မဲခေါင်၊ ဧပြီ ၁၁
နေပြည်တော် အေလာလေတပ်စခန်းကို ၁၀၇ မမ ရှော့တိုက်ဒုံး ၇ လုံးနဲ့ ဒီနေ့ မနက်အစောပိုင်းက အောင်မြင်စွာတိုက်ခိုက်ခဲ့တယ်လို့ Mountain Knights- Civilian Defense Force (MKCDF) ပြန်ကြားရေး တာဝန်ခံက ပြောပါတယ်။
ဒီလိုတိုက်ခိုက်ခဲ့လို့ လေတပ်အရာရှိအပါအဝင် အောက်ခြေစစ်သားတွေနဲ့ အဆောက်အဦတွေလည်း ထိခိုက်ပျက်စီးခဲ့တယ်လို့ MKCDF ပြန်ကြားရေးတာဝန်ခံက ပြောပါတယ်။
“ဒီမစ်ရှင်ဖြစ်ဖို့ တစ်လကျော် အချိန်ယူပြင်ဆင်ခဲ့ရပါတယ်၊ ဒီမတိုင်ခင် လောလောလတ်လတ်မှာတင် အေလာလေဆိပ်က တိုက်ခိုက်ခံတားရတာလည်းရှိတော့လုံခြုံရေးက အတော်ကိုကြပ်ပါတယ်။ ဒါကြောင့် ကျနော်တို့ မူလသတ်မှတ်ထားတဲ့ရက်ထက် အများကြီးနောက်ကိုဆုတ်ပြီးလုပ်ခဲ့ရတာပါ၊ ညကလည်း ညဦးပိုင်းကတည်းက လုပ်ဖို့ပါပဲ၊ မိုးတွေအရမ်းရွာနေလို့ မနက်ပိုင်းမှလုပ်ဖြစ်ခဲ့တာပါ၊ ခက်တာတော့ အတော်ခက်ခက်ခဲခဲလုပ်ခဲ့ရပါတယ်” လို့ MKCDF ပြန်ကြားရေးတာဝန်ခံက မဲခေါင်သတင်းဌာနကို ပြောပါတယ်။
ရှော့တိုက်ဒုံးတိုက်ခိုက်မှုကြောင့် အရာရှိ ၅ ဦးအပါ ၁၇ ဦးသေဆုံးပြီး လေယာဥ်နဲ့ စစ်ကားသုံးစီး ပျက်စီးတယ်လို့ MKCDF က ပြောပါတယ်။ ဒီထိခိုက်သေဆုံးမှုကို မဲခေါင်သတင်းဌာနအနေနဲ့ သီးခြားအတည်ပြုချက်တော့ မရသေးပါဘူး။
နေပြည်တော်အေလာ လေဆိပ်ဟာ စစ်ကောင်စီရဲ့ အားထားရတဲ့ လေဆိပ်မှာပါဝင်ပြီး ကရင်နီ၊ ကရင်ပြည်နယ်နဲ့ ရှမ်းပြည်တောင်ပိုင်းတို့ကို ဗုံးကြဲတိုက်ခိုက်နေတဲ့ တိုက်လေယာဥ်တွေ ထားရှိရာနေရာလည်း ဖြစ်ပါတယ်။
ဒီနေ့မနက်ပိုင်းမှာ အေလာမြို့အနီးမှာ မပေါက်ကွဲသေးတဲ့ ရှော့တိုက်ဒုံး ၃ လုံးနဲ့ ပေါက်ကွဲပြီး ရှော့တိုက်ဒုံး ၄ လုံးကို တွေ့ရှိခဲ့ကာ ပေါက်ကွဲသံတွေလည်း ကြားရကြောင်း စစ်တပ်ဝါဒဖြန့်သတင်းတွေမှာ ဖော်ပြထားပါတယ်။
ဒီတိုက်ခိုက်မှုကို Brave Warriors for Myanmar (BWM) ပါ ပါဝင်ခဲ့ပြီး MKCDF ဖွဲ့စည်းခြင်း ၂ နှစ်ပြည့်အဖြစ် တိုက်ခိုက်ခဲ့တာလို့ သိရပါတယ်။
နေပြည်တော်အေလာလေဆိပ်ကို ယခု ဧပြီလ ၄ ရက်နေ့ကလည်း အမျိုးသားညီညွှတ်ရေးအစိုးရ (NUG) ဒရုန်းပူးပေါင်းတပ်ဖွဲ့တွေက တိုက်ခိုက်ခဲ့ပါသေးတယ်။
