မဲခေါင်၊ ဖေဖော်ဝါရီ ၃
ယူကရိန်းရှိ အရပ်သားပစ်မှတ် နှစ်နေရာကို ရုရှားက ဖေဖော်ဝါရီ ၁ ရက်က လေကြောင်းမှ တိုက်ခိုက်ခြင်းကြောင့် ကလေးငယ်နှင့် သက်ကြီးရွယ်အိုအပါ စုစုပေါင်း ၁၈ ဦးသေဆုံးခဲ့ကြောင်း သိရသည်။
နိုင်ငံအလယ်ပိုင်း ပိုလ်တာဗာဒေသက အရပ်သားများနေထိုင်ရာ ၅ ထပ်တိုက်အား ဖေဖော်ဝါရီ ၁ ရက်မှာ ရုရှားက လေကြောင်းမှ တိုက်ခိုက်မှုကြောင့် ၉ နှစ်အရွယ်ကလေးနှင့် မိဘနှစ်ပါး၊ ယူကရိန်း သရုပ်ဆောင်တစ်ဦးအပါ စုစုပေါင်း ၁၄ ဦး သေဆုံးခဲ့သည်။
အပျက်အစီးများအကြား ပိတ်မိနေခဲ့သည့် အရပ်သား ၁၀၀ ခန့်ကိုလည်း ကယ်ထုတ်ခဲ့ရသေးသည်။ ကယ်ထုတ်ခဲ့သူများတွင် ကလေး ၄ ဦးပါဝင်ကြောင်း ပိုလ်တာဗာမြို့တော်ဝန်က ထုတ်ပြန်သည်။
ထိုနေ့တစ်ရက်တည်းမှာပင် ယူကရိန်းသိမ်းပိုက်ထားသည့် ကက်ရှ်ဒေသရှိ သက်ကြီးရွယ်အို စစ်ရှောင်များ ပုန်းခိုနေသည့် စာသင်ကျောင်းဟောင်းကို ရုရှားက ဒုံးကျည်များဖြင့် ပစ်ခတ်တိုက်ခိုက်ခဲ့သောကြောင့် သက်ကြီးရွယ်အို ၄ ဦး သေဆုံးခဲ့သည်။
နာမကျန်းနှင့် သက်ကြီးရွယ်အိုများအား ရုရှားတိုက်ခိုက်သည်မှာ ထိုဖြစ်စဥ်သည် ပထမဆုံးမဟုတ်ဘဲ ချေချင်းညှာထိုးစစ်နှင့် ဆီးရီးယားစစ်ဆင်ရေးများတွင်လည်း အရပ်သားနေအိမ်များကို ရုရှားက ဖျက်ဆီးခဲ့ကြောင်း ပူတင်ဆန့်ကျင်ရေး တက်ကြွလှုပ်ရှားသူ ဆင်နယ်လ်နီကော့ဗ် က ဝေဖန်သည်။
ယူကရိန်းအစိုးရ ပြောရေးဆိုခွင့်ရှိသူ က ရုရှားလုပ်ရပ်သည် မျက်နှာဖုံးမတပ်ထားသည့် မျက်နှာအစစ်ဖြစ်ကြောင်း၊ ပူတင်သည် လူသတ်သမားသာဖြစ်ပြီး မည်သည့် ကမ္ဘာ့ခေါင်းဆောင်မျိုး၊ မည်သည့် နိုင်ငံမျိုးကိုမှ လေးစားစိတ်မရှိကြောင်း၊ ယူကရိန်းနိုင်ငံထဲ နျူကလီးယားဒုံးကျည်များ၊ Kh-22 ဒုံးကျည်များဖြင့် ပစ်ခတ်ခဲ့ပြီးဖြစ်ကြောင်း ပြောဆိုသည်။
ရုရှားသည် ယူကရိန်းမြို့များစွာနှင့် လူနေထူထပ်ရာ နေရာရာပေါင်းများစွာကို ဒုံးကျည် ၅၀ ကျော်၊ ဒရုန်းတိုက်ခိုက်မှု ၆၆၀ ကျော်၊ လေကြောင်း ပဲ့ထိန်းဗုံးကြဲမှု ၇၆၀ ကြိမ် ရက်ပိုင်းအတွင်း ပြုလုပ်ထားသည်။
ရုရှားသည် သူ့သဘောနှင့်သူ သွေးဆာရန်ပြုခြင်းအား ရပ်တန့်စရာမရှိတော့သောကြောင့် ကမ္ဘာကြီး တစ်ခုလုံး ဝိုင်းဝန်းတားဆီးခြင်း၊ ယူကရိန်းအတွက် လေကြောင်းရန်ကာကွယ်ရေးစနစ်များပိုမို ထောက်ပံ့ပေးခြင်း ပြုကြဖို့ ယူကရိန်းသမ္မတ ဇီလန်းစကီး က ပြောသည်။
Ref:Thesun
ကိုကလင်း
#MeKongNews
#ရုရှား
#ယူကရိန်း
#ကလေးငယ်
#လေကြောင်း
#တိုက်ခိုက်
#သက်ကြီးရွယ်အို
