မဲခေါင်၊ ဧပြီ ၂၇
မန္တလေးတိုင်း၊ နောင်ချိုမြို့နယ်၊ သရက်ကုန်းကျေးရွာမှာရှိတဲ့စစ်ကောင်စီစခန်းကို မန္တလေး PDF (MDY-PDF) တို့က သိမ်းပိုက်နိုင်ခဲ့ပြီး တစ်ပတ်တာတိုက်ပွဲအတွင်း စစ်ကောင်စီတပ်သား ၅၉ ဦး သေဆုံးခဲ့တယ်လို့ အမျိုးသားညီညွတ်ရေးအစိုးရ (NUG)၊ ကာကွယ်ရေး၀န်ကြီးဌာနက ဒီနေ့ ဧပြီ ၂၇ ရက်မှာ ထုတ်ပြန်ထားပါတယ်။
ပြင်ဦးလွင်မြို့၊ ဗိုလ်သင်တန်းကျောင်း (DSA) နဲ့ ၁၀ မိုင်အကွာမှာရှိတဲ့ နောင်ချိုမြို့နယ်၊ သရက်ကုန်းကျေးရွာက စစ်ကောင်စီစခန်းကို ဧပြီလ ၁၅ ရက်နေ့မှာ MDY-PDF က စခန်းသိမ်းပိုက် ရရှိပြီးတဲ့နောက်ပိုင်း ဧပြီလ ၁၉ ရက်နေ့ကစလို့ စစ်ကောင်စီဘက်က အပြင်းအထန် ပြန်လည်ထိုးစစ်ဆင်ခဲ့တာကြောင့် ကျေးရွာတချို့ ထိခိုက်မှုရှိတယ်လို့ ဆိုပါတယ်။
တိုက်ပွဲမှာ ဧပြီလ ၁၉ ရက်နေ့ကနေ ၂၅ ရက်နေ့အထိ ဖြစ်ပွားခဲ့ပြီး ကျေးရွာတွေအတွင်း လက်နက်ကြီး ၈ ကြိမ် ကျရောက် ပေါက်ကွဲခဲ့တယ်လို့ NUG ရဲ့ ထုတ်ပြန်ချက်အရ သိရပါတယ်။
တိုက်ပွဲကာလ တစ်ပတ်တာအတွင်း စစ်ကောင်စီဘက်က လေကြောင်းတိုက်ခိုက်မှု ၃၂ ကြိမ်ပြုလုပ်ခဲ့ပြီး စစ်ရေးပစ်မှတ်မဟုတ်တဲ့ ပါဟက်၊ ဇာလီ၊ သရက်ကုန်း စတဲ့ကျေးရွာတွေက ဘုန်းကြီးကျောင်းတွေ ထိခိုက်မှု ရှိခဲ့တယ်လို့ NUG ရဲ့ ထုတ်ပြန်ချက်မှာ ဖော်ပြထားပါတယ်။
တိုက်ပွဲကာလ တစ်လျှောက် MDY-PDF ဘက်က တပ်ဖွဲ့ဝင် ၂ ဦး ကျဆုံးခဲ့ပြီး စစ်ကောင်စီဘက်က ၅၉ ဦး သေဆုံးတာအပြင် ၄၀ နီးပါး ထိခိုက်ဒဏ်ရ ရခဲ့တာကို မျက်မြင် အတည်ပြုတယ်လို့ မြေပြင်သတင်းအရင်း အမြစ်တွေဆီက သိရပါတယ်။
MK-015
