မဲခေါင်၊ ဇူလိုင် ၁၉
တရုတ်အစိုးရက အမေရိကန်ဟာ ထိုင်ဝမ်ကို လက်နက်တွေ ဆက်လက် ရောင်းချပေးနေလို့ နှစ်နိုင်ငံကြား နျူကလီးယားထိန်းချုပ်ရေး ဆွေးနွေးမှုတွေကို ရပ်ဆိုင်းကြောင်း ဇူလိုင် ၁၇ ရက်နေ့မှာ ထုတ်ပြန်သွားပါတယ်။
အမေရိကန်ဟာ ၁၉၇၉ ခုနှစ်ကတည်းက တိုင်ပေ(ယခုထိုင်ဝမ်)နဲ့ သံတမန်ဆက်ဆံရေးကို ရပ်တန့်လိုက်ပေမယ့် ဒီကနေ့အထိ ထိုင်ဝမ်ရဲ့ လွတ်လပ်ခွင့်ကို လက်ခံတာကြောင့် အရင်းနှီးဆုံး လက်နက်တင်ပို့ပေးနေသူ အဖြစ် ဆက်လက်ရပ်တည် နေခဲ့တာဖြစ်ပါတယ်။
တရုတ်ဟာ လက်ရှိ တတိယကမ္ဘာစစ်ဖြစ်ပွားဖို့ အနီးစပ်ဆုံးအခြေအနေမှာ နျူးကလီးယား ဒုံးကျည်ထိပ်ဖူးတွေ ကို ကမ္ဘာ့နိုင်ငံအားလုံးထက် ပိုမိုထုတ်လုပ်နေမှုအပေါ် အမေရိကန်ဘက်က ဝေဖန်ခဲ့ပြီး မကြာခင် အမေရိကန် သမ္မတ ဂျိုးဘိုင်ဒန်နဲ့ တရုတ်သမ္မတ ရှီကျင်းဖျင်တို့ နျူကလီးယားထိန်းချုပ်ရေး သဘောတူညီချက်အရ ဆွေးနွေးပွဲ ကျင်းပဖို့ ရှိနေချိန်မှာ တရုတ်အစိုးရက ကံမကောင်းစွာနဲ့ပဲ ဒီဆွေးနွေးမှုတွေကို ရပ်ဆိုင်းလိုက်ရပြီဖြစ်ကြောင်း ကြေညာသွားတာဖြစ်ပါတယ်။
တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လင်ဂျီယန်းက “ အမေရိကန်ရဲ့ ထိုင်ဝမ်ဆီ လက်နက်တွေ ဆက်တိုက် ရောင်းချပေးနေခြင်းဟာ တရုတ်နိုင်ငံ အကျိုးစီးပွားကို ဆိုးရွားစွာ ထိခိုက်စေပါတယ်။ နိုင်ငံရေး မငြိမ်သက်မှုကိုရော နှစ်နိုင်ငံ သံတမန်ယုံကြည်မှုကိုပါ ပျက်ပြားစေလို့ အမေရိကန်နဲ့ နှစ်နိုင်ငံ နျူးကလီးယားထိန်းချုပ်ရေးဆွေးနွေးမှု ရပ်ဆိုင်းဖို့ ဆုံးဖြတ်ပါတယ်” လို့ ထုတ်ပြန်သွားပါတယ်။
ဇွန်လက အမေရိကန်ဟာ F-16 ဖိုက်တာဂျက်လေယာဉ်တွေအပါ ထိုင်ဝမ်ကို စစ်ရေးအထောက်အပံ့ပစ္စည်း ဒေါ်လာ သန်း ၃၀၀ ဖိုး ရောင်းချပေးဖို့ အတည်ပြုလိုက်ပါတယ်။ အမေရိကန်ဘက်ကလည်း တရုတ်ဟာ ၂၀၂၃ မေလမှာပဲ နျူးကလီးယား ဒုံးကျည်ထိပ်ဖူး ၅၀၀ ကျော်ပိုင်ဆိုင်သွားပြီး ၂၀၃၀ မှာ ထိပ်ဖူး ၁၀၀၀ ကျော် ပိုင်ဆိုင်နိုင်ဖို့ ထုတ်လုပ်မှု မြှင့်တင်ဆောင်ရွက်နေကြောင်း ထုတ်ပြန်ခဲ့ပါတယ်။
လက်ရှိမှာ အမေရိကန်က နျူကလီးယား ဒုံးကျည်ထိပ်ဖူး ၃၇၀၀ ပိုင်ဆိုင်ထားပြီး ရုရှားက ၄၅၀၀ ပိုင်ဆိုင်ထားတယ်လို့ စတော့ဟုမ်း နိုင်ငံတကာ ငြိမ်းချမ်းရေးသုတေသနအဖွဲ့က ထုတ်ပြန်ကြေညာထားပါတယ်။
Ref: hongkongfp MKF-001
