မဲခေါင်၊ ဇွန် ၂၈
ရှမ်းမြောက်၊ ကျောက်မဲမြို့ပေါ် ၉ ရပ်ကွက်က မြို့ပေါ်နေ ပြည်သူ ၄ သောင်းခန့်ဟာ စစ်ကောင်စီရဲ့ လေကြောင်းက ဗုံးကြဲတိုက်ခိုက်မှုကြောင့် အနီးအနားနဲ့ လွတ်ကင်းရာနေရာတွေကို ယနေ့ဇွန် ၂၈ ရက် မနက်မှာ ထွက်ပြေးတိမ်းရှောင်နေကြတယ်လို့ ဒေသခံတွေဆီက သိရပါတယ်။
မနေ့ဇွန်လ ၂၇ ရက် ည ၇ နာရီကနေ လေယာဉ်နဲ့ဗုံး ၃၀ နီးပါး၊ ဒရုန်းနဲ့ အလုံး ၄၀ ကျော် ချခံရတဲ့ဒဏ်ကြောင့် ပြည်သူတွေဟာ ဒီနေ့နက်မှာ မြို့ထဲကနေ လွတ်ရာကို ထွက်ပြေးကြတာဖြစ်ပါတယ်။
“TNLA တပ်ဖွဲ့တွေက မြို့ထဲ လမ်းကြိုလမ်းကြားကအစ စစ်ခွေးတွေကို လိုက်သုတ်နေတာ၊ အဲ့တာကို မြို့ပေါ် ဘယ်နေရာကြဲကြဲ ဘယ်နေရာပစ်ပစ် သေမယ်ဆိုပြီး ဒလကြမ်းကို ကြမ်းနေတာဗျာ ၊ တအုန်းအုန်း တဒိုင်းဒိုင်းပဲ ညကတော့ ကြောက်ပြီး ပုန်းနေကြပေမယ့် မနက်ကျတော့ အားလုံးနီးစပ်ရာတွေခေါ် ပြီး လွတ်ရာကို ပြေးကြရတာ၊ ကျနော်နဲ့ကို ကား ၄ စီးအပြည့်၊ သေတာထိခိုက်တာတော့ ဒီလောက်ဗုံးကြဲနေတာ များမှာပဲ”လို့ ကျောက်မဲ ရပ်ကွက်-၂ ဒေသခံ ၁ ဦးက ပြောပါတယ်။
နောင်ပိန်ဘက်ကို စစ်ဘေးရှောင်ချင်သူတွေအတွက် ဦးနေအောင်ဦးစီးတဲ့ ကမ်းလင့်လက်များ လူမှုကူညီရေးအသင်းက ကား ၅ စီးနဲ့ နောင်ပိန်ဘက်ကို ကဲ့သယ်ပေးနေတယ်လို့ သိရပြီး နောင်ပိန်ဘက်မှာ စစ်ဘေးရှောင် ထောင်ချီရှိလာနေလို့ ရိက္ခာလိုအပ်ချက် များပြားလာနေတာကို ကူညီပေးဖို့ မေတ္တာရပ်ခံနေပါတယ်။
ကျောက်မဲကနေ ကားနဲ့ထွက်ခွာကြသူတွေအနေနဲ့ ကျောက်မဲ-ကျွဲကုန်း-နောင်ပိန်လေး-နားပြိန်း-အေးသာယာ-နောင်ကွမ်-တာလုံ(ဇက်ဖောင်နဲ့ကူးပြီး)-နားမခေါ်-နမ့်လန် လမ်းကိုသွားနိုင်တယ်လို့ သိရပါတယ်။
ကျောက်မဲ၊ ကျွဲကုန်း-နောင်ပိန်လေး-နားပြိန်း-အေးသာယာ-နောင်ကွမ် ကနေ ပုံဝိုး-တောင်ခြေ(အထက်ရဲရွာ)ကိုရောက်ရင် တံတားကူးပြီးတာနဲ့ ရပ်စောက်မြို့နယ်ညောင်ပင်သာရောက်ပြီး(နောင်လုံလမ်းကို လမ်းမှားမသွားဖို့သတိပြု)-ပင်ပိန်-သာစည်လမ်းကနေ နောင်ချို၊ ရပ်စောက် လမ်းဆုံကိုရောက်မယ်လို့ သိရပါတယ်။
မိုးတွင်းဖြစ်လို့ လမ်းတွေကြောင့် ဂရုစိုက်မောင်းဖို့လိုပြိး အစားအစာနဲ့ရေ၊ ဓာတ်မီးစတာတွေ ဆောင်သွားပြီး ကားတွေ စုသွားကြဖို့ လမ်းသိသူစေတနာရှင်တွေက အကြံပြုပြောကြားနေကြပါတယ်။
လက်ရှိကျောက်မဲမြို့ကို စစ်ကောင်စီက လေကြောင်း၊ လက်နက်ကြီးတွေနဲ့ အဆက်မပြတ်တိုက်ခိုက်နေသလို တော်လှန်ရေးတပ်ဖွဲ့တွေကလည်း ကွန်မန်ဒိုတပ်တွေအပါအဝင် စစ်စခန်းတပ်ရင်း၊ဌာနချုပ်တွေ လက်ရသိမ်းရဖို့ အင်အားများစွာနဲ့ အပြင်းအထန်တိုက်ခိုက်နေတယ်လို့ သိရပါတယ်။
MK-012
