မဲခေါင်၊ ဒီဇင်ဘာ ၃၁
သမ္မတဗလာဒီမာပူတင်၏ နေအိမ်ကို ယူကရိန်းက တိုက်ခိုက်ခဲ့သည် ဆိုသော ရုရှား၏ စွပ်စွဲပြောကြားမှုများကို နေတိုးအဖွဲ့ဆိုင်ရာ အမေရိကန်သံအမတ်ကြီး မက်သယူးဝှစ်တစ်ကာက သံသယဖြင့် ပြောဆိုလိုက်ပြီး ယင်းဖြစ်ရပ်အပေါ် အမေရိကန် ထောက်လှမ်းရေး သတင်းကို ကြည့်လိုကြောင်း ၎င်းက ဆိုသည်။
“ဒါဟာ အမှန်တကယ် ဖြစ်ပျက်ခဲ့သလားဆိုတာ ရှင်းရှင်းလင်းလင်း မရှိပါဘူး” ဟု ဝှစ်တစ်ကာက ဖောက်စ် စီးပွားရေး သတင်းဌာနနှင့် ပြုလုပ်သော အင်တာဗျူးတွင် ပြောသည်။
ငြိမ်းချမ်းရေး သဘောတူညီချက်ရရှိရန် အလွန်နီးကပ်နေချိန်၊ ယူကရိန်းကလည်း ၎င်းသဘောတူညီချက်ကို အလွန် လိုချင်နေချိန်၌ အဆင်ခြင်မဲ့သော သို့မဟုတ် အကျိုးမရှိဟု ရှုမြင်ကြမည့် အရာကို လုပ်ခြင်းမှာ မိမိအတွက် အနည်းငယ် မသိမ်မွေ့ပုံပေါ်သည်ဟု ၎င်းက ဆက်ပြောသည်။
နော့ဗ်ဂိုရော့ဒေသမှ သမ္မတအိမ်တော်ကို ယူကရိန်းက ဒရုန်း ၉၁ စီးဖြင့် တိုက်ခိုက်ခဲ့ကြောင်း ရုရှားက တနင်္လာနေ့က ပြောကြားသည်။
ထိုတိုက်ခိုက်မှုကို လက်တုံ့ပြန်သွားမည် ဖြစ်ကြောင်းနှင့် ငြိမ်းချမ်းရေး ဆွေးနွေးပွဲမှ ရုရှား၏ ရပ်တည်မှုကို တင်းမာ သွားစေမည်ဟုလည်း ရုရှားက ဆိုသည်။
ရုရှားတို့၏ စွပ်စွဲချက်များမှာ ယူကရိန်းအား ဆက်လက် တိုက်ခိုက်နေခြင်းကို အကြောင်းပြရန် လိမ်ညာ ပြောဆိုမှုများ ဖြစ်သည်ဟု ယူကရိန်း ကပြောသည်။
မည်သည့် အထောက်အထားမျှ မရှိသောကြောင့် ရုရှားက ယင်းဖြစ်ရပ်အတွက် မည်သည့် အထောက်အထားမှ ပြသခြင်းမရှိဟု ယူကရိန်းနိုင်ငံခြားရေးဝန်ကြီးက ဆိုသည်။
၎င်း၏ နေအိမ်ကို ယူကရိန်းက တိုက်ခိုက်ရန် ကြိုစားခဲ့သည်ဟု ပူတင်က ၎င်းနှင့် ဖုန်းဆက်သွယ်မှုတွင် ပြောကြားခဲ့ကြောင်း အမေရိကန်သမ္မတ ဒေါ်နယ်ထရမ့်က တနင်္လာနေ့တွင် ပြောကြားသည်။
ထိုကိစ္စအပေါ် အလွန် ဒေါသထွက်ကြောင်းလည်း ထရမ့်က ပြောသည်။
တိုက်ခိုက်သည်ဆိုသည့် အထောက်အထား ရှိပါသလားဟု မေးမြန်းခံရချိန်တွင် “ ကျွန်တော်တို့ စောင့်ကြည့် လေ့လာ သွားမယ်” ဟုလည်း ၎င်းက ဆိုသည်။
ယင်းစွပ်စွဲမှု ဖြစ်ရပ် နှင့် ပတ်သက်၍ မှတ်ချက် ထပ်ပေးရန် အိမ်ဖြူတော်က ငြင်းဆန်ခဲ့ပြီး အမေရိကန် ထောက်လှမ်းရေး အသိုင်းအဝိုင်းကလည်း ထိုဖြစ်ရပ်နှင့် ပတ်သက်၍ နှုတ်ဆိတ်နေကြသည်။
ထို့အတူ စီအိုင်အေကလည်း မှတ်ချက်ပေးရန် ငြင်းဆန်သည်။
“ကျနော်တို့က ထောက်လှမ်းရေး သတင်းတွေကို အောက်ခြေအထိ သေချာ လှန်လှောသွားပါမယ်။ ကျနော့အတွက် အရေးကြီးဆုံးကတော့ ဒီတိုက်ခိုက်မှု အမှန်တကယ် ဖြစ်ခဲ့သလား ဆိုတာကို အမေရိကန်နဲ့ ကျွန်တော်တို့ မဟာမိတ်တွေရဲ့ ထောက်လှမ်းရေး ဌာနတွေက ပြောတာ ဖြစ်ပါတယ်”ဟုနေတိုးအဖွဲ့ဆိုင်ရာအမေရိကန် သံအမတ်ကြီး ဝှစ်တစ်ကာက ပြောသည်။
အေးကျော်
Ref: Reuters
#MeKongNews
#ပူတင်အိမ်
#ယူကရိန်း
#တိုက်ခိုက်
#သံသယရှိ
