မဲခေါင် ဇွန် ၁၃
စစ်ကောင်စီဟာ ပြီးခဲ့တဲ့ရက်ပိုင်းအတွင်း လေကြောင်းနဲ့ ဒရုန်းတပ်ဖွဲ့တွေအပါအဝင် အင်အား ၁၅၀၀ ကျော်ကို လားရှိုးကို ပို့ဆောင်ခဲ့တာအပြင် တန့်ယန်း၊ မိုင်းရယ်ဘက်က စစ်ယာဉ်တန်းတွေနဲ့ အင်အားအများအပြား ပို့ဆောင်ပြီး ကျောက်မဲ၊ သီပေါ၊ နောင်ချိုနဲ့ မူဆယ်တွေမှာ စစ်ရေးပြင်ဆင်မှုတွေလုပ်နေခဲ့တယ်လို့ ဒေသခံတွေနဲ့ စစ်သတင်းအရင်းအမြစ်တွေထံက သိရပါတယ်။
ယမန်နေ့ ဇွန်လ ၁၂ ရက်နေ့ ညနေပိုင်းကပဲ နမ္မတူနဲ့ သီပေါကြားကို ကားလမ်းကို မြောင်းတူးပြီး ဖျက်ဆီးလိုက်သလို အနီးက ပန်နေရွာမှာလည်း စစ်ကောင်စီက ကတုတ်ကျင်းများတူးထားပြီး သီပေါမြို့တွင်း မြို့ပြင် ပတ်ပတ်လည်မှာ ခံစစ်အနေအထား စစ်ရေးပြင်ဆင်နေတာဖြစ်ပြီး ဌာနဆိုင်ရာ ရုံးတွေနဲ့ စာသင်ကျောင်းတွေ အချိန်မရွေးပိတ်ပြီး ဝန်ထမ်းတွေကို စစ်ရှောင်နိုင်ဖို့ သတိပေးနေတာလဲရှိတယ်လို့ သိရပါတယ်။
“ဓာတ်မီး၊ ဆေးဝါးနဲ့ အဝတ်အစားအနည်းငယ်နဲ့ အရေးကြီးတဲ့ စာရွက်စာတမ်းတွေ အဆင်သင့်လုပ်ထားတယ်၊ အချိန်မရွေးရှောင်ဖို့ပေ့ါလေ၊ ဘယ်တော့ ဖြစ်မလဲလို့ တထိတ်ထိတ်နဲ့နေနေရတာ၊ ဒီနေ့တော့ ကလေးတွေ ကျောင်းကပြန်လွှတ်တာမရှိဘူး”လို့ သီပေါက Non-CDM ဝန်ထမ်း ၁ဦးက မဲခေါင်သတင်းဌာနကိုပြောပါတယ်။
ရှမ်းပြည်နယ်မြောက်ပိုင်းမှာ ၁၀၂၇ စစ်ဆင်ရေးအတွင်း ကျန်ရှိခဲ့တဲ့ မန္တလေး-မူဆယ်လမ်းမကြီးပေါ်က မြို့တွေ အနီးမှာ စစ်ကောင်စီနဲ့ တော်လှန်ရေးလက်နက်ကိုင်တပ်တွေ နှစ်ဖက်အင်အားဖြည့် စစ်ရေးပြင်ဆင်နေတဲ့အတွက် ဒေသခံတွေ အထူးစိုးရိမ်ထိတ်လန့်နေကြတာဖြစ်ပါတယ်။
ရှမ်းမြောက်က မြို့တွေဖြစ်တဲ့ မူဆယ်နဲ့ လားရှိုးမှာ စစ်ကောင်စီက ဒရုန်းတပ်တွေအပါအဝင် အင်အားဖြည့်တင်းထားသလို တော်လှန်ရေးတပ်တွေဖြစ်တဲ့ MNDAA(ကိုးကန့်) သိမ်းပိုက်ထားတဲ့ ဒေသတလျှောက် အနီးဝန်းကျင် အင်အားဖြည့်နေရာယူထားပြီး သီပေါ၊ ကျောက်မဲ၊ နောင်ချို မြို့နယ်များအတွင်း TNLA(တအာင်း) အင်အားအများအပြား ရောက်ရှိလာနေပြီး မိုးကုတ်၊ မိုးမိတ်ဘက်ကိုလည်း ဆက်လက်ပြီး အင်အားတွေဖြန့်ကျက်နေတယ်လို့ ခိုင်မာတဲ့ စစ်ရေးသတင်းအမြစ်တွေထံက သိရပါတယ်။
