သံချပ်ကာ ၂ စီး ဖျက်ဆီးနိုင်ခဲ့သလို သုံ့ပန်း ၁၁ ယောက် ဖမ်းဆီးထားဟု မန္တလေး PDF ထုတ်ပြန်
မဲခေါင်၊ နိုဝင်ဘာ ၂၇
“တောင်သမန် စစ်ဆင်ရေး” စတင်ခဲ့ချိန်မှ တစ်လပြည့်တဲ့ ဒီနေ့အထိ စစ်ကောင်စီတပ်ဖွဲ့ဝင် ၉၅ ဦး သေဆုံးပြီး၊ မန္တလေး PDF ဘက်မှ ၁၀ ကျဆုံးကြောင်း စစ်ဆင်ရေး တစ်လပြည့်တဲ့ ဒီနေ့ နိုဝင်ဘာ ၂၇ ရက်နေ့မှာ မန္တလေး PDF က ထုတ်ပြန်ပါတယ်။
စစ်ဆင်ရေးအတွင်း စစ်ကောင်စီရဲ့ သံချပ်ကာကား ၂ စီးကို ဖျက်ဆီးနိုင်ခဲ့ပြီး စစ်ကောင်စီတပ်ဖွဲ့ဝင်နဲ့ သူ့လက်အောက်ခံ ပြည်သူ့စစ် ၁၁ ယောက်ကိုလည်း သုံ့ပန်းအဖြစ် ဖမ်းဆီးမိခဲ့တယ်လို့ ဒီနေ့ထုတ်ပြန်တဲ့ အစီရင်ခံစာမှာ ဖော်ပြပါတယ်။
မြောက်ပိုင်းမဟာမိတ်သုံးဖွဲ့ ဖော်ဆောင်တဲ့ “၁၀၂၇ စစ်ဆင်ရေး” နဲ့အတူ “တောင်သမန် စစ်ဆင်ရေး” လို့ အမည်ပေးပြီး မတ္တရာ၊ မိုးကုတ်၊ နောင်ချို၊ ကျောက်မဲမြို့နယ်တွေမှာ တပြိုင်နက်တည်း စစ်ဆင်ရေးဖော်ဆောင်ခဲ့တာလို့ ဆိုပါတယ်။
ရှမ်းပြည်မြောက်ပိုင်း ကျောက်မဲနဲ့နောင်ချိုမြို့နယ်တွေမှာ စစ်ဆင်ရေးဖော်ဆောင်တာ ညီနောင်သုံးဖွဲ့တိုက်ခိုက်တဲ့နေရာတွေဆီ စစ်ကောင်စီစစ်ကူတွေ မလာနိုင်အောင် ဖြတ်တောက်ခဲ့တာဖြစ်ပြီး၊ မတ္တရာနဲ့ မိုးကုတ်မြို့နယ်မှာ တိုက်ခိုက်ခဲ့တာ မန္တလေးသို့ ထိုးဖောက်ဝင်ရောက်ဖို့ တိုက်ခိုက်ခဲ့တာလို့ ဆိုပါတယ်။
စစ်ဆင်ရေးတစ်လအတွင်း တိုက်ပွဲပေါင်း ၃၇ ကြိမ်ဖြစ်ပွားခဲ့ပြီး ကျောက်မဲနဲ့ နောင်ချိုမြို့နယ်အတွင်းမှာ ၂၈ ကြိမ်နဲ့အများဆုံးဖြစ်ပွားခဲ့ပါတယ်။
ဒီစစ်ဆင်ရေးအတွင်း စစ်ကောင်စီတပ်ထံမှ လက်နက် ၁၂၁ လက်နဲ့ ဆက်စပ်ခဲယမ်းအများအပြားကိုလည်း သိမ်းမိခဲ့တယ်လို့ ဆိုပါတယ်။
မန္တလေး PDF နဲ့ ပူးပေါင်းအဖွဲ့တွေ ဖမ်းမိထားတဲ့ သုံ့ပန်းထိန်းသိမ်းထားရာနေရာကို စစ်ကောင်စီက လေကြောင်းနဲ့ ၁ ကြိမ်တိုက်ခိုက်ခဲ့တာကြောင့် သုံ့ပန်း ၄ ဦး သေဆုံးခဲ့တယ်လို့ သိရပါတယ်။
စစ်ဆင်ရေးတစ်လတာမှာ မန္တလေး-လားရှိုး ပြည်ထောင်စုလမ်းမကြီးအပါအဝင် နယ်မြေတချို့ကို ထိန်းချုပ်ထားပြီး စစ်ဆင်ရေးရည်မှန်းချက်အတိုင်း တဆင့်ပြီးတဆင့်လုပ်ဆောင်နေတယ်လို့ ဆိုပါတယ်။
#MeKongNews
#မန္တလေး
#စစ်ဆင်ရေး
#တောင်သမန်
#ထိန်းချုပ်
#သုံ့ပန်း
