မဲခေါင်၊ ဖေဖော်ဝါရီ ၉
ရှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာမြို့၊ ထုံးဖို စစ်ဆေးရေးဂိတ်မှာ ဇန်နဝါရီလ နောက်ဆုံး အပတ်လောက်ကတည်းက စပြီး စောင့်ကြပ်နေတဲ့ ရဲနဲ့ စစ်ကောင်စီတပ်သားတွေဟာ လူအင်အား လျော့နည်းလာတယ်လို့ ဖြတ်သွား ဖြတ်လာ တွေ့ရှိသူတွေက ပြောပါတယ်။
စစ်ကောင်စီတပ်ဟာ ဇန်နဝါရီလ ၂၃ ရက်နေ့ကတည်းက ဖြစ်ပွားနေတဲ့ ဆီဆိုင်မြို့တိုက်ပွဲကို လူအင်အား အလုံးအရင်းလိုက် စစ်ကူ ပို့နေရတာကြောင့် စစ်ဆေးရေးဂိတ်မှာ လျော့နည်းသွားတာလို့ တပ်တွင်း ဖရဲသီးတစ်ဦးက ပြောပါတယ်။
“တပ်ဘက်က မလောက်လို့ ရဲတွေလည်း ပို့နေရတယ်။ စစ်ဆေးရေး ဂိတ်လည်း တိုးထားရတော့။ ဒီဘက်ကို လွှတ်လိုက်တာ။ တောင်ကြီးဘက်မှာလည်း ဘာအသံမှ မကြားတာ ကြာပြီဆိုတော့လေ။ ဆီဆိုင်ကိစ္စပြီးမှ အင်အားထပ်ဖြည့်မယ် ထင်တယ်”
အရင်က အဲဒီ စစ်ဆေးရေးဂိတ်ဟာ အငြိမ်းစား စစ်ကောင်စီတပ်သားတွေ ၁၀ ဦးခန့် စောင့်ကြပ်ပေမယ့် လတ်တလောမှာတော့ ရဲ၊ ပျူစောထီးနဲ့ အငြိမ်းစား စစ်မှုထမ်းဟောင်း အပါအဝင် ၄ ဦးလောက်နဲ့ပဲ အစားထိုးထားတယ်လို့ သိရပါတယ်။
ဒါ့အပြင် ထုံးဖိုဂိတ်အကျော် တောင်ကြီး တက်လမ်း “ပ” ကွေ့နေရာက ဆိုင်ကယ်သီးသန့် စစ်ဆေးတဲ့ ဂိတ်ကိုလည်း ရုတ်သိမ်းလိုက်ပြီလို့ ဖြတ်သွား ဖြတ်လာတွေ့ရှိသူ တစ်ဦးက ပြောပါတယ်။
“အရင်က ထုံးဖိုအကျော်မှာ ၆ ယောက်လောက် ဆိုင်ကယ် စစ်တယ်။ အခု စစ်တဲ့နေရာမှာ ဘယ်သူမှ မရှိတော့ဘူး။ ခြံစည်းရိုးခတ်ထားတဲ့ ဂါတ်တဲမှာ တစ်ယောက်ပဲ ကျန်တယ်။ အပြင်မှာတော့ မစောင့်ရဲတော့ဘူး”
ထုံးဖိုဂိတ်မှာ လူအင်အားလျှော့ထားပေမယ့် တောင်ကြီးမြို့ထွက် ၂ မိုင် စစ်ဆေးရေးဂိတ်နဲ့ ကံကြီးရပ်ကွက် မီးရထားသံလမ်း စစ်ဆေးရေးဂိတ်တွေမှာတော့ လူအင်အား အရင်ထက် ၂ ဆတိုးချထားပြီး ဘန်ကာတွေနဲ့ ခံစစ်ပြင်ထားတယ်လို့ မြို့ခံတွေက ပြောပါတယ်။
ဒါ့အပြင် နန်းပန် စစ်ဆေးရေးဂိတ်ကိုလည်း တိုးချဲ့ထားပြီး အခုလို လုပ်ဆောင်နေတာဟာ ဆီဆိုင်နဲ့ ပင်လောင်းဘက်က တက်လာနိုင်တဲ့ ထိုးစစ်တွေကို ပြင်ဆင်ထားတာ ဖြစ်တယ်လို့ တော်လှန်ရေး သတင်းအရင်းအမြစ်တွေက သုံးသပ်ထားပါတယ်။
CJ-007
#MeKongNews
#စစ်ကောင်စီ
#ဆီဆိုင်
#ထုံးဖို
#အင်အား
#စစ်ကူ
