မဲခေါင်၊ ဇူလိုင် ၂

ရှမ်းမြောက်မှာ ဇွန်လ ၂၅ ရက်က စတင်ခဲ့တဲ့ ၁၀၂၇ စစ်ဆင်ရေး အပိုင်း ၂ တကျော့ပြန်တိုက်ပွဲတွေအတွင်း ရှမ်းမြောက်မြို့တွေဖြစ်တဲ့ နောင်ချို၊ ကျောက်မဲ၊ သီပေါ၊ မိုးမိတ်နဲ့ မန္တလေးတိုင်း မိုးကုတ်မြို့နယ်တွေမှာ ဇွန်လကုန် ၃၀ ရက်နေ့အထိ ဒေသခံပြည်သူ ၁ သောင်းခွဲကျော် ထွက်ပြေးတိမ်းရှောင်နေရပြီလို့ ရှမ်းလူငယ်အရပ်ဘက်အဖွဲ့အစည်းတွေက ယနေ့ ဇူလိုင် ၂ ရက်မှာ စုပေါင်းထုတ်ပြန်ပါတယ်။

သီပေါမြို့ကို တော်လှန်ရေးတပ်တွေက ၀ိုင်းထားလို့ စစ်ကောင်စီတပ်က ဒေသခံပြည်သူတွေ ကို အဝင်အထွက် ပေးမလုပ်ဘဲ လူသားတံတိုင်းအနေနဲ့ ပြုလုပ်ထားပြီး သီပေါ-နမ္မတူလမ်း၊ သီပေါ-ကျောက်မဲ၊ သီပေါ လားရှိုးလမ်းတွေကို စစ်ကောင်စီက ပိတ်ဆို့ထားတယ်လို့ သိရပါတယ်။

ဇွန်လ ၂၉ ရက်ကစပြီး သီပေါက ထွက်တဲ့ ဒုဌဝတီ ရေလမ်းကိုလည်း လှေဆိပ်မှာ စစ်ကောင်စီနဲ့ရဲတပ်ဖွဲ့က ပိတ်ဆို့ထားပြီး မည်သူကိုမှထွက်ခွင့်မပေးဘူးလို့ သိရပါတယ်။

“မိုးကုတ်မှာဆိုရင် ယခင်ကလမ်းပိတ်ထားလို့ သွားလို့မရဘူး၊ နောက်သွားလို့ ရချိန် ထွက်လာကြတဲ့သူတွေကို ပေးမထွက်ဘူး၊ မြို့ထဲပြန်ဝင်ခိုင်းတယ်၊ အဲလိုလုပ်တာ စစ်တပ်က “လို့ ရှမ်းပြည်အရပ်ဖက် ငြိမ်းချမ်းမှုဖော်ဆောင်မှုအဖွဲ့ဝင် နန်းယေ့ခမ်းက မဲခေါင်သတင်းဌာနကို ပြောပါတယ်။

ကျောက်မဲ-သီပေါဘက်က လမ်းတွေလဲပိတ်ထားပြီး ပေးမထွက်ကြောင်း ပြည်သူတွေက ခိုးထွက်ရတာ၊ အရမ်းကြမ်းတမ်းတဲ့ တောလမ်းတွေကနေ ခိုးထွက်ခိုးသယ်နေကြရတာလို့ သိရပါတယ်။

လက်ရှိမှာ စစ်ဖြစ်ရာဒေသက စစ်ဘေးရှောင် ၁ သောင်းခွဲကျော်နဲ့ သေဆုံးသူ ၃၀ ကျော် ၊ ဒဏ်ရာရသူ ၃၀ ကျော်တို့ရှိနေပြီး စားရေရိက္ခာကအစ ကျန်းမာရေးကိစ္စ အဆုံး အကူအညီတွေ ရနိုင်သမျှ အားလုံး လိုအပ်နေတယ်လို့ သိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)