မဲခေါင်၊ ဇန်နဝါရီ ၂
အီလွန်မာ့ခ်ရဲ့ ကုမ္ပဏီ Tesla ထုတ် Cybertruck ကားဟာ ဇန်နဝါရီ ၁ ရက်နေ့က လက်စ်ဗီးဂတ်မှာရှိတဲ့ ထရမ့်ဟိုတယ် အပြင်ဘက်နားမှာ ပေါက်ကွဲမီးလောင်းခဲ့လို့ ၁ ဦးသေ ၇ ဦး ဒဏ်ရာရခဲ့ပြီး ရဲတပ်ဖွဲ့က အကြမ်းဖက်တိုက်ခိုက်မှု ဟုတ်မဟုတ် စစ်ဆေးမှုတွေ ပြုလုပ်နေဆဲဖြစ်ပါတယ်။
ကားမောင်းလာသူ သေဆုံးခဲ့ပြီး အနီးအနားဖြတ်သွား ဖြတ်လာ ၇ ယောက်ဒဏ်ရာရခဲ့မှုမှာ ဒေသစံတော်ချိန် မနက် ၉ နာရီမှာ ဟိုတယ် ဝင်ပေါက် ရှေ့ ရပ်ထားတုန်း ပြင်းထန်စွာပေါက်ကွဲသွားတာဖြစ်ပါတယ်။
ကားပေါက်ကွဲမှုကြောင့် အနီးအနားက ဟိုတယ်မှန်တွေလည်း ကွဲခဲ့ကာ ပေါက်ကွဲပြီးနောက် စစ်ဆေးမှုမှာလည်း ကားထဲ မီးရှူးမီးပန်း၊ ဂက်စ်ဗူး၊ ယာဉ်မောင်းစနစ်ထိန်းချုပ်မှုမှာ ချိန်ကိုက်ထိခတ်နိုင်တဲ့ လောင်စာတွေကို တပ်ဆင်ထားဖွယ်ရှိတာကို မသင်္ကာဖွယ်ရာ တွေ့ရှိရကြောင်း သတင်းတွေက ဆိုပါတယ်။
Tesla ပိုင်ရှင် အီလွန်မာ့ခ်က သူ့ကုမ္ပဏီထုတ်ကားနဲ့ ဆက်စပ်တဲ့ ပေါက်ကွဲမှုမျိုးမဟုတ်ဘဲ အလွန်များပြားတဲ့ မီးရှူးမီးပန်း ဒါမှမဟုတ် ဗုံးတစ်လုံးပေါက်ကွဲသွားတဲ့ မြင်ကွင်းမျိုးသာ ဖြစ်ကြောင်း လူမှုကွန်ရက် X ကနေ အစောပိုင်းမှာ ရေးတင်ပြီး စုံစမ်းသိရှိရတဲ့ သတင်းအချက်အလက်တွေကို ဆက်လက် ထုတ်ပြန်ပေးသွားမယ်လို့ ရေးတင်ခဲ့ပါတယ်။
ဒီပေါက်ကွဲမှုဟာ နယူးအော်လန်းပြည်နယ်မှာ နှစ်သစ်ကူးပွဲတော်ဆင်နွှဲရာ လူအုပ်ထဲ ထရပ်စ်ကားနဲ့ အကြမ်းဖက် တိုက်ခိုက်မှုလို့ ယူဆရတဲ့ လိုက်တိုက်မှုကြောင့် ၁၀ ယောက်သေဆုံး၊ အယောက် ၃၀ ကျော် ဒဏ်ရာရတဲ့ ဖြစ်ရပ်အပြီး နာရီပိုင်းအကြာမှာ ထပ်ဖြစ်ပွားတာကြောင့်လည်း အကြမ်းဖက်တိုက်ခိုက်မှု သံသယရှိနေခဲ့တာဖြစ်ပါတယ်။
ကားနဲ့လိုက်တိုက်သူကို ရဲက အသေပစ်ခတ်ဖမ်းဆီးခဲ့ပြီး ကားနောက်ခန်းမှာ ISIS အလံတစ်ခုကိုလည်း တွေ့ရှိခဲ့ရပါသေးတယ်။
Ref:Thesun
MKF-001
#MeKongNews
#ထရမ့်ဟိုတယ်
#ကားဗုံးပေါက်
#ဒဏ်ရာရ
#တက်စလာ
