စားနပ်ရိက္ခာတွေ နည်းပါးလာနေလို့ လေကြောင်းကနေ ချပေးနေတယ်လို့ သိရပါတယ်။
MK-012
