မဲခေါင်၊ ဧပြီ ၁၀
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်တစ်ခုလုံးမှာ မိုင်းရှင်းလင်းဖို့အတွက် ပအိုဝ်းပြည်သူ့စစ် (PNA)က တစ်အိမ် ၁ သိန်း ကောက်ခံမယ်ဆိုပြီး ညွှန်ကြားထားတယ်လို့ ဒေသခံတွေက ပြောပါတယ်။
ဧပြီလအကုန်ခန့်မှာ စတင်ကောက်ခံမှာ ဖြစ်ပြီး လက်ရှိဒေသခံတွေတင်မက အဝေးရောက် စစ်ဘေးရှောင်တွေကိုလည်း ထည့်ဝင်ဖို့အတွက် ဖိအားပေးနေတယ်လို့ ဆိုပါတယ်။
PNA နဲ့ နီးစပ်သူ တစ်ဦးက “နှစ်တိုင်း ဒီပုံစံပါပဲ။ ကောက်ပြီး လုပ်စားတာပေါ့နော်။ ဘယ်နေရာမှာ ထောင်ထားတဲ့ မိုင်းကို သူတို့က ဘယ်လို ရှင်းပေးတယ်ဆိုတာ ပြည်သူက မသိနိုင်ဘူးလေ။ ဘယ်သူမှလည်း မတွေ့ရဘူး။ သူတို့ လုပ်ဇာတ်တွေပေါ့” လို့ ပြောပါတယ်။
ဆီဆိုင်ဒေသခံတွေအနေနဲ့ အလုပ်အကိုင်ရှားပါးပြီး စစ်ဘေးရှောင်နေရတဲ့အချိန်မှာ ထည့်ဝင်ဖို့ခက်ခဲနေတဲ့အပြင် မထည့်ဝင်တဲ့သူတွေကို နည်းမျိုးစုံနဲ့ အရေးယူမယ်လို့ ခြိမ်းခြောက်နေတာကြောင့် ရှာကြံပြီး ထည့်ဝင်ဖို့ ပြင်ဆင်နေရတယ်လို့ ဆိုပါတယ်။
ဒေသခံ တစ်ဦးက “သူတို့က မထည့်တဲ့ အိမ်တွေကို မူးယစ်ဆေး အကြောင်းပြဖမ်းမယ်။ တစ်ခါတည်း ရှေ့တန်းပို့မယ်။ သူတို့ နည်းမျိုးစုံ ဖိအားပေးတာပေါ့နော်။ အခုလည်း အကုန်လုံးက ကြောက်လန့်နေရတယ်” လို့ ပြောပါတယ်။
အခုလိုမျိုးကိစ္စရပ်တွေကို ပြည်သူ့စစ်ခေါင်းဆောင်တွေကိုယ်တိုင်က အမိန့်ပေးပြုလုပ်ခိုင်းနေတာဖြစ်ပြီး ပြည်သူလူထုအနေနဲ့ တိုင်တန်းစရာ နေရာတွေမရှိဘဲ ရင်ဆိုင်ဖြေရှင်းနေရတဲ့အနေအထားမှာ ရှိနေပါတယ်။
အလားတူ ၂၀၂၂ ခုနှစ်တုန်းကလည်း ပင်လောင်းဖက်မှာ PNA က မိုင်းရှင်းဖို့အတွက် ငွေကြေးကောက်ခံဖူးတယ်လို့ ဒေသခံတွေက ပြောပါတယ်။
MK-015
