မဲခေါင်၊ ဇူလိုင် ၈
ရှမ်းပြည်မြောက်ပိုင်း၊ နမ့်ခမ်းဘက်က TNLA တပ်ဖွဲ့တွေကို ဇွန်လ ၆ ရက်မှာ SSPP/SSA တပ်ဖွဲ့က နေရာရွှေ့ပြောင်းပို့ဆောင် ပေးခဲ့တယ်လို့ နီးစပ်တဲ့ သတင်းရင်းမြစ်တွေထံက သိရပါတယ်။
“နောင်ချိန်ရွာဘက်မှာပါ။ နေရာ ရွှေ့လိုက်တာပါ။ သူတို့နဲ့ မသက်ဆိုင်တဲ့နေရာမှာ ရောက်နေလို့ပါ။ ခုခံပစ်ခတ်မှုတော့ မရှိခဲ့ပါဘူး။ နားလည်မှုရှိစွာ ငြိမ်းငြိမ်းချမ်းချမ်း ရွှေ့ပြောင်းပေးနိုင်ခဲ့ပါတယ်” လို့ SSPP နဲ့ နီးစပ်တဲ့ ဒေသခံ တစ်ဦးက ပြောပါတယ်။
ရွှေလီမြစ်ရဲ့ တဖက်ကမ်း မန်ဟီးရိုးဘက်ခြမ်း ရောက်နေတဲ့ TNLA တပ်ဖွဲ့ ဝင်တွေကို လက်နက်ဖြုတ်သိမ်းပြီး နမ့်ခမ်းဘက် ပြန်လည်ပို့ဆောင်ခဲ့တာဖြစ်ပြီး နမ့်ခမ်းဘက်မှာရှိတဲ့ SSPP ရဲ့ မူလစခန်း နေရာတွေကို SSPP တပ်ဖွဲ့တွေက ပြန်လည်နေရာယူထားလိုက်ပြီလို့ သူက ပြောပါတယ်။
“TNLA တပ်ဖွဲ့ တွေရဲ့ လက်နက်ကို ဖြုတ်သိမ်း လိုက်ပြီးတော့ သူတို့ရဲ့ အိပ်ယာလိပ်တွေနဲ့ နမ့်ခမ်းမြို့ဘက်ပြန်ပို့ လိုက်တာ” လို့ ဒေသခံ အမျိုးသား တစ်ဦးက ပြောပါတယ်။
ဒီကိစ္စနဲပတ်သက်လို့ TNLA ရဲ့ ပြောရေးဆိုခွင့်ရှိသူ လွေးယေဦးကို မဲခေါင်သတင်းဌာနက ဆက်သွယ်မေးမြန်းခဲ့ပေမယ့် မသိသေးဘူးလို့ ပြန်လည်ဖြေဆိုခဲ့ပါတယ်။
ကျောက်မဲမြို့နယ်က နောင်ပိန်ရွာ ဘက်မှာလည်း TNLA နဲ့ SSPP တို့ အကြား ထိတွေ့ တိုက်ပွဲ ဖြစ်နေတာမျိုး ရှိတယ်လို့ သူက ပြောပါတယ်။
ပြီးခဲ့တဲ့ ဧပြီလကုန်ပိုင်းက နမ့်ခမ်းမြို့နယ်အတွင်းက SSPP တပ်ဖွဲ့ဝင်တွေ အနေနဲ့ မူဆယ်ဘက်ကို ဆုတ်ပေးဖို့ TNLA ဘက်က စာပို့ တောင်းဆိုခဲ့ပြီးနောက် မေလကုန်ပိုင်းခန့်က နမ့်ခမ်းမြို့နယ်အတွင်း လှုပ်ရှားနေတဲ့ SSPP တပ်သား ၁၂၀ ကျော်ကို TNLA ဘက်က ဖမ်းဆီးပြီး လက်နက်ဖြုတ်သိမ်းခဲ့ကာ မူဆယ်ဘက် ပို့ဆောင်ခဲ့ပါသေးတယ်။
CJ – 008
