မဲခေါင်၊ ဇွန် ၂၁
ကယား(ကရင်နီ)ပြည်၊ လွိုင်ကော်မြို့နယ်၊ ကုန်းဆွတ်ကျေးရွာမှာ အသက် ၂၀ ဝန်းကျင်အရွယ် အမျိုးသား ၄ ဦးကို စစ်ကောင်စီတပ်က ဖမ်းဆီးသတ်ဖြတ်ခဲ့တယ်လို့ မျက်မြင်တွေ့ရှိတဲ့ ရွာခံတွေက ပြောပါတယ်။
စစ်ကောင်စီတပ်က ဇွန်လ ပထမ အပတ်အတွင်း စစ်ကြောင်းထိုးလာတဲ့အချိန်မှာ ရွာတွင်းမှာ သွားလာလှုပ်ရှားနေတဲ့ လူငယ် ၄ ဦးကို တွေ့ရှိပြီးနောက် ပစ်သတ်ခဲ့တာပဲ ဖြစ်ပါတယ်။
“စစ်တပ်က ခဏလာဦးလို့ ခေါ်တာ။ သူတို့ကလည်း လူငယ်ဆိုတော့ ကြောက်ပြီး ထွက်ပြေးတာပေါ့။ အဲဒီမှာ မသင်္ကာဘူးဆိုပြီး လိုက်ဖမ်းတာ။ လူများများနဲ့ ဝိုင်းဖမ်းတော့ မိတယ်။ အဲဒီမှာ ရိုက်ပြီး စစ်တော့ PDF လားမေးတယ်။ သူတို့ကလည်း အသားနာတော့ ဝန်ခံလိုက်တာ။ အဲဒီမှာ ပစ်သတ်လိုက်တာ” လို့ မျက်မြင်တွေ့ရှိသူ တစ်ဦးက ပြောပါတယ်။
သေဆုံးသူ ၄ ဦးဟာ ခွန်စံလော၊ ခွန်စည်သူနိုင်၊ ခွန်ဦးမျိုး၊ ခွန်ပေါ်ဦးတို့ ဖြစ်ကြပြီး နိုင်ငံရေးနဲ့ မသက်ဆိုင်ကြတဲ့ ပအိုဝ်းအမျိုးသားတွေလို့ သိရပါတယ်။
ဖြစ်စဉ်နဲ့ ပတ်သက်ပြီး ပအိုဝ်းအမျိုးသား အဖွဲ့ချုပ်ပါတီ (PNO)ရဲ့ ပြန်ကြားရေး တာဝန်ခံ ခွန်ဆန်းအောင်ကတော့ အဲဒီ လူငယ် ၄ ဦးကို PDF တွေက ပစ်သတ်လိုက်တယ်လို့ လူမှုကွန်ယက် စာမျက်နှာ(Facebook)မှာ လိမ်လည်ရေးသား ဖော်ပြထားပါတယ်။
မေလ ၂၂ ရက်နေ့ကလည်း စစ်ကောင်စီရဲ့ လက်နက်ကြီး ပစ်ခတ်မှုကြောင့် ကုန်းဆွတ်ရွာမှာ အသက် ၅ နှစ်အရွယ် ကလေးတစ်ဦး သေဆုံးခဲ့ပြီး စစ်ကောင်စီတပ်ရဲ့ ပေါ်တာဆွဲမှုတွေကြောင့် ရွာခံလူငယ်တချို့ဟာ ပြည်ပနိုင်ငံတွေကို ထွက်ပြေးတိမ်းရှောင်နေရတယ်လို့ စုံစမ်း သိရပါတယ်။
ပုံ ၂၀၂၂ ခုနှစ် နိုဝင်ဘာ ၄ ရက်က ကုန်းဆွတ်ရွာ လက်နက်ကြီးကျရောက်တဲ့ အနေအထား
MK014
