မဲခေါင်၊ သြဂုတ် ၁၁
ရှမ်းမြောက်၊ သီပေါမြို့ကို TNLA၊ PDF မဟာမိတ်တွေ မနေ့က မြို့သိမ်းတိုက်ပွဲဆင်နွှဲရာမှာ မြို့ပေါ်နဲ့ ထောင်တို့ကို ရရှိပြီးနောက် စစ်ကောင်စီတပ်ရင်းတွေနေရာကို ဝိုင်းပတ်ထားကာ လက်နက်ချဖို့ ညှိနှိုင်းမရလို့ တိုက်ပွဲတွေ ဆက်ဖြစ်နေတယ်လို့ ဒေသခံတွေရဲ့ လူမှုကွန်ရက်တွေအရ သိရပါတယ်။
မနေ့သြဂုတ်လ ၁၀ ရက် ညပိုင်းမှာ သီပေါထောင်က နိုင်ငံရေးအကျဉ်းသားတွေကို TNLA က ကယ်တင်ခဲ့ပြီး လုံခြုံတဲ့နေရာရောက်သွားပြီလို့ ဆိုပါတယ်။
ထောင်နဲ့ ရဲစခန်းအပါအဝင် မြို့အားလုံးနီးပါးကို သိမ်းထားနိုင်ပြီး စစ်ကောင်စီရဲ့ပင်မ တပ်စခန်းပဲ ကျန်ရှိနေတယ်လို့ဖော်ပြကာ လွတ်မြောက်လာတဲ့ နိုင်ငံရေးအကျဉ်းသားတွေရဲ့ပုံကို တင်လာတာတွေ့ရပါတယ်။
မနေ့ည ၁၁ နာရီအထိ လေယာဉ်ဝဲတယ်လို့ဆိုပေမယ့် မြို့အထိအခိုက်မရှိဘူးလို့ ရေးသားသူ ရှိသလို ညှိနှိုင်းမှုအဆင်မပြေလို့ မြို့မြောက်ခြမ်း နမ့်ပေါ့ချောင်းတစ်ဘက်ခြမ်း တုံစင့် နဲ့ ဇတ်စုဘက်မှာ လက်နက်ကြီးကျလို့ ပြည်သူ ၃ ဦး သေဆုံးပြီး ၄ ဦး ဒဏ်ရာရတယ်လို့ ရေးသားလာတာရှိပေမယ့် မဲခေါင်သတင်းဌာနအနေနဲ့ အတည်ပြုလို့ မရသေးပါဘူး။
လက်ရှိသီပေါ ယနေ့ သြဂုတ်လ ၁၁ ရက် မနက်ပိုင်း ၉ နာရီအထိ တိုက်ပွဲဖြစ်သံမကြားပဲ မြို့ထံကျန်မိသားစုဝင်တွေကို စိုးရိမ်ပူပန်လို့ သတင်းမေးတာတွေ တွေ့နေရပြီး အခြားဘယ်ဆက်သွယ်ရေးကဒ်မှ ခေါ်မရဘဲ ဆက်လို့ရတယ်ဆိုတဲ့ CDMA 47/49/73 ဖုန်းတွေသာ ဆက်သွယ်လို့ရနေတာပါ။
TNLA နဲ့ PDF တပ်ဖွဲ့တွေဟာ သီပေါမြို့ကို မနေ့ သြဂုတ်လ ၁၀ ရက် မနက်ပိုင်းမှာ တိုက်ခိုက်ခဲ့တာဖြစ်ပြီး မြို့နဲ့လူထု မနာစေရေးအတွက် သီပေါက စစ်ကောင်စီတပ် ခလရ-၂၃၊ ခမရ-၅၀၃၊ ၅၀၄ တို့ကို ၀ိုင်းပတ်ထားကာ လက်နက်ချခိုင်းနေတာဖြစ်ပါတယ်။
MK-012
