မဲခေါင်၊ နိုဝင်ဘာ ၁၅

ကရင်နီပြည်နယ်မှာ နိုဝင်ဘာ ၁၁ ရက်နေ့က စတင်ခဲ့တဲ့ ၁၁.၁၁ စစ်ဆင်ရေး ၄ ရက်တာ အတွင်း စစ်ကောင်စီတပ်သား ၁၁၀ ကျော်ကို သုတ်သင်ထားနိုင်ခဲ့ပြီး စစ်သား ၃၂ ဦး လက်နက်ချခဲ့တယ်လို့ KNDF က ဒီကနေ့ ထုတ်ပြန်ပါတယ်။

လွိုင်ကော် တက္ကသိုလ်မှာ တပ်စွဲထားတဲ့ စစ်ကောင်စီတပ်ရင်း ၂ ရင်းကို ချေမှုန်း တိုက်ခိုက်ခဲ့တဲ့ KNDF စစ်ကြောင်းရဲ့ စစ်ဆင်ရေးမှာ စစ်ကောင်စီ တပ်ရင်းမှူးနဲ့ ဒု-ရင်းမှူး အပါအဝင် တပ်ဖွဲ့ဝင် ၁၁၀ ကျော်ကို သုတ်သင်နိုင်ခဲ့တာလို့ သိရပါတယ်။

၁၁.၁၁ စစ်ဆင်ရေးရဲ့ အစိတ်အပိုင်းအဖြစ် လွိုင်ကော် တက္ကသိုလ်ဝန်း အတွင်း တပ်စွဲထားတဲ့ စစ်ကောင်စီတပ်ကို တိုက်ခိုက်ခဲ့ရာ နိုဝင်ဘာ ၁၃ ရက်နေ့မှာ ခမရ (၄၂၅) တပ်ရင်းမှူးနဲ့ ဒု-ရင်းမှူး အပါအဝင် တပ်ရင်း တစ်ရင်းလုံး နီးပါး သေဆုံးခဲ့ပြီး ခမရ (၆) ရဲ့ အင်အား တစ်ဝက်နီးပါးကို ချေမှုန်းနိုင်ခဲ့တယ်လို့ KNDF က ပြောပါတယ်။

မနေ့ နိုဝင်ဘာ ၁၄ ရက် မနက်ပိုင်းမှာလည်း လွိုင်ကော် တက္ကသိုလ်ဝန်း အတွင်း တပ်စွဲနေတဲ့ ခမရ (၆) တပ်ဖွဲ့ကို အပြီးသတ် ချေမှုန်းတဲ့ စစ်ဆင်ရေး ပြန်လည် စတင်ခဲ့ရာ မနေ့က ညနေပိုင်းမှာ စစ်ကောင်စီတပ်ဖွဲ့ဝင်တွေကို လက်နက်ချ အညံ့ခံဖို့ အခွင့်အရေးပေးခဲ့ပြီး တပ်ခွဲမှူး ကောင်းမြတ်ကို ဦးစီးတဲ့ စစ်ကောင်စီတပ်သား ၃၂ ဦး လက်နက်ချ အညံ့ခံခဲ့တယ်လို့ ဆိုပါတယ်။

KNDF စစ်ကြောင်း အနေနဲ့ ၁၁.၁၁ စစ်ဆင်ရေးအတွင်း စစ်သုံ့ပန်း ၃၈ ယောက်၊ လက်နက်ကြီး၊ လက်နက်ငယ် မျိုးစုံ ၁၂၈ လက်နဲ့ ခဲယမ်းပစ္စည်းတွေကို သိမ်းဆည်းနိုင်ခဲ့တယ်လို့ သိရပါတယ်။

လက်နက်ချ အညံ့ခံတဲ့ စစ်ကောင်စီ သုံ့ပန်းတွေကို စစ်ဖက်ဆိုင်ရာ အက်ဥပဒေနဲ့ သုံ့ပန်းဆိုင်ရာ မူဝါဒတွေအတိုင်း ခံစားခွင့်ပေးထားပြီး ကျန်းမာရေး စောင့်ရှောက်မှု အပြည့်အဝပေးကာ ထိန်းသိမ်းထားတယ်လို့ KNDF ရဲ့ ထုတ်ပြန်ချက်မှာ ဖော်ပြထားပါတယ်။

MK–009

#MekongNews

#ကရင်နီပြည်နယ်

#စစ်သုံ့ပန်

#KNDF

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)