မဲခေါင် မေ ၂၃
မြောက်ပိုင်းညီနောင်မဟာမိတ် ၃ဖွဲ့ရဲ့ 1027 စစ်ဆင်ရေးအပြီးမှာ စစ်မှုထမ်းဆောင်ဖို့ တအာင်းလူငယ်တွေက သူတို့ရဲ့သဘောဆန္ဒနဲ့လာရောက်ပူးပေါင်းကြတာဖြစ်တယ်လို့ TNLA ပြောရေးဆိုခွင့်ရှိသူကဆိုပါတယ်။
ယမန်နေ့က ကွတ်ခိုင်မြို့မှာ TNLA အခြေခံစစ်သင်တန်း အပတ်စဥ် ၆၅က သင်တန်းသား ၁၀၀၀ နီးပါးရဲ့ စစ်ရေးပြလှုပ်ရှားနေမှုကို လူမှုကွန်ရက်မှာတွေ့ခဲ့ရပြီးတော့ အဆိုပါသင်တန်းသားတွေက သူတို့ရဲ့သဘောဆန္ဒနဲ့တပ်ဖွဲ့ကိုဝင်ခဲ့တာဖြစ်ပြီးတော့ တအာင်းလူမျိုးတွေသာဖြစ်တယ်လို့ ပြောရေးဆိုခွင့်ရှိတဲ့ လွဲ့ယေဦးကပြောပါတယ်။
“1027 စစ်ဆင်ရေးအပြီးမှာ မိမိတို့သဘောဆန္ဒနဲ့ပူးပေါင်းကျတဲ့သူတွေများပါတယ်။ သင်တန်းသားတွေက ဒီဒေသတွင်းက အစုံကလူငယ်တွေပူးပေါင်းကျပါတယ်။ အရေအတွက် အတိအကျတော့ မသိနိုင်သေးပါဘူး။ လူထုဆန္ဒကသာအရေးကြီးပါတယ်” လို့ဆိုပါတယ်။
သင်တန်းသားတွေထဲက သူတို့ကျွမ်းကျင်မှုနဲ့ဝါသနာ အပေါ်ကိုလိုက်ပြီး TNLAနယ်မြေထဲမှာရှိတဲ့ ကဏ္ဍအလိုက်တာဝန်ခွဲဝေပေးမယ်လို့ဆိုပါတယ်။ စစ်ကောင်စီရဲ့စစ်မှုထမ်းဥပဒေထုတ်ပြန်ခဲ့ပြီးတဲ့နောက် တပ်ဖွဲ့ထဲဝင်ရောက်မှုတိုးတက်လာတယ်လို့ပြောပါတယ်။
“တော်လှန်ရေးအဖွဲ့တွေနဲ့ပူးပေါင်းမလား စကစနဲ့သွားမလားဆိုတာက လူထုဆန္ဒ ပါလို့” ပြောပါတယ်။
TNLA ထိန်းချုပ်ထားတဲ့ နမ့်ဆန်၊ မန်တုံ၊ နမ္မတူ၊ ကွတ်ခိုင်၊ နမ့်ခမ်း၊ မိုင်းငေါ့နှင့် မိုင်းလုံ မြို့နယ် အပါအဝင် TNLA ထိန်းချုပ်ဒေသ အတွင်းက Non-CDM ဝန်ထမ်းတွေရဲ့ လုပ်ငန်းတာဝန် တွေကို ရပ်ဆိုင်းလိုက်ပြီလို့ မေလ ၁၅ ရက်နေ့က ထုတ်ပြန်ထားပါတယ်။ အဆိုပါမြို့နယ်တွေမှာ PSLF/TNLA ရဲ့ အုပ်ချုပ်မှု ယန္တရားတွေပြန်လည်လည်ပတ်နေပြီဖြစ်ပါတယ်။
Non-CDM ဝန်ထမ်းတွေ စစ်ကောင်စီနဲ့ ဆက်လက် ပူးပေါင်းမယ်ဆိုရင် ဖမ်းဆီးအရေးယူသွားမယ်လို့ TNLA က ဆိုထားပေမယ့် အရေးယူမှုတစုံတရာကို ထုတ်ဖော်ပြောဆိုတာမရှိသေးပါဘူး။ TNLA အနေနဲ့ညီနောင်မဟာမိတ်တွေနဲ့ နယ်မြေအငြင်းပွားမှုနဲ့ ပတ်သတ်လို့ ပြဿနာတစုံတရာမရှိပဲ တွေ့ဆုံဆွေးနွေးခြင်းနဲ့သာအဖြေရှာမယ်လို့ ဆိုပါတယ်။
CJ-015
