မဲခေါင် ဇွန် ၁၉
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ် တောင်ဘက်ပိုင်းမှာ စစ်ကောင်စီ၊ ပအိုဝ်းပြည်သူ့စစ်(PNA) ပူးပေါင်းတပ်တွေနဲ့ ပအိုဝ်းအမျိုးသား လွတ်မြောက်ရေးတပ်မတော် (PNLA)တို့အကြား ပြင်းထန်တိုက်ပွဲ ဖြစ်ပွားနေတယ်လို့ ဒေသတွင်း သတင်းအရင်းအမြစ်တွေက ပြောပါတယ်။
မနေ့ ဇွန် ၁၈ ကတည်းက တိုပ်ပွဲပြင်းထန်နေတာဖြစ်ပြီး ပင်လောင်းမြို့နယ် တောင်ဘက်ပိုင်းက ကျေးရွာ ၃၀ ခန့်ဟာ ဖယ်ခုံမြို့နယ်အနောက်ဘက်ခြမ်းနဲ့ တောတောင်နေရာတွေထဲကို ထွက်ပြေးတိမ်းရှောင်နေရတယ်လို့ ဆိုပါတယ်။
“ဘာမှတောင်မယူနိုင်ဘူး။ လက်နက်ကြီးကျတာနဲ့ ပြေးရတာပဲ။ ဘယ်နှယ်ရက် ကြာဦးမလဲမသိဘူး။ ရှောင်ရတာလည်း ခဏခဏဆိုတော့ စိတ်ကုန်လာပြီ” ပင်လောင်းဒေသခံ တစ်ဦးက လို့ ပြောပါတယ်။
ပင်လောင်းမြို့နယ် တောင်ဘက်ခြမ်းက ဒေသခံတွေဟာ မြို့ထဲကိုတိမ်းရှောင်ချင်ပေမယ့် ဆောင်းပြောင်းဂိတ်မှာ စစ်ကောင်စီတပ်က ပိတ်ဆို့ထားပြီး ဂျာမဏီလမ်းက ထွက်မယ်ဆိုရင်လည်း နန်းဖာမူဘက်မှာလဲ တိုက်ပွဲဖြစ်နေတာကြောင့် ပိတ်မိနေသူတချို့ရှိတယ်လို့ ဆိုပါတယ်။
လက်ရှိ တိမ်းရှောင်နေသူတွေဟာ ပင်လောင်းဒေသခံတင်မဟုတ်ဘဲ ကရင်နီပြည်နဲ့ ဆီဆိုင်ကဒေသခံတွေလည်း ပါဝင်နေတာကြောင့် ထပ်ဆင့်စစ်ဘေးရှောင်နေရသူတွေ ဖြစ်ပြီး အကူအညီတွေ လိုအပ်နေတယ်လို့ သိရပါတယ်။
“ဆောင်းပြောင်း၊ နောင်ဝိုး၊ ဗန်းမောက်ဘက်တွေမှာ ဖြစ်နေတယ်။ ဗန်းမောက်မှာတော့ လက်နက်ကြီးကျလို့ စစ်ဘေးရှောင် ၃ ယောက် ဒဏ်ရာပြင်းတယ်။ အသေးစိတ်ကတော့ စုံစမ်းနေတုန်းပဲ။ ထပ်ပြီးတင်ပြသွားဖို့ ရှိပါတယ်” လို့ ရှေ့တန်းမြေပြင်အရင်းအမြစ်တစ်ဦးက ပြောပါတယ်။
စစ်ကောင်စီပူးပေါင်းတပ်တွေဟာ ဆောင်းပြောင်းကျေးရွာဘက်မှာ အထိုင်ချပြီး လက်နက်ကြီး ပစ်ခတ်နေတာကြောင့် ပြည်သူ ၅ ဦးထက်မနည်း ပြင်းထန်ဒဏ်ရာရရှိနိုင်တဲ့အပြင် နေအိမ်ပျက်စီးမှုတွေလည်း ရှိနိုင်တယ်လို့ တော်လှန်ရေးအင်အားစု တာဝန်ရှိသူတွေက ခန့်မှန်းပါတယ်။
မေလ ဒုတိယပတ်ကတည်းက စစ်ကောင်စီတပ်တွေဟာ အင်အား ၅၀၀ နဲ့ ဆီဆိုင်၊ ပင်လောင်းဘက်ကို စစ်ကြောင်းထိုးလာပြီး အဲ့ဒီကနေတဆင့် လွိုင်ကော်မြို့ကို ချီတက်သွားဖို့ စီစဥ်နေတယ်လို့ ဒေသတွင်း စစ်ရေးသတင်းအရင်းအမြစ်တွေဆီက သိရပါတယ်။
MK014
