မဲခေါင်၊ ဇွန် ၂၁
ရှမ်းတောင်၊ ပအိုဝ်းဒေသ၊ ပင်လောင်မြို့နယ်က လင်ခံကျေးရွာမှာ မနေ့ ဇွန်လ ၂၀ ရက် ညပိုင်းက စစ်ကောင်စီပစ်တဲ့ လက်နက်ကြီးကျလို့ မိသားစုဝင် ၄ ဦး ထိခိုက်ဒဏ်ရာတွေရခဲ့တယ်လို့ ဒေသသတင်းအရင်းအမြစ်ထံက သိရပါတယ်။
စစ်ကောင်စီပစ်တဲ့ လက်နက်ကြီးကျရောက်မှုကြောင့် လင်ခံကျေးရွာက ဦးစိုင်းလောင်း၊ ဒေါ်ဥမ္မာသိန်းနဲ့ သမီးလေးတွေဖြစ်ကြတဲ့ နန်းမွေခမ်း၊ နန်းလပြည့်ဝန်းတို့ ထိခိုက်ဒဏ်ရာတွေရကြတာလို့ သိရပါတယ်။
ရွာထဲ လက်နက်ကြီးကျပြီး လူထိခိုက်ဒဏ်ရာရတာတွေကြောင့် ရွာသားတွေ ညတွင်းချင်းပဲ ထွက်ပြေးတိမ်းရှောင်ကြရသလို ဒဏ်ရာရသူမိသားစုကိုလည်း ပင်လောင်းဆေးရုံကို သယ်ယူပို့ဆောင်ခဲ့ကြတယ်လို့ သိရပါတယ်။
အလားတူ ဟံတနှားရွာမှာလည်း လက်နက်ကြီးထိမှန်လို့ အမျိုးသား တစ်ဦးသေဆုံးတဲ့သတင်းရရှိပေမယ့် အခင်းဖြစ်စဉ် အသေးစိတ်ကို သိရှိရခြင်းမရှိသေးပါဘူး။ ပင်လောင်း-ဖယ်ခုံနယ်စပ် ဆောင်လန်ရွာမှာတော့ လက်နက်ကြီးကျလို့ အိမ်တွေ ပျက်စီးကုန်တယ်လို့ သိရပါတယ်။
ရက်ပိုင်းအတွင်း ဖြစ်ပွားနေတဲ့ တိုက်ပွဲတွေမှာ စစ်ကောင်စီနဲ့ လက်အောက်ခံ PNO တွေဟာ လက်နက်ကြီ၊ ဒရုန်းတွေနဲ့ အနီးဝန်းကျင်ရွာတွေကို လက်နက်ကြီးနဲ့ပစ်ခတ်နေလို့ ပင်လောင်း၊ နမ့်ဖာမူ၊ ဗန်းမောက်၊ လဲလောင်း၊ ပင်စုံ၊ ဆောင််လန်ဖက်ကျေးရွာတွေ ရှောင်ထွက်နိုင်ရေး ပြည်သူ့ကာကွယ်ရေးတပ်ဖွဲ့က အသိပေးလျက်ရှိတယ်လို့ သိရပါတယ်။
MK-012
