မဲခေါင်၊ ဧပြီ ၁
ပအိုဝ်းပြည်သူလူထုရဲ့ အသည်းနှလုံးလို့ တင်စားကြတဲ့ ဆီဆိုင်မြို့ပေါ်က ဇဝနာရာမ ပရိယတ္တိ စာသင်တိုက်ကို စစ်ကောင်စီက လက်နက်ကြီးနဲ့ ဒရုန်းတွေ အသုံးပြုပြီး မတ်လ ၂၉ ရက်ညပိုင်းက ဖြိုချဖျက်ဆီးလိုက်တယ်လို့ ဒေသခံတွေက ပြောပါတယ်။
ဇဝနာရာမ ပရိယတ္တိ စာသင်တိုက်ဟာ ဆီဆိုင်မြို့ဂုဏ်ဆောင် ဿနာအဆောက်အဦး ဖြစ်တဲ့အပြင် သံဃာပါး ၅၀၀ ကျော်ကို ပရိယတ္တိ ဗုဒ္ဓစာပေ သင်ကြားပေးနေတဲ့ ဘုန်းကြီးကျောင်းလည်း ဖြစ်တာကြောင့် ပအိုဝ်းပြည်သူတွေ လေးစားအားထားရတဲ့ ဘုန်းကြီးကျောင်းတိုက်ဖြစ်တယ်လို့ ပအိုဝ်းလူမျိုး ဒေသခံတစ်ဦးက ပြောပါတယ်။
“အဲဒီကျောင်းတိုက်ကို စကစနဲ့ ပြည်သူ့စစ်တချို့က ဖြိုချဖို့စာတင်တယ်။ အဲဒီညမှာပဲ လက်နက်ကြီးတွေ၊ ဒရုန်းတွေနဲ့ ပစ်ချခံလိုက်ရတာ။ နောက်နေ့မနက်ကျတော့ ကိုယ်ပိုင်အုပ်ချပ်ရေးအဖွဲ့နဲ့စကစတွေလာပြီး ဓာတ်ပုံရိုက်တင်လိုက်တာပဲ။ ပျက်သွားပြီဆိုတာ။ ဒီကျောင်းကပအိုဝ်းလူထုရဲ့ အသဲနှစ်လုံးလို့ပြောရင်မမှားဘူး။ ဆရာတော်ကအမျှော်အမြင်အရမ်းကြီးတာ ဘက်မလိုက်ဘူး” လို့ သူက ပြောပါတယ်။
စစ်ကောင်စီအနေနဲ့ ဘုန်းကြီးကျောင်းကို ဒီလိုဖြိုချတာဟာ PNLA ဘက်ကို အပြစ်လွှဲချချင်တာကြောင့်ဖြစ်တယ်လို့ တော်လှန်ရေးတပ်ဖွဲ့တွေဘက်က သုံးသပ်ပါတယ်။
ဆီဆိုင်မြို့မှာ စစ်ကောင်စီရဲ့ လက်နက်ကြီးနဲ့ ဒရုန်းပစ်ခတ်မှုကြောင့် ဆီဆိုင်ဘုန်းကြီးကျောင်းအပါအဝင် လူနေအိမ် ၅၀၀ နီးပါးခန့် မီးလောင်ပြာကျ ပျက်စီးခဲ့တယ်လို့ ဆီဆိုင်တိုက်ပွဲ လေ့လာစောင့်ကြည့်သူတွေက ပြောပါတယ်။
ဇန်နဝါရီလ နောက်ဆုံး အပတ်ကနေ မတ်လကုန်အထိ ၂ လကျော် ကာလအတွင်း စစ်ကောင်စီရဲ့ တိုက်လေယာဉ်၊ ရဟတ်ယာဉ်၊ ဒရုန်းနဲ့ လက်နက်ကြီး ပစ်ခတ်မှုတွေကြောင့် ထိခိုက်ပျက်စီးခဲ့တာပဲ ဖြစ်ပါတယ်။
ဆီဆိုင်မြို့တွင်းကို ပစ္စည်းပြန်ယူတဲ့ စစ်ဘေးရှောင် တစ်ဦးက “အကုန်လုံးနီးပါး ရစရာ မရှိအောင်ကို ဖြစ်သွားတာပေါ့နော်။ တချို့ ကျောင်းဆောင်တွေက မီးလောင်ဗုံး ထိတယ်။ တချို့က လေကြောင်းပစ်လို့ ဗုန်းဒစ်၊ တုန်ခါမှု ဒဏ်တွေနဲ့ အတွင်းရော အပြင်ရော အကုန်ထိကုန်တာပေါ့လေ” လို့ ပြောပါတယ်။
စစ်ကောင်စီရဲ့ အခုလို လုပ်ရပ်ဟာ တော်လှန်ရေး အင်အားစုတွေနဲ့ ပြည်သူလူထုအကြား သပ်လျို သွေးခွဲတာဖြစ်ပြီး ပြည်သူ လူထုအနေနဲ့ စစ်ကောင်စီရဲ့ ဝါဒမှိုင်းတွေကို သတိထားကြဖို့ ပအိုဝ်းအမျိုးသား လွတ်မြောက်ရေး တပ်မတော် (PNLA)ရဲ့ စစ်ဘက်ဆိုင်ရာ ပြောရေးဆိုခွင့်ရှိသူ တစ်ဦးက ပြောပါတယ်။
“ဒီလိုမျိုး အဆောက်အဦးတွေကို ကြီးကြီးမားမား ထိခိုက်ပျက်စီးစေလိုတဲ့ ပေါင် ၅၀၀ ဗုံးတွေက တော်လှန်ရေး အဖွဲ့တွေမှာ မရှိပါဘူး။ ဒါကို ပြည်သူကလည်း သိပြီးသား ဖြစ်ပါတယ်။ စစ်အာဏာရှင်နဲ့ ပြည်သူ့စစ်ကို ဝါဒဖြန့်ပေးနေတဲ့ သူတွေလည်း ကျွန်တွေက ကျွန်အလုပ် လုပ်တာ ဖြစ်တဲ့အတွက် ဘာမှမထူးဆန်းပါဘူး” လို့ သူကပြောပါတယ်။
၂ လကျော်တိုက်ပွဲ ကာလအတွင်း ဆီဆိုင်မြို့ရဲ့ ၃ ပုံ ၂ ပုံခန့်ဟာ မီးလောင်ပြာကျ ပျက်စီးခဲ့ပြီး စစ်ကောင်စီ၊ ပအိုဝ်းပြည်သူ့စစ် (PNA) ပူးပေါင်းတပ်တွေဘက်က မြို့ကိုပြန်ရဖို့ ကြိုးစားနေတာကြောင့် နေ့တိုင်းနီးပါး PNLA တပ်တွေနဲ့ တိုက်ပွဲ ဖြစ်ပွားနေတယ်လို့ စုံစမ်း သိရပါတယ်။
CJ – 007
