မဲခေါင်၊ ဇူလိုင် ၂၈
ရှမ်းပြည်မြောက်ပိုင်း၊ သိန္နီမြို့မှာ စစ်ကောင်စီက တိုက်ပွဲဖြစ်ပွားခြင်းမရှိဘဲ တဖက်သတ် လေကြောင်းတိုက်ခိုက်မှုတွေ ပြုလုပ်နေတယ်လို့ ဒေသခံတွေက မဲခေါင်သတင်းကို ပြောပါတယ်။
ဒီနေ့ ဇူလိုင်လ ၂၈ရက် မနက် ၂ နာရီကျော်မှာ ရပ်ကွက်-၄ က မူဆယ်နဲ့ ကွမ်းလုံလမ်းခွဲကို စစ်ကောင်စီက ပေါင် ၅၀၀ ဗုံး ၂လုံး ကြဲချခဲ့တာမှာ ရွှေသိန္နီကားဂိတ်အိမ်ကို ဗုံးကျလိို့မိသားစု ၇ ယောက်ထဲက ကလေးငယ် ၁ ဦးအပါအဝင် ၃ ဦးသေဆုံးပြီး ကလေးမိခင်ဖြစ်သူ ခြေထောက်ပြတ်ဒဏ်ရာရရှိခဲ့တယ်လို့ သိန္နီ ရေပူစမ်းက ဒေသခံအမျိုးသမီးတစ်ဦးက ပြောပါတယ်။
“လူကြီး ၁ယောက်က နောက်မှသေတာ၊ ဆေးရုံမှာပဲ၊ ကျမတို့တော့ မြို့ထဲ မနေရဲလို့ ရွာတွေဘက် ပြေးကြပြီ။ မြို့ထဲလဲ နေ့ဘက်ပဲ ခဏလောက်နေ ညဘက်ဆို ဓါတ်တော်စေတီမှာ အိပ်ကြတယ်”လို့ သူက ပြောပါတယ်။
ဗုံးဒဏ်ကြောင့် အချို့အိမ်တွေအတွင်း ရေကန်နီးပါးကြီးတဲ့တွင်းတွေ ဖြစ်ပေါ်ခဲ့သလို အိမ်တွေ ပြိုကျပျက်စီးခဲ့ရပြီး ဆိုင်ကယ်တွေ မီးလောင်ပျက်စီးခဲ့ရတယ်လို့ ဒေသခံတွေက ပြောပါတယ်။
ဇူလိုင်လ ၂၅ရက်ကလည်း မြေပဲကုန်းရပ်ထဲ လေယာဉ်ပေါ်ကနေ အရပ်သားအိမ်တွေကို စက်သေနတ်နဲ့ပစ်လို့ အိမ်အတော်များများ ပျက်စီးခဲ့ရပြီး စစ်ကောင်စီလေယာဉ်ဟာ ပြည်သူတွေ ညအိပ်ချိန်မှာ စစ်ဘက်ပစ်မှတ်မဟုတ်တဲ့ လူနေရပ်ကွက်တွေကို ပစ်မှတ်ထားပြီး ဗုံးကြဲစက်သေနတ်တွေနဲ့ ပစ်နေတာဟာ ပြည်သူတွေ နားမလည်ဖြစ်နေရတယ်လို့ ဒေသခံတစ်ဦးက ပြောပါတယ်။
“ဒီမြို့ကိုပဲ အဆက်မပြတ် တဖက်သတ် ပြည်သူတွေကို လာပစ်နေတာ၊ စစ်သားအချင်းချင်းတိုက်ရမှာကို ပြည်သူကိုပဲ လာသတ်နေတာ နားမလည်နိုင်တော့ဘူး”လို့ သူက ပြောပါတယ်။
လေယာဉ်နဲ့ ပေါင် ၅၀၀ ဗုံးတွေ ကြဲနေတာ၊ စက်သေနတ်တွေနဲ့ ရမ်းပစ်နေတာ၊ လူထိပြီး နေ့တိုင်းသေနေတာတွေ မရှိစေဖို့ တဖက်သတ် လာတိုက်နေတာကို ရပ်စေချင်ကြောင်း ဒေသခံတွေက ပြောပါတယ်။
ပြီးခဲ့တဲ့ ဇူလိုင် ၁၈ ရက်က စစ်ကောင်စီက ညနေပိုင်း ၄နာရီခွဲလောက် စျေးမှာ လူစည်ကားချိန် ပေါင် ၅၀၀ ဗုံးတွေကြဲချလို့ SNLD ပါတီက အတွင်းရေးမှူး သေဆုံးခဲ့ရသလို အမှတ် ၁ရပ်ကွက်က ဒေါ်နန်းအားဝူ အပါအဝင် ပြည်သူ ၇ ဦးသေဆုံးခဲ့ပါသေးတယ်။
MK – 012