“ကျမ သိန္နီပြန်ဖို့တောင် ကားပြောပြီးသား အခုက လမ်းဖျက်တာလားမသိဘူး၊ လမ်းကတော့ မိုးကျကတဲက ပျက်ပြီးသားလေ သတင်းတွေကြောင့် ပြန်လို့မရလို့ ဘုန်းကြီးကျောင်းမှာ ဆက်နေနေရတယ်”လို့ သိန္နီက စစ်ဘေးရှောင် ၁ ဦးက မဲခေါင်သတင်းဌာနကို ပြောပါတယ်။
လားရှိုး-မိုင်းလီ-သိန္နီ၊ လားရှိုး-မိုင်းယော် လမ်းကြောင်းမှာလည်း MNDAA(ကိုးကန့်) နဲ့ စစ်ကောင်စီကြား စစ်ရေးတင်းမာလာပြီး လမ်းတွေပိတ်လိုက်တာအပြင် မိုင်းလီတံတားကျိုးသွားလို့ ခရီးသွားနဲ့ဒေသခံပြည်သူတွေ သွားလာမယ်ဆိုရင် သေချာစုံစမ်းပြီးမှသွားလာကြဖို့ သတိပေးနေကြပါတယ်။
လားရှိုး-မိုင်းယော်ကြားက ကောင်းဟုန်ရွာမှာ စစ်ကောင်စီတပ်ရှိနေပြီး MNDAA(ကိုးကန့်) က ကောင်းခမ်းရွာဘက်မှာ အင်အားရာချီရောက်နေပြီး မိုင်းလီဘက်မှာ ဒရုန်းတွေပါတဲ့ အင်အား ၄၀၀ ကျော်ရောက်နေတယ်လို့ စစ်သတင်းအရင်းအမြစ်တွေထံကသိရပါတယ်။
လားရှိုးအနီး ၉ မိုင်မှာ စစ်ကောင်စီတပ်တွေ ရာနဲ့ချီ ဖြန့်ကျက်ထားသလို လားရှိုးက စစ်ကောင်စီရဲ့ ရမခတိုင်းစစ်ဌာနချုပ်၊ မူဆယ်က တပ်မ ၉၉ ၊ ကျောက်မဲက စကခ ၁ တို့ဆီကို ဒရုန်းတွေအပါအဝင် လက်နက်ခဲယမ်းအမြောက်အများနဲ့ တပ်အင်အားတွေ ပြည်မက တက်လာပြီးအင်အားတွေဖြည့်နေတာ ရှိနေတယ်လို့ လားရှိုး၊ ကျောက်မဲနဲ့ မူဆယ်ဒေသခံတွေဆီက သိရပါတယ်။
နှစ်ဖက်တပ်တွေ စစ်ရေးပဋိပက္ခရင်ဆိုင်ပြင်ဆင်ထားမှုဟာ အင်အား ထောင်ချီရှိနေသလို ဝေဟင်၊ မြေပြင် ကလည်း တိုက်ပွဲတွေကြိမ်းသေဖြစ်ပွားလာမှဖြစ်လို့ဒေသခံလူထုကတော့ ၁၀၂၇ စစ်ဆင်ရေးရဲ့အဆက် တိုက်ပွဲတွေ ပြင်းထန်စွာဖြစ်လာတော့မယ့် စစ်ရေးလှုပ်ရှားမှု တွေကြောင့် ကြိုတင်စစ်ဘေးရှောင်နိုင်ရေး ပြင်ဆင်ထားနေကြတယ်လို့ သိရပါတယ်။
MK-012
