မဲခေါင်၊ မတ် ၅

ကရင်နီပြည်နယ်၊ ဒီးမော့ဆိုမြို့နယ်က ပြည်သူတွေဟာ စစ်ကောင်စီတပ်နဲ့ ပြည်သူ့ကာကွယ်ရေးတပ်တွေကြား ၂၀၂၁ ခုနှစ် ထိတွေ့တိုက်ပွဲတွေအတွင်း အစောဆုံး စစ်ဘေးရှောင်ခဲ့ကြရတယ်လို့ စစ်ဘေးရှောင်ပြည်သူတွေဆီက သိရပါတယ်။

ခုလက်ရှိအချိန်မှာ ဒီးမော့ဆိုမြို့နယ်က မြို့ပေါ် ရပ်ကွက်နဲ့ကျေးရွာအတွင်း စစ်ကောင်စီတပ် မရှိတော့ပေမယ့် နေရပ်ပြန်နေဖို့ အခက်အခဲရှိနေပြီး နေအိမ်ပြန်ကြည့်တာလောက်ပဲ ပြုလုပ်နေရသေးတ်လို့ ဆိုပါတယ်။

“အိမ်တော့ရှိသေးတယ်။ ပြီးခဲ့တဲ့တပတ်က အိမ်သန့်ရှင်းရေး နည်းနည်းပါးပါး ပြန်လုပ်တာပေါ့နော်။ ပြန်နေလို့တော့ လုံးဝ မရဘူးပြောတယ်။ ဘာလို့ဆို မိုင်းတွေဘာတွေကြောင့် တခုခုဖြစ်မှာဆိုးလို့ပေါ့။ တချို့အိမ်တွေလည်း မရှိတော့ဘူး”လို့ နေအိမ်ပြန်ကြည့်ခဲ့တဲ့ အမျိုးသမီးတဦးက ပြောပါတယ်။

စစ်ကောင်စီတပ်က လွိုင်ကော်မြို့သိမ်းတိုက်ပွဲစတင်ခဲ့တဲ့ နိုဝင်ဘာလ ၁၁ ရက်နေ့ နောက်ပိုင်းကစပြီး ဒီးမော့ဆိုမြို့နယ်ကနေ တပ်ဆုတ်သွားပေမယ့်မြေမြှုပ်မိုင်းအများအပြားကို ဆင်ခဲ့တာကြောင့် ပြည်သူတွေအနေနဲ့ နေရပ်ပြန်နေဖို့ အန္တာရာယ်ရှိတယ်လို့ ကာကွယ်ရေးတပ်ဖွဲ့တွေက ဆိုပါတယ်။

ဒါ့အပြင် စစ်ကောင်စီတပ်ရဲ့ ခမရ ၄၂၇ တပ်ကနေ လက်နက်ကြီးနဲ့ပစ်ခတ်တာတွေရှိနိုင်ပြီး လေကြောင်းကနေ ဗုံးကြဲတိုက်ခိုက်တာတွေရှိနိုင်တဲ့အတွက် နေရပ်ပြန်မနေထိုင်ကြသေးဖို့ တောင်းဆိုထားတာဖြစ်တယ်လို့ သိရပါတယ်။

CJ-004

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)